Read Samoan Old Version Bible – O LE TUSI PAIA IOELU, 3 Bible Online

IOELU, 3 - Samoan Old Version Bible – O LE TUSI PAIA bible

IOELU, 3

¹Faauta mai, o ia ona aso ma lea tausaga, pe a ou faafoisia le tafeaga o Iuta ma Ierusalema,

²ou te faapotopotoina ai nuu uma lava, ou te aveina ifo i latou i le vanu o Iosefatu, ou te faasalaina ai i latou ona o lo‘u nuu, ma lo‘u tofi o Isaraelu o e na faataapeapeaina e i latou i nuu ese, o lo‘u fanua foi na latou tofitofia.

³Ua latou fai le vili e maua ai lo‘u nuu; ua latou tuuina atu se tama e fai ma tau o se fafine talitane, ua avatu foi se teine ma tau o uaina latou te feinu ai.

⁴Turo e, ma Saitonu, ma le itu uma o Filisita e, se a la outou na ia te au? tou te au mai ea se taui ia te au? afai tou te taui mai ia te au, ou te taalise ona faafoi faafuasei lo outou taui i o outou ulu.

⁵Auā ua outou avea la‘u ario ma la‘u auro, o a‘u mea lelei ma le aoga tele ua avatu ai i o outou malumalu;

⁶o le fanau a Iuta ma le fanau a Ierusalema ua outou faatauina i le fanau a Iavana, ina ia outou ave mamao ia te i latou i o latou nuu.

⁷Faauta mai, ou te lagaina i latou ai le mea ua outou faatauina atu i ai i latou, ou te faafoisia foi lo outou taui i o outou ulu.

⁸Ou te faatau atu o outou atalii ma o outou afafine i le pule a le fanauga a Iuta, latou te faatau atu foi ia te i latou i Sepea, o le nuu mamao; auā ua fetalai mai ai Ieova.

⁹Ia outou tala‘iina atu lenei mea i nuu ese, ia outou sauniuni le taua, ia outou lagaina tagata totoa, ia faalatalata mai, ma o ae o tagata tau uma lava.

¹⁰Ia outou tu‘itu‘i le uamea o outou suotosina e fai ma pelu, ma a outou polo teu vine e fai ma tao; ia faapea mai le ua vaivai, Ua malosi a‘u.

¹¹Outou nuu uma e, ia outou faapotopoto, ma soloai mai, ia outou faapotopoto foi ai itu uma; Ieova e, ia e faaoo ifo i lea mea au ‘au malolosi.

¹²Ia laga mai o nuu ese, ma o ae i le vanu o Iosefatu; auā ou te nofo ai e faamasino i nuu uma mai itu uma.

¹³Ia outou tuu atu le selesaito, auā ua afu saito; o mai ia, ina outou o ifo; auā ua tumu le mea e soli ai vine, ua taumasuasua o latou tuugāuaina; auā ua tele lo latou leaga.

¹⁴E toatele lava tagata i le vanu e faasalaina ai, auā ua latalata mai le aso o Ieova i le vanu e faasalaina ai.

¹⁵E faapouliuligia le la ma le masina, o fetu foi e le toe fepulafi mai.

¹⁶E faataio foi Ieova mai Siona, e tŭlei ifo lona siufofoga ai Ierusalema; e luluina le lagi ma le lalolagi, a o Ieova, o le malu o ia o lona nuu, ma le ‘olo o le fanauga a Isaraelu.

¹⁷Tou te iloa foi o a‘u o Ieova lo outou Atua, o lē nofo i Siona lo‘u mauga paia; ona paia lea o Ierusalema, o tagata ese foi latou te le toe ui atu ai lava.

¹⁸A oo foi i lea aso, ona tautulu mai lea o suāvine i mauga, e tafe foi le suāsusu i mauga iti, o alia uma foi o Iuta e tafe mai ai suāvai; e tafe mai se punāvai ai le fale o Ieova, e faasūsū ai le vanu o Setima.

¹⁹E faatafunaina Aikupito, e avea Etoma ma laueleele gaogao, ona o le faasaua i le fanauga a Iuta, auā ua latou faamaligiina i lo latou nuu le toto o e le sala.

²⁰A e tumau Iuta e faavavau, o Ierusalema foi i lea tupulaga ma lea tupulaga.

²¹Ou te faamamā lo latou toto sa le faamamāina e a‘u; o a‘u lava o Ieova o lē nofo i Siona.