Read Samoan Old Version Bible – O LE TUSI PAIA TANIELU, 3 Bible Online

TANIELU, 3 - Samoan Old Version Bible – O LE TUSI PAIA bible

TANIELU, 3

¹Na faia e Nepukanesa le tupu o le tupua auro, e onogafulu kupita o lona umi lea; e ono kupita o lona lautele lea; na ia faatuina i le fanua laugatasi o Turu i le itu malo o Papelonia.

²Ua tuu sāvali e Nepukanesa le tupu ia faapotopotoina alii sili, o faipule, o e pule i nuu, o faamasino, o e tausi tupe, o e popoto i tulafono, o e faamatala tulafono, atoa ma faipule uma o itu malo, ia o mai i le faasaina o le tupua na faatuina e Nepukanesa le tupu.

³Ona potopoto mai ai lea o alii sili, o faipule o e pule i nuu, o faamasino, o e tausi tupe, o e popoto i tulafono, o e faamatala tulafono, atoa ma faipule uma o itu malo, ua o mai i latou i le faasaina o le tupua na faatuina e le tupu o Nepukanesa; ona latou tutū ai lea i luma o le tupua na faatuina e Nepukanesa.

⁴Ona alaga atu lea o lē tala‘i ua leo tele, O le upu ia te outou nuu e, ma atu nuu, ma gagana eseese.

⁵Se itu aso tou te lagona ai le leo o le pu, le faaili, le kitara, le sapeka, le saniteri, le sumefono, atoa ma laaupese uiga eseese uma, tou te faapauu ai ma ifo i le tupua auro ua faatuina e le tupu o Nepukanesa.

⁶Ai se tasi e le faapaū ma ifo e lafoina o ia i lea lava itu aso i totonu o le ogaumu e mu ai le afi.

⁷O lenei foi, ua oo ina lagona e tagata uma le leo o le pu, le faaili, le kitara, le sapeka, le saniteri, atoa ma laaupese uiga eseese uma, ona faapauu ai lea o nuu uma, ma atu nuu, ma gagana eseese, ua latou ifo i le tupua auro na faatuina e le tupu o Nepukanesa.

⁸Ona o ane ai lea o tagata Kaletaia ua latou momoli i sa Iutā.

⁹Ua latou tautala atu, ua faapea atu i le tupu o Nepukanesa, Le tupu e, ia soifua oe e faavavau.

¹⁰Le tupu e, na faia e oe le tulafono i tagata uma ia faapauu ma ifo i le tupua auro pe a lagona le leo o le pu, le faaili, le kitara, le sapeka, le saniteri, le sumefono, atoa ma laaupese uiga eseese uma lava.

¹¹Ai se tasi ua le faapaū ma ifo, e lafoina o ia i totonu o le ogaumu o mu ai le afi.

¹²O i ai tagata o sa Iutā, o e na tofia e oe e pule i sauniga o le itu malo o Papelonia, o Sataraka, o Mesako, ma Apeteniko; le tupu e, ua le ava ia tagata ia te oe, latou te le auauna i ou atua, ua le ifo foi i latou i le tupua auro ua e faatuina.

¹³Ona fai atu ai lea o Nepukanesa ma le lilivau ma le ita tele ia ta‘ita‘iina mai Sataraka, ma Mesako, ma Apeteniko. Ona latou ta‘ita‘iina ai lea o ia tagata i luma o le tupu.

¹⁴Ua fai atu Nepukanesa, ua faapea atu ia te i latou, Sataraka e, Mesako e, ma Apeteniko, pe se matuā manatu ea tou te le auauna i o‘u atua, ma outou le ifo i le tupua auro na a‘u faatuina?

¹⁵O lenei, afai ua saunia outou pe a outou lagona le leo o le pu, le faaili, le kitara, le sapeka, le saniteri, le sumefono, atoa ma laaupese uiga eseese uma, tou te faapauu ma ifo i le tupua ua a‘u faia, e lelei; a e afai tou te le ifo, e lafoina outou i lena lava itu aso i totonu o le ogaumu e mu ai le afi; o ai foi se Atua na te laveaiina outou ai la‘u pule?

¹⁶Ua tali mai Sataraka, Mesako, ma Apeteniko, ua faapea mai i le tupu, Nepukanesa e, e le aoga ona matou tali atu ia te oe i lenei mea;

¹⁷afai o lea, ua mafai lo matou Atua, matou te auauna i ai, ona laveai mai ia te i matou ai le ogaumu e mu ai le afi, na te laveaiina mai lava i matou ai lau pule le tupu.

¹⁸A e peitai, a le o lea, ia e silafia e oe le tupu e, matou te le auauna i ou atua; o le tupua auro foi ua e faatuina, matou te le ifo i ai.

¹⁹Ona tumu ai lea o Nepukanesa i le ita tele, ua ese le tu o ona fofoga ia Sataraka, ma Mesako, ma Apeteniko; ua tautala atu ia, ua faapea atu, ia faaaasa le ogaumu, ia faafitu ona sili i le ua masani ai ona tafuina.

²⁰Ona fai atu ai lea o ia i tagata e sili ona totoa i ana ‘au latou te fusifusi ia Sataraka, ma Mesako, ma Apeteniko, ia lafoina i le ogaumu e mu ai le afi.

²¹Ona fusifusia ai lea o ia tagata, atoa ma o latou ofuvae, ma o latou ofu tino, ma o latou ofu talaloa, atoa ma o latou ofu, ma ua lafoina i totonu i le ogaumu e mu ai le afi.

²²Ua tauanau le poloaiga a le tupu, ma le ogaumu ua aasa tele lava, o le mea lea na fano ai i le mumū o le afi o ia tagata e na avae ia Sataraka, ma Mesako, ma Apeteniko.

²³A o ia tagata e toatolu, o Sataraka, o Mesako, ma Apeteniko, ua pauu i latou o fusifusia i totonu o le ogaumu e mu ai le afi.

²⁴Ona matuā ofo ai lea o Nepukanesa le tupu, ua vave ona tulai, ua fai atu, ua faapea atu i ana tulafane, Pe na tatou le lafoina ea tagata e toatolu o fusifusia i totonu o le afi? Ua tali mai i latou, ua faapea mai i le tupu, Le tupu e, sa faapea lava.

²⁵Ua tali atu o ia, ua faapea atu, Faauta, ua ou iloa tagata e toafa, ua tatalaina, ua feoai i totonu o le afi, ua le afaina lava i latou; ua tino mai lona toafa ua pei o se alo o le Atua.

²⁶Ona faalatalata atu lea o Nepukanesa i le gutu o le ogaumu e mu ai le afi, ua fai atu ia, ua faapea atu, Sataraka e, Mesako, ma Apeteniko, o auauna a le Atua silisili, o mai ia, ina o mai. Ona o mai ai lea o Sataraka, Mesako, ma Apeteniko mai totonu o le afi.

²⁷Ona faapotopotoina ai lea o alii sili, o faipule, o e pule i nuu, atoa ma tulafale a le tupu, ua latou matamata i ia tagata ua le mafaia i le afi ona muina o latou tino, e leai foi so latou lauulu ua mu, e lei liua foi o latou ofuvae, ua le namu afi lava i latou.

²⁸Ua fai atu Nepukanesa, ua faapea atu, Ia faafetaia le Atua o Sataraka, Mesako, ma Apeteniko, o le na auina mai lana agelu, ua laveaiina ai ana auauna e na faatuatua ia te ia, ua liliuina foi le upu a le tupu, ma ua latou tuuina atu o latou tino ina ne‘i latou auauna ma ifo i se tasi atua, tau lava o lo latou lava Atua.

²⁹O le mea lea ou te pule ai, Ai se nuu, po o se atu nuu, po o se gagana ese, na te faia se upu vale i le Atua o Sataraka, Mesako, ma Apeteniko, e vaevaeniniiina i latou, e fai foi o latou fale ma faatăfuna; auā e leai se isi atua na te mafaia ona laveaiina faapena.

³⁰Ona tomai lea o Sataraka, Mesako, ma Apeteniko i le itu malo o Papelonia, i le pule a le tupu.