Read Samoan Old Version Bible – O LE TUSI PAIA OPETAIA. 1 Bible Online

OPETAIA. 1 - Samoan Old Version Bible – O LE TUSI PAIA bible

OPETAIA. 1

¹O le faaaliga ia Opetaia. O loo faapea ona fetalai mai o le Alii o Ieova ia Etoma, Ua tatou faalogo i le tala mai ia Ieova, ua auina atu foi le sāvali i nuu ese, Tulai ia outou, ina tatou sii atu i ai le taua.

²Faauta, ua ou faia oe ia faatauvaa i nuu, ua matuā inosia lava oe.

³O le faamaualuga o lou loto ua faaseseina ai oe, o oe o loo nofo i ana o le papa; e maualuga le mea e nofo ai o ia; o le faapea i lona loto, O ai se na te lafo ia te au i lalo i le eleele?

⁴E ui lava ina maualuga le mea e te nofo ai pei o le aeto, ma e tuu lou ofaga i fetu, o loo fetalai mai Ieova, ou te lafo ia te oe i lalo i lea mea.

⁵Ana o atu ia te oe o gaoi, ana o atu o e fao mea i le po, (aue! ua faaumatia oe,) po ua latou le gaoi ea mea e tusa ia i latou? Ana o atu ia te oe o e tāu vine, po ua latou le faatotoe ea nai toe fuifui vine?

⁶E! ua suena lava Esau; ua sailia ana mea lilo.

⁷Ua molia oe i le tuaoi lava e tagata uma na outou fai ai mavaega, ua faa‘ole‘ole ia te oe, ua manumalo foi ia te oe tagata sa outou nofo lelei; o e na aai i au mea e ‘ai ua latou tuu le mailei i lalo ia te oe.

⁸E leai se mafaufau ia te ia. O loo fetalai mai Ieova, Ou te le faaumatia ea i lea aso tagata popoto i Etoma, ma ou faaumatia le mafaufau ai le mauga o Esau?

⁹Timanu e, e matatau ou tagata totoa, ina ia faaumatia tagata uma ai le mauga o Esau ina ua fasiotia.

¹⁰E matuā faamāina oe ona o lou saua i lou uso o Iakopo; e faaumatia foi oe e faavavau.

¹¹O le aso sa e tu ai e faafeagai, o le aso sa ave ai faatagataotaua ana ‘au e tagata ese, na ulu atu ai foi tagata ese i ona faitotoa, ma latou fai ai le vili e Ierusalema, sa i ai lava oe faapei o so latou.

¹²A ua le tatau ina ua e maimoa i le aso o lou uso, o le aso o lona puapuaga; ua le tatau foi ina ua e faatuumana i le fanauga a Iuta i le aso na fano ai i latou; ua le tatau foi ina ua e tautala faasiasia i le aso o le puapuaga.

¹³Ua le tatau ina ua e ulu atu i le faitotoa o lo‘u nuu i le aso o lo latou malaia; ua le tatau ina ua e maimoa, o oe lava, i lo latou tiga i le aso o lo latou malaia; ua le tatau foi ina ua e tago i o latou oloa i le aso o lo latou malaia.

¹⁴Ua le tatau foi ina ua e tu i le mafegāala e fasioti ai ona tagata na sao; ua le tatau foi ina ua e tuuina atu i nuu ese ona tagata na totoe i le aso o le puapuaga.

¹⁵Auā e latalata le aso o Ieova i nuu uma; e faia ia te oe e pei ona e faia; e toe iu atu ia te oe mea na e faia.

¹⁶Auā e pei ona outou feinu i luga o lo‘u mauga paia, e faapea ona feinu pea lava nuu uma, latou te feinu lava ia inu tele, e avea i latou e peiseai ua leai lava i latou.

¹⁷A e peitai e i ai i le mauga o Siona e ua sao, e paia foi ia; o le aiga foi o Iakopo e fai mo i latou lava o a latou lava mea.

¹⁸E fai foi le aiga o Iakopo ma afi, e fai foi le aiga o Iosefa ma afi mumū, a e fai le aiga o Esau ma tagutugutu o saito; latou te faamu foi ia te i latou, ma faauma ia te i latou; e leai foi sē toe i le aiga o Esau; auā ua fetalai mai ai Ieova.

¹⁹O i latou foi o i le itu i toga e fai mo i latou le mauga o Esau; o i latou foi o i le itu maulalo e fai mo i latou le nuu o Filisitia; e fai foi mo i latou le laueleele o Efaraima, ma le laueleele o Samaria; e fai foi Kiliata mo Peniamina.

²⁰O le tafeaga foi o lenei itu taua a le fanauga a Isaraelu e ua i sa Kananā e oo i Sarefata o le tafeaga foi o Ierusalema o i Sefarata, e fai mo i latou o aai o i le itu i toga.

²¹E o ae foi faaola i le mauga o Siona, ina ia faasalaina le mauga o Esau; e fai foi le malo mo Ieova.