Read Samoan Old Version Bible – O LE TUSI PAIA TANIELU, 9 Bible Online

TANIELU, 9 - Samoan Old Version Bible – O LE TUSI PAIA bible

TANIELU, 9

¹O le tausaga muamua o Tariu le atalii o Asueru, o le na tupu mai Metai, sa fai o ia ma tupu i le malo o Kaletaia,

²o le tausaga muamua o lana nofoaiga, o a‘u o Tanielu na a‘u iloa ai i tusi le faitau o tausaga na fetalaia mai e Ieova ia Ieremia le perofeta, ia faaatoaina ai le faatafunaina o Ierusalema, o tausaga e fitugafulu ia.

³Ona ou faasaga lea i le Alii le Atua e saili i le tatalo, ma le faatoga, ma le anapogi, ma le ie talatala, ma le lefulefu.

⁴Na a‘u tatalo ia Ieova lo‘u Atua, ma ou faaali atu, ua ou faapea atu, Le Alii e, o le Atua e sili ma le matautia, o lē tausi i le feagaiga, ma le alofa i e alofa atu ia te ia, atoa ma e o tausiusi i ana poloaiga.

⁵Ua matou agasala, ma ua fai mea leaga, ma ua matou agaleaga, ua fouvale foi ina ua te‘a ese ma au poloaiga ma au faamasinoga.

⁶E lei faalogo i matou i au auauna le au perofeta, o e na tautala mai i lou suafa i o matou tupu, ma o matou alii, ma o matou tamā, atoa foi ma tagata uma o le nuu.

⁷Le Alii e, ua ia te oe le amiotonu, a ua ia te i matou le masiasi, pei ona i ai i ona po nei, ua i tagata o Iuta, ma e sa nonofo i Ierusalema ma Isaraelu uma, o e ua latalata mai, atoa ma e ua mamao i nuu uma na e tulia ai i latou, ona o a latou agasala na latou agasala ai ia te oe.

⁸Le Alii e, ua ia te i matou le masiasi, o matou tupu, ma o matou alii, atoa ma o matou tamā, auā ua matou agasala ia te oe.

⁹O loo i le Alii, lo matou Atua, le alofa mutimutivale ma le faamagaloina o sala, auā ua matou fouvale ia te ia.

¹⁰E lei faalogo foi i matou i le siufofoga o Ieova lo matou Atua, e savavali i ana tulafono, na ia tuuina mai ia i matou e ana auauna le au perofeta.

¹¹O Isaraelu uma foi, ua latou solia au tulafono, ma ua o ese, ua le fia faalogo i lou siufofoga; o lea ua faaooina mai ai ia te i matou le fetuu, ma le malaia ua tusia i le tulafono a Mose le auauna a le Atua, auā ua matou agasala ia te ia.

¹²Ua ia faataunuu ana afioga na ia fetalai mai ia te i matou, atoa ma o matou faamasino o e na faamasino ia i matou, ina ua ia faaoo mai ia i matou le malaia tele; auā e lei faia se mea i lalo o le lagi uma faapei ona faia i Ierusalema.

¹³E pei ona tusia i le tulafono a Mose, ua faapea lava ona oo mai ia te i matou o nei mala uma; a ua matou le aioi atu i luma o Ieova lo matou Atua, ina ia matou liliu ese i a matou agasala, ma mafaufau i lou faamaoni.

¹⁴Na silasila foi Ieova i le malaia, ma ua faaooina mai ai lava ia te i matou; auā ua amiotonu Ieova lo tatou Atua i ana galuega uma ua ia faia; a ua matou le faalogo i lona siufofoga.

¹⁵O lenei, le Alii e, lo matou Atua, o le na aumaia lou nuu ma le aao malosi ai le nuu o Aikupito, ua e maua foi viiga e pei ona fai i nei ona po; ua matou agasala, ua matou amio leaga.

¹⁶Le Alii e, ou te aioi atu ia te oe, ona o lau amiotonu uma, ia e liliueseina lou toatamai ma lou toasa ai lau aai o Ierusalema, o lou mauga paia; auā o a matou agasala, ma amioletonu a o matou tamā ua avea ai Ierusalema atoa ma lou nuu ma luma e i latou uma o e vagavagai mai ia te i matou.

¹⁷O lenei, lo matou Atua e, ia e faafofoga mai i le tatalo a lau auauna, atoa ma ana faatoga, ma ia malamalama atu ou fofoga i lou malumalu ua faatafunaina, ona o le Alii.

¹⁸Lo‘u Atua e, ia e liliu mai ou fofoga, ma faafofoga mai; ia sisila mai ou fofoga, ma e silasila mai i lo matou faatafunaina, atoa ma le aai ua faaigoa i lou suafa; auā matou te le avatu lo matou aioi i ou luma ona o a matou amiotonu, a o lou alofa tele.

¹⁹Le Alii e, ia e faafofoga mai. Le Alii e, ia faamagalo mai. Le Alii e, ia e faasagasaga mai, ma e faia lava; aua le faatuatuai, ona o lau afio lava, lo‘u Atua e, auā ua igoa i lou suafa lau aai ma lou nuu.

²⁰O loo ou tautala atu ma tatalo, ma ta‘uta‘u atu a‘u agasala, ma le agasala a lo‘u nuu o Isaraelu, o loo fai foi lo‘u aioi i luma o Ieova lo‘u Atua mo le mauga paia o lo‘u Atua;

²¹o loo ou tautala lava i le tatalo, ua pai mai ia te au le tagata o Kaperielu, o le na a‘u luai iloa i le faaaliga, o loo lele faataalise mai i le itu la o le taulaga afiafi.

²²Na ia a‘oa‘o mai, ma ua tautala mai ia te au, ua faapea mai, Tanielu e, ua a‘u sau nei e a‘oa‘o ia te oe e poto ai.

²³Na amataina au faatoga ona oo mai ai lea o le poloaiga; i le ua ou sau ai e faailoa atu ia te oe, auā ua alofateleina oe; o lenei, ia e iloa le upu, ma mafaufau i le faaaliga.

²⁴Ua atofaina vaiasosa e fitugafulu i lou nuu ma lau aai paia, e faauma ai le solitulafono, ma faaiu ai agasala; e fai ai foi le togiola mo agasala, ma faaooina mai ai le amiotonu e faavavau, e faamaufaailogaina foi le faaaliga ma le valoaga, e faauuina ai foi le mea e silisili ona paia.

²⁵Ia e iloa foi ma manatunatu, e afua mai i le oo atu o le poloaiga ia toe faia ma ia atiina ae Ierusalema, e oo atu i le Mesia le Alii, e fitu vaiasosa ma vaiasosa e onogafulu ma le lua, e toe faia le ala tele ma le pa i ona po lava o le puapuaga.

²⁶A mavae vaiasosa e onogafulu ma le lua, ona fasiotia ai lea o le Mesia, a e leai se mea ia te ia; o le nuu o le alii o le a maliu mai, latou te faaumatia le aai ma le malumalu, o lona iuga foi ua se tafega lea; ua tuu le pule ia faatafunaina e oo i le iuga o le taua.

²⁷Na te faatumauina foi le feagaiga i tagata e toatele i le vaiasosa e tasi; o le vaeluagalemu foi o le vaiasosa na te faagata ai le taulaga, atoa ma le mea foaifuaina, e i ai foi i le itu o le malumalu mea e inosia e faatafunaina a‘i, seia oo i le iuga o le mea ua tuu pule i ai, ma ua faaoo i le na te faatafunaina.