Read Samoan Old Version Bible – O LE TUSI PAIA TANIELU, 5 Bible Online

TANIELU, 5 - Samoan Old Version Bible – O LE TUSI PAIA bible

TANIELU, 5

¹Na faia e Pelesara le tupu le faigā‘ai tele ma alii e toaafe sa ia te ia, ua na inu uaina foi i luma o le toaafe.

²Ua fai ane Pelesara, a o inu uaina, ia aami i ipu auro ma ario na aumaia e Nepukanesa lona tamā nai le malumalu i Ierusalema, ina ia feinu ai le tupu, ma alii sa ia te ia, ma ana avā, atoa ma ana palake.

³Ona latou au mai ai lea o ipu auro na aumaia nai le malumalu o le fale o le Atua i Ierusalema, ona feinu ai lea o le tupu, ma alii sa ia te ia, ma ana avā, atoa ma ana palake.

⁴Sa latou feinu uaina, ma latou vivii atu i atua auro, ma ario, o ‘apa memea, o uamea, o laau, ma maa.

⁵O lea lava itu po na oo mai ai tamatamai lima o le tagata, ma ua tusi i le panisina o le pa puipui ua feagai ma le tuugalamepa i le maota o le tupu; ua iloa foi e le tupu o le lima ua tusi.

⁶Ona liua lea o fofoga o le tupu, ua atuatuvale o ia i lona manatunatu, ua tatalaina sootaga o lona papatua, o ona tulivae foi ua faafetoai le tasi i le tasi.

⁷Ua valaau atu le tupu ua leo tele, ia o mai vaafaatau, ma le au Kaletaia, atoa ma e popoto i fetu; ua fai atu le tupu, ua faapea atu i le au popoto o Papelonia, O le tagata na te faitaulia lena tusi, ma faailoa mai ia te au lona uiga, e faaofuina o ia i le ofu pauli, e asoa o ia i le filifili auro, e pule foi o ia i le malo na o le toalua e sili ia te ia.

⁸Ona o mai ai lea o le au popoto uma o le tupu, a ua le mafaia i latou ona faitau o le tusi, ma faailoa i le tupu lona uiga.

⁹Ona atuatuvale tele ai lea o le tupu o Pelesara, ua liua ona fofoga, ua fememeai foi alii sa ia te ia.

¹⁰Ua ulufale atu le sa‘o tamaitai i le fale e fai ai taumafataga, ona o upu a le tupu ma alii sa ia te ia; ua fai atu le sa‘o tamaitai, ua faapea atu, Le tupu e, ia soifua oe e faavavau; aua ne‘i atuatuvale i lou manatunatu, aua foi ne‘i liua ou fofoga.

¹¹O loo i ai i lou malo le tasi tagata o i ai le agaga o atua paia, sa iloa foi ia te ia i ona po o lou tamā o le malamalama, ma le mafaufau, ma le poto e tusa ma le poto o atua; na tofia o ia e lou tamā le tupu o Nepukanesa, o lou lava tamā le tupu e fai ma matai o taulāitu, ma vaafaatau, ma le au Kaletaia, ma e popoto i fetu.

¹²Auā sa iloa i lena Tanielu, o le na faaigoaina e le tupu, o Peletisara, o le atamai tele, ma le poto, ma le mafaufau, e faamatalaina e ia o li‘a, na te matea mai tupua, e talatalaina e ia mea faigata; o lenei, ia valaauina Tanielu na te faailoa mai le uiga.

¹³Ona aumaia lea o Tanielu i luma o le tupu; ona fai atu lea o le tupu, ua faapea atu ia Tanielu, O oe ea o Tanielu mai le tafeaga o sa Iutā na aumaia e lo‘u tamā le tupu mai Iuta?

¹⁴Ua ou faalogo i le tala ia te oe, ua ia te oe le agaga o atua, atoa ma le malamalama, ma le mafaufau, ma le poto ua sili ua ia te oe.

¹⁵Ua uma ona aumaia i o‘u luma le au popoto, o vaafaatau, ina ia latou faitau ai lena tusi, ma faailoa mai ia te au lona uiga; a ua le mafaia e i latou ona faailoa mai o le uiga o le upu.

¹⁶A ua ou faalogo i le tala ia te oe, ua e mafaia ona faamatala uiga, ma talatalaina mea faigata; o lenei, afai ua e mafaia ona faitau mai o le tusi, ma faailoa mai ia te au lona uiga, e faaofuina oe i le ofu pāuli, e asoa foi oe i le filifili auro, e pule foi oe i le malo na o le toalua e sili ia te oe.

¹⁷Ona tali mai lea o Tanielu, ua faapea mai i luma o le tupu, Tuu ai pea ia te oe au mea alofa, ia e avatu i se tasi au taui; a o le tusi ou te faitauina atu lava i le tupu, ma faailoa ia te ia lona uiga.

¹⁸O oe na le tupu e, na foaiina e le Atua silisili ia Nepukanesa lou tamā o le malo, ma le mamalu, ma le viiga, ma le faaneeneega;

¹⁹o le mamalu foi na ia foaiina atu ia teia, sa gatete ai ma matatau ai i ona luma o nuu, ma atu nuu, ma gagana eseese; na ia fasia le na ia finagalo i ai, na ia faaola foi i le na ia finagalo i ai; na ia faaeaina le na ia finagalo i ai, na ia faamaulaloina foi le na ia finagalo i ai.

²⁰A ua oo ina faamaualugaina o lona loto, ma ua maaa lona loto e faamaualuga ai, ona tūleia lea o ia ai lona nofoālii, na aveeseina foi ia te ia lona mamalu.

²¹Sa tulia foi o ia ua te‘a ma tagata, o lona loto sa liua ua pei o le loto o le manu, sa mafuta faatasi o ia ma asini o le vao; sa taumafa o ia i le mutia pei o povi, sa sūsū foi lona tino i le sau mai le lagi, ina seia silafia e ia ua pule le Atua silisili i le malo o tagata, na te tofia i ai le ua ia finagalo i ai.

²²O oe foi lona alo, Pelesara e, e ui lava ina e silafia ia mea uma, e te lei faamaulaloina lou finagalo,

²³a ua e faamaualuga oe i le Alii o le lagi; ua aumaia foi i ou luma o ipu o lona malumalu, ua inu ai uaina e oe, ma alii ua ia te oe, o ou faletua, ma au palake; ua e vivii atu foi atua ario, ma auro, ma ‘apa memea, ma uamea, ma laau, ma maa, e le vaai i latou, e le lagona, e le iloa ni mea; a o le Atua ua i lona aao lou mānava, ua ia te ia foi ou ala uma, e te lei vivii atu i ai.

²⁴E i ai ona tuuina mai e ia o le lima; ona tusia ai lea o lenei tusi.

²⁵O lenei le tusi na tusia, MENE, MENE, TAKELE, UPERESA.

²⁶O le uiga lenei o le upu, MENE, Ua faitaulia e le Atua lou malo, ua faaiuina.

²⁷TEKELE, Ua fuatia oe i le fuafaatautau, a ua iloa oe ua mamasagia.

²⁸PERESA, Ua vaevaeina lou malo, ua foaiina atu ia Metai ma Peresia.

²⁹Ua fai atu Pelesara, ona latou faaofu ai lea ia Tanielu i le ofu pāuli, ma le filifili auro e asoa ai, ma ua latou tala‘i atu ia pule o ia i le malo na o le toalua e sili ia te ia.

³⁰O le po lava lea na fasiotia ai Pelesara le tupu o Kaletaia.

³¹Na maua le malo o Tariu le Metai i le onogafulu ma le lua o ona tausaga.