Read Samoan Old Version Bible – O LE TUSI PAIA HOSEA, 5 Bible Online

HOSEA, 5 - Samoan Old Version Bible – O LE TUSI PAIA bible

HOSEA, 5

¹Le au ositaulaga e, faalogologo mai ia i lenei mea. Le aiga o Isaraelu e, ina faalogologo mai ia. Le aiga o le tupu e, ina liliu mai ia o outou fofoga, auā ua faasalaina outou, ua avea outou ma matāsele i Mesepa, ma upega ua folasia i Tapora.

²Ua faateleina le fasi e i latou ua liliu ese, a o a‘u, ou te aoai atu ia te i latou uma.

³O a‘u ua ou iloa Efaraima, o Isaraelu foi ua le lilo lava ia ia te au; auā, Efaraima e, ua e faitaaga nei, ua leaga Isaraelu.

⁴Latou te le sauniuni a latou galuega ina ia latou liliu mai i lo latou Atua; auā o i totonu ia te i latou le fia faitaaga, latou te le iloa Ieova.

⁵Ua molimau le faamaualuga o Isaraelu i o latou luma, e pauu Isaraelu ma Efaraima i a latou agasala; e paū foi Iuta faatasi ma i latou.

⁶Latou te o atu ma a latou mamoe ma a latou povi e sailiili atu ai ia Ieova; a e latou te le maua; ua afio ese o ia ia te i latou.

⁷Ua pepelo i latou ia Ieova; auā ua fanau e i latou a latou tama ese; o le a ‘aina nei i latou, atoa ma o latou tofi i le masina e tasi.

⁸Ia outou ilia le sofao i Kipea, ma le pu i Rama; ia outou alalaga i Petavene; Peniamina e, o loo mulimuli atu o ia ia te oe.

⁹E faatafunaina Efaraima i ona po o le aoaiga; ua ou faailoaina atu i itu aiga o Isaraelu, o le upu moni lava.

¹⁰O alii o Iuta sa faapei o tagata e sii le tuaoi i latou; ou te liligi atu lo‘u ita faapei o le vai ia te i latou.

¹¹Ua faasauaina Efaraima, ua lomia i le faamasinoga; auā ua usiusitai o ia ma lona loto i le poloaiga.

¹²O a‘u foi e pei o se mogamoga i Efaraima; e pei o se mea e pala foi i le aiga o Iuta.

¹³Na iloa e Efaraima lona ma‘i, na iloa foi e Iuta lona manua, ona alu lea o Efaraima i Asuria, na alu lana feau ia Iarepa le tupu; a ua le mafai lava ia te ia ona faamalolo ia te outou, pe faamafuina o outou manua.

¹⁴Auā e avea a‘u e pei o se leona ia Efaraima, e pei o se leona taanoa foi i le aiga o Iuta; o a‘u lava ou te saeia ma alu ese, ou te aveesea, e leai foi se na te laveaiina.

¹⁵Ou te alu, ou te toe foi lava i le mea ou te nofo ai, seia faasalaina lava i latou, ma latou saili ia te au; latou te vave saili ia te au pe a puapuagatia i latou.