Read Samoan Old Version Bible – O LE TUSI PAIA TANIELU, 8 Bible Online

TANIELU, 8 - Samoan Old Version Bible – O LE TUSI PAIA bible

TANIELU, 8

¹O le tolu o tausaga o le nofoaiga a le tupu o Pelesara, o a‘u o Tanielu, na ou iloa le faaaliga, e mulimuli ane i le na ou luai iloa.

²Na ou iloa foi le faaaliga, na ou iloa ai a o i ai a‘u i Susana i le maota, ua i ai i le itu malo o Elama; na ou iloa foi i le faaaliga sa a‘u i ai e lata ane i le vaitafe o Ulai.

³Na ou tepa ae, ona ou iloa lea, faauta foi, ua tu i tafatafa o le vaitafe o le mamoe poa, ua i ai nifo e lua, o nifo foi ua uumi, a ua sili ona umi o le tasi i le tasi, o le ua umi foi sa muliai tupu ia.

⁴Na ou iloa ua sua le mamoe poa i sisifo, ma le itu i matu, atoa ma le itu i toga; ua leai foi se manu e tasi ua mafai ona tu i ona luma, ua leai foi se na te laveai mai ai lona lima; a ua ia fai mea ua ia loto i ai, ma ua faasilisili lava ia.

⁵O a‘u sa a‘u manatunatu, faauta foi, o le ‘oti poa ua sau mai sisifo i le fogāeleele uma, a ua le pai i le laueleele; ua i ai foi i le ‘oti le nifo tele i le va o ona mata.

⁶Ua alu atu lava ia i le mamoe poa ua i ai nifo e lua, o le na a‘u iloa o tu i tafatafa o le vaitafe, ua oso atu ia te ia ma lona malosi tele.

⁷Na ou iloa o ia, ua ia faalatalata atu i le mamoe poa, ua matuā lili ia te ia, ma na tuīa le mamoe poa, ua gaugau ai ona nifo e lua; ua le lavā lava le mamoe poa ona tu i ona luma, a ua na lafotuina ia i le eleele, ma soli ia te ia; ua leai lava se na te laveaiina le mamoe poa ai lona lima.

⁸Ona faasilisili lava lea o le ‘oti poa; ua oo ina malosi o ia, ona gauiesea lea o le nifo tele; a ua tutupu ae ni nifo tetele e fa e sui a‘i, ua faasaga foi i matagi e fa o le lagi.

⁹Ua tupu ae foi ai totonu o le tasi o i latou o le tasi nifo itiiti, ua tupu tele lava ia i le itu i toga, ma sasae, atoa ma le nuu matagofie.

¹⁰Ua tupu tele foi o ia, ua oo i ‘au e le lagi, ma ua na lafotu ifo i le eleele nisi ‘au atoa ma nisi fetu, ma na soli i ai.

¹¹Ua faasilisili o ia ua oo lava i le ave ‘au, na ia aveesea le taulaga e fai i aso fai soo, ua ia lafotuina foi lona malumalu paia.

¹²Ona tuuina atu lea o ‘au, atoa ma le taulaga e fai i aso fai soo mo agasala, ua ia lafotuina le upu moni i le eleele, ua ia fai foi lona loto, ma ua manuia.

¹³Ona ou faalogo lea, ua tautala le tasi o le au paia, ua fai ane foi se tasi o le au paia ia te ia lava na tautala, Seia afea ea le faaaliga i la le taulaga e fai aso fai soo, ma le agasala e faatafuna ai, ona tuuina atu lea o le malumalu atoa ma ‘au ia solia lava?

¹⁴Ona faapea mai lea o ia ia te au, Seia atoa afiafi ma taeao e lua afe ma le tolu o selau, ona faapaiaina ai lea o le malumalu.

¹⁵Na a‘u iloa le faaaliga, o a‘u lava o Tanielu, ona a‘u suesue ai lea o le uiga, faauta foi, ua tu mai i o‘u luma se tasi ua tino mai pei se tagata.

¹⁶Ona a‘u lagona lea o le leo o le tagata i le va o auvai o Ulai, ua valaau, ua faapea ane, Kaperielu e, ia e faamatalaina le faaaliga i lenei tagata.

¹⁷Ua ia sau e lata ane i le mea na a‘u tu ai; ua sau lava ia, ona a‘u fefe ai lea, ua ou faapaū fao; ona faapea mai lea o ia ia te au, Ia e iloa, le atalii e o le tagata, auā o ona po o le iuga e taunuu ai le faaaliga.

¹⁸O loo o tautala mai o ia ia te au, ua ou moe gase faafaō lava i le eleele; a ua pai mai o ia ia te au, ma na faatuina a‘u i luga.

¹⁹Ua ia faapea mai foi, Faauta mai, ou te faailoa ia te oe mea e tutupu i ona po e taufaaiu ai le toasa; auā o ona po ua tuupoina e oo ai le iuga.

²⁰O le mamoe poa na e iloa ua i ai nifo e lua, o tupu ia o Metai ma Peresia.

²¹O le ‘oti taufulufulu foi, o le tupu lea o Iavana; a o le nifo tele o i le va o ona mata, o le tupu muamua lea.

²²Ua gau foi lena nifo, a ua tutū mai ai isi e fa e sui a‘i, e tutū mai malo e fa mai le atu nuu, a e le o i ai lona malosi.

²³A oo i le gataaga o latou malo, pe a faaatoatoaina agasala a e agasala, ona tu mai ai lea o le tupu mata saua, na te iloa foi upu e faigata.

²⁴E tele lona malosi, a e le o lona lava malosi; e faasilisili lava ia ona faaumatia, e manuia ia, e fai foi lona loto, na te faaumatia i e malolosi, atoa ma le nuu paia.

²⁵O lona faautauta foi na te faamanuia ai ana sauniga pepelo; e faasilisili o ia i lona loto, na te faaumatia foi tagata o toatele, a o maninoa; e tulai atu foi o ia i le Alii o alii; e olopalaina, a e le se lima e olopalaina ai.

²⁶O le faaaliga o le afiafi ma le taeao sa ta‘ua, ua faamaoni lea; ia e pupuni foi le faaaliga, auā e tele ona aso.

²⁷O a‘u o Tanielu, sa ou vaivai, na ou ma‘i foi i isi aso; ona ou tulai lea, ma a‘u faia le feau a le tupu; na ou ofo tele i le faaaliga, a ua le iloa e se tasi.