Read Samoan Old Version Bible – O LE TUSI PAIA TANIELU, 12 Bible Online

TANIELU, 12 - Samoan Old Version Bible – O LE TUSI PAIA bible

TANIELU, 12

¹O ona po foi ia e tulai ai Mekaeli, o le alii sili, o le na te tulai ona o tagata o lou nuu; e oo mai foi aso vale, e leai sona tusa talu ona faatoa tupu o nuu, ua oo i ia lava aso; o ona po foi ia e laveaiina ai ou tagata, o i latou uma o e ua tusia i le tusi.

²E toatele foi o e momoe i le efuefu o le eleele latou te ala mai, o isi i le ola e faavavau, a o isi i le faalumaina ma le inosia e faavavau.

³O e popoto foi, e fepulafi i latou faapei o le pupula o le lagi; o i latou foi ua faaliliu ai tagata e toatele ia amiotonu, e pei o fetu i latou e faavavau faavavau lava.

⁴A o oe Tanielu e, ia e pupuni o ia upu, ma faamaufaailogaina le tusi, seia oo i ona po o le iuga; e fetaufetuliai tagata e toatele, e tupu tele foi le malamalama.

⁵O a‘u Tanielu, na a‘u vaai atu, faauta foi, o isi e toalua ua tutū mai, o le tasi i le auvai i le itu vai mai o le vaitafe, a o le tasi i le auvai i lela itu o le vaitafe.

⁶Ona faapea atu lea o le tasi i le tagata ua ofu i le ie lino, ua i luga o le vai o le vaitafe, Pe oo mai afea le iuga o ia mea e ofo ai?

⁷Ona a‘u faalogo lea i le tagata ua ofu i le ie lino, ua i luga o le vai o le vaitafe, ua sii i luga i le lagi lona lima taumatau ma lona lima tauagavale, ua tauto foi o ia i le soifua e faavavau, e oo ia mea i le tausaga, ma tausaga, ma le vaeluagalemu o le tausaga; a uma foi ona faataapeapeina le malosi o le nuu paia, ona taunuu foi lea o na mea uma.

⁸Na a‘u faalogo foi, a ua ou le lagona; ona ou faapea atu lea, Le alii e, pe se a le iuga o ia mea?

⁹Ona faapea mai lea o ia, Tanielu e, ina alu ia; auā ua punitia ma faamaufaailogaina o upu seia oo i ona po o le iuga.

¹⁰E toatele e faamamāina, ma faasinasinaina, ma tofotofoina; a e agasala o e agasala, e le lagona foi so latou toatasi o e agasala; a o e popoto e lagona lava i latou.

¹¹E afua i ona po e aveeseina ai le taulaga e fai i aso fai soo, e oo foi i le tuuina atu o le mea inosia e faatafunaina ai, e atoa aso e tasi le afe, ma le lua o selau ma le ivagafulu.

¹²Amuia o lē faatalitali atu ma aulia atu ona aso e afe ma le tolu o selau, ma le tolugafulu ma le lima.

¹³A o oe ia e alu atu seia oo i le iuga; auā e te malolo, e te tu mai foi i lou tofi pe a oo i le iuga o aso.