Read Samoan Old Version Bible – O LE TUSI PAIA IONA, 3 Bible Online

IONA, 3 - Samoan Old Version Bible – O LE TUSI PAIA bible

IONA, 3

¹Ona oo mai lea o le afioga a Ieova ia Iona, o le foi faalua mai lea, ua faapea mai,

²Ina tulai ia, ina alu i Nineva le aai tele, ma tala‘i atu i ai le tala‘iga ou te fai atu ai ia te oe.

³Ona tulai ai lea o Iona, ua alu i Nineva, e faapei ona fetalai mai o Ieova. O le aai matuā tele lava Nineva, e tusa ma le savaliga o aso e tolu.

⁴Ua amata ona ulu atu o Iona i le aai, o le savaliga o le aso e tasi, na alaga foi o ia, ua faapea atu, E toe fagafulu po ona faaumatia lea o Nineva.

⁵Ona talitonu ai lea o tagata o Nineva i le Atua, ua tala‘i atu foi e i latou la latou anapogi, ua latou oofu foi i le ie talatala, o alii atoa ma tagatānuu.

⁶Auā ua oo le tala i le tupu o Nineva, ona tulai ai lea o ia i lona nofoālii, ma tuu ese ia te ia lona ofu tele, ona ufutia lea o ia e ia i le ie talatala, ma nofo i le lefulefu.

⁷Ua ia tala‘i atu, ma faailo atu i Nineva i le pule a le tupu ma alii sa ia te ia, ua faapea atu, Aua ne‘i ‘ai sina mea e tagata, po o manu, po o lafu povi, po o lafu mamoe; aua lava ne‘i latou aai, aua foi latou te inu vai;

⁸a ia ufitia lava tagata ma manu i ie talatala, ma ia latou matuā alalaga atu i le Atua; ia latou taitasi foi ma liliu mai i lana amioga leaga, ma le faasaua ua i o latou lima.

⁹O ai se na te iloa, atonu e liliu mai le Atua, ma salamo, ma liliu ese i lona toasa mamafa, ina ia le fano ai i tatou.

¹⁰Ua silafia e le Atua a latou galuega, ina ua liliu ese i latou i lo latou ala leaga; ona salamo ai lea o le Atua i le malaia na ia fetalaia mai na te faia ia te i latou; e lei faia.