Read Samoan Old Version Bible – O LE TUSI PAIA HOSEA, 8 Bible Online

HOSEA, 8 - Samoan Old Version Bible – O LE TUSI PAIA bible

HOSEA, 8

¹Ia e ili le pu; e sau o ia e pei o se aeto i le aiga o Ieova; auā ua latou soli la‘u feagaiga, ma ua latou fouvale i la‘u tulafono.

²E alalaga i latou ia te au, Lo matou Atua e, o Isaraelu i matou, ua matou iloa oe.

³Ua lafoaiina e Isaraelu le mea lelei; e tuliloaina o ia e le ua ita ia te ia.

⁴Ua latou tofia tupu a e le mai ia te au; ua latou tofia alii a e le iloa e a‘u; o latou ario, ma o latou auro ua latou fai a‘i tupua mo i latou, ina ia faaumatia ai i latou.

⁵Samaria e, ua lafoaiina oe e lau tamai povi; ua tupu lo‘u ita ia te i latou; pe latou te le mafai seia afea ona mamā?

⁶Auā mai ia Isaraelu lava ia; na faia o ia e le tufuga; e le o le Atua lava ia, o le mea lea e nutililiiina ai le tamai povi o Samaria.

⁷Na latou luluina le matagi, o le mea lea latou te selesele mai ai le afā; ua leai sona tino; e le tupu se saito i le fuga, a e afai e fua, e ‘aina e tagata ese.

⁸Ua faaumatia Isaraelu; latou te i ai nei i nuu ese, e pei o se ipu e leai sē fiafia i ai.

⁹Auā ua latou o ae i Asuria, ua se asini o le vao ua nofo toatasi; ua faaoloaina e Efaraima e o mananao ia te ia.

¹⁰A e ui ina latou faaoloaina nuu ese, ou te faapotopoto nei ia te i latou; e le pine ona tiga o i latou ona o le avega mai le tupu o alii.

¹¹Ua faia e Efaraima fata faitaulaga e tele, e agasala ai; o le mea lea ua avea ai fata faitaulaga ma mea e agasala ai o ia.

¹²Ua ou tusi atu ia te ia o mea tetele i la‘u tulafono; a ua ta‘ua ia mea o mea ese.

¹³Latou te fai taulaga i manu e fai ma taulaga mo a‘u, ma latou aai ai; a ua le talia i latou e Ieova; e manatua nei e ia a latou amio leaga, ma taui i a latou agasala; latou te toe foi i Aikupito.

¹⁴Auā ua faagalogalo e Isaraelu i Lē na faia o ia, ua faatuina e ia o malumalu; o Iuta foi ua ia faateleina o aai nofo ‘olo; ou te tuuina atu le afi i ana aai, e faaumatia ai ona maota.