Read Samoan Old Version Bible – O LE TUSI PAIA HOSEA, 10 Bible Online

HOSEA, 10 - Samoan Old Version Bible – O LE TUSI PAIA bible

HOSEA, 10

¹O Isaraelu, o le vine ia e māfalā; ua ia fua mai ni fua e fai mona; faapei ona tele o lona fua, ua faapea ona faateleina e ia o fata faitaulaga; faapei ona lelei o lona laueleele, ua faapea ona latou gaosi lelei o tupua.

²Ua faalotoloto lua i latou; ua nofo sala nei i latou; na te lepetia a latou fata faitaulaga, na te faaumatia a latou tupua.

³Auā e faapea mai nei i latou, Ua leai se tupu ia te i matou, auā ua matou le matatau ia Ieova; se a foi se mea e faia e le tupu ia i matou?

⁴Ua latou fai mai upu, ua tauto pepelo, ua osi le feagaiga; e tupu ae foi le faamasinoga, e pei o laau oona i utu o fanua.

⁵E fefefe e ua nonofo i Samaria ona o tamai povi o Petavene; auā e fetagisi ai ona tagata, o ona ositaulaga foi e na fiafia i ai; auā o lona mamalu ua te‘a ma ia.

⁶E avea foi lenei mea i Asuria e fai ma mea alofa i le tupu o Iarepa; e mā Efaraima, e masiasi foi Isaraelu ona o lana lava pule.

⁷O Samaria ua fano lona tupu, e pei o si fasi laau i le fogāvai.

⁸E faaumatia foi mea maualuga i Avene, o le agasala a Isaraelu; e tutupu ae le laau tuitui ma le laau talatala i o latou fata faitaulaga; latou te fai atu foi i mauga, Ina tanu mai ia ia te i matou. E faapea foi i mea maupuepue, Ina mafuli mai ia i luga ia te i matou.

⁹Isaraelu e, talu mai ona po o Kipea ua e agasala ai; ua latou tutumau ai; na le oo atu ia te i latou i Kipea le taua i tagata agaleaga.

¹⁰O lo‘u loto, ou te aoai ia te i latou; e faapotopotoina foi tagata e tau ma i latou, pe a ou fusifusi ia te i latou ona o a latou agasala e lua.

¹¹O Efaraima foi o le povi fafine ia ua a‘oa‘oina, ua fia soli saito lava; a ua ou alu atu lava a‘u i lona ua lalelei; ou te faatietie se tasi ia Efaraima, e suatia le eleele e Iuta e faamăluluina e Iakopo lona laueleele.

¹²Ia outou lulu saito mo outou ma le amiotonu, ia outou selesele mai ma le amio lelei; ia outou suatia lo outou fanua vaoa; auā ua oo i ona po e saili atu ai ia Ieova, seia afio mai o ia, ma faatotō ifo le amiotonu i luga ia te outou.

¹³Ua outou suatia le agasala, ua outou selesele mai le leaga; ua outou aai le fua o le pepelo; auā na e faatuatua i lou ala, ma le toatele o ou tagata totoa.

¹⁴O lea e tupu ai le vāvāō i ou tagata, e faaumatia ou ‘olo uma lava, e pei ona faaumatia e Salemana o Petarepelu i le aso na tau ai le taua; na palasi le tinā faatasi ma ana tama.

¹⁵E faapea lava ona faia ia te outou i Peteli ona o la outou amio e matuā leaga; e matuā fano lava le tupu o Isaraelu i le taeao.