Read Samoan Old Version Bible – O LE TUSI PAIA NUMERA 1 Bible Online

NUMERA 1 - Samoan Old Version Bible – O LE TUSI PAIA bible

NUMERA 1

¹Ua fetalai mai Ieova ia Mose i le vao o Sinai, i le fale fetafai o le faapotopotoga, i le uluai aso o le masina e lua i le tausaga e lua talu ona latou o mai nai le nuu o Aikupito, ua faapea mai,

²Faitau mai ia le aofai o le faapotopotoga uma o le fanauga a Isaraelu, o latou itu aiga, o aiga o latou tamā, o le aofai o igoa, o tane uma taitoatasi;

³e afua mai i e ua luafulu o latou tausaga atoa ma e ua matutua ai, atoa uma o Isaraelu e mafai ona ō i le taua; o oe ma Arona lua te faitaulia i latou i a latou ‘au.

⁴E ia te oulua foi ni tagata, e taitasi itu aiga ma lona tagata; o matai i latou o aiga o latou tamā.

⁵O igoa foi nei o tagata e faatasi ma oulua; o Elisura o le atalii o Seturo, o lo sa Reupenā ia.

⁶O Selumielu o le atalii o Surisatai, o lo sa Simeonā ia.

⁷O Naasona o le atalii o Aminatapu, o lo sa Iutā ia.

⁸O Natanielu o le atalii o Suaro, o lo sa Isakarā ia.

⁹O Eliapo o le atalii o Holona, o lo sa Sepulonā ia.

¹⁰O le fanauga a Iosefa; o Elisama o le atalii o Ameuta, o lo sa Efaraimā ia; o Kamalielu o le atalii o Petasura, o lo sa Manasē ia.

¹¹O Apitano o le atalii o Kitione, o lo sa Peniaminā ia.

¹²O Aisera o le atalii o Amisatai, o lo sa Tanū ia.

¹³O Pagielu o le atalii o Okirano, o lo sa Aserā ia.

¹⁴O Eliasafo o le atalii o Tuelu, o lo sa Katō ia.

¹⁵O Akira o le atalii o Enano, o lo sa Nafatalī ia.

¹⁶O i latou ia sa ta‘ua i le faapotopotoga, o alii sili o itu aiga o latou tamā, o matai ia o afe o Isaraelu.

¹⁷Ona ave ai lea e Mose ma Arona ia tagata ua ta‘ua o latou igoa,

¹⁸ma latou faapotopotoina faatasi le faapotopotoga uma lava i le uluai aso o le masina e lua, ona latou talatalaina atu ai lea o latou tupuga i o latou itu aiga, i aiga o latou tamā, o le aofai o igoa taitoatasi, e afua mai i e ua luafulu o latou tausaga atoa ma e ua matutua ai.

¹⁹E pei ona poloai mai o Ieova ia Mose, e faapea ona faitaulia e ia o i latou i le vao o Sinai.

²⁰O le fanauga a Reupena o le ulumatua a Isaraelu, o latou gafa i o latou itu aiga i aiga o latou tamā, o le aofai o igoa, o tane uma lava e taitoatasi, e afua mai i e ua luafulu o latou tausaga atoa ma e ua matutua ai, o i latou uma lava e mafai ona ō i le taua;

²¹o i latou na faitaulia i le itu aiga o Reupena, e fa sefulu o afe ma afe e ono ma le lima o selau.

²²O le fanauga a Simeona, o latou gafa i o latou itu aiga i aiga o latou tamā, o i latou na faitaulia, o le aofai o igoa o tane uma lava e taitoatasi, e afua mai i e ua luafulu o latou tausaga atoa ma e ua matutua ai, o i latou uma lava e mafai ona ō i le taua;

²³o i latou na faitaulia i le itu aiga o Simeona, e lima sefulu o afe ma afe e iva ma le tolu o selau.

²⁴O le fanauga a Kato, o latou gafa i o latou itu aiga i aiga o latou tamā, o le aofai o igoa, e afua mai i e ua luafulu o latou tausaga atoa ma e ua matutua ai, o i latou uma lava e mafai ona ō i le taua;

²⁵o i latou na faitaulia i le itu aiga o Kato, e fa sefulu o afe ma afe e lima ma le ono o selau ma le lima o sefulu.

²⁶O le fanauga a Iuta, o latou gafa i o latou itu aiga i aiga o latou tamā, o le aofai o igoa, e afua mai i e ua luafulu o latou tausaga atoa ma e ua matutua ai, o i latou uma lava e mafai ona ō i le taua;

²⁷o i latou na faitaulia i le itu aiga o Iuta, e fitu sefulu o afe ma afe e fa ma le ono o selau.

²⁸O le fanauga a Isakara, o latou gafa i o latou itu aiga i aiga o latou tamā, o le aofai o igoa, e afua mai i e ua luafulu o latou tausaga atoa ma e ua matutua ai, o i latou uma lava e mafai ona ō i le taua;

²⁹o i latou na faitaulia i le itu aiga o Isakara, e lima sefulu o afe ma afe e fa ma le fa o selau.

³⁰O le fanauga a Sepulona, o latou gafa i o latou itu aiga i aiga o latou tamā, o le aofai o igoa, e afua mai i e ua luafulu o latou tausaga atoa ma e ua matutua ai, o i latou uma lava e mafai ona ō i le taua;

³¹o i latou na faitaulia i le itu aiga o Sepulona, e lima sefulu o afe ma afe e fitu ma le fa o selau.

³²O le fanauga a Iosefa; o le fanauga a Efaraima, o latou gafa i o latou itu aiga i aiga o latou tamā, o le aofai o igoa, e afua mai i e ua luafulu o latou tausaga atoa ma e ua matutua ai, o i latou uma lava e mafai ona ō i le taua;

³³o i latou na faitaulia i le itu aiga o Efaraima, e fa sefulu o afe ma le lima o selau.

³⁴O le fanauga a Manase, o latou gafa i o latou itu aiga i aiga o latou tamā, o le aofai o igoa, e afua mai i e ua luafulu o latou tausaga atoa ma e ua matutua ai, o i latou uma lava e mafai ona ō i le taua;

³⁵o i latou na faitaulia i le itu aiga o Manase, e tolu sefulu o afe ma afe e lua ma le lua o selau.

³⁶O le fanauga a Peniamina, o latou gafa i o latou itu aiga i aiga o latou tamā, o le aofai o igoa, e afua mai i e ua luafulu o latou tausaga atoa ma e ua matutua ai, o i latou uma lava e mafai ona ō i le taua;

³⁷o i latou na faitaulia i le itu aiga o Peniamina, e tolu sefulu o afe ma afe e lima ma le fa o selau.

³⁸O le fanauga a Tanu, o latou gafa i o latou itu aiga i aiga o latou tamā, o le aofai o igoa, e afua mai i e ua luafulu o latou tausaga atoa ma e ua matutua ai, o i latou uma lava e mafai ona ō i le taua;

³⁹o i latou na faitaulia i le itu aiga o Tanu, e ono sefulu o afe ma afe e lua ma le titu o selau.

⁴⁰O le fanauga a Asera, o latou gafa i o latou itu aiga i aiga o latou tamā, o le aofai o igoa, e afua mai i e ua luafulu o latou tausaga atoa ma e ua matutua ai, o i latou uma lava e mafai ona ō i le taua;

⁴¹o i latou na faitaulia i le itu aiga o Asera e fa sefulu o afe ma le afe e tasi ma le lima o selau.

⁴²O le fanauga a Nafatali, o latou gafa i o latou itu aiga i aiga o latou tamā, o le aofai o igoa, e afua mai i e ua luafulu o latou tausaga atoa ma e ua matutua ai, o i latou uma lava e mafai ona ō i le taua;

⁴³o i latou na faitaulia i le itu aiga o Nafatali, e lima sefulu o afe ma afe e tolu ma le fa o selau.

⁴⁴O i latou lava ia na faitaulia, na faitaulia e Mose ma Arona ma alii sili o Isaraelu, o alii e toasefulu ma le toalua; e taitasi mo le aiga o ona tamā.

⁴⁵O i latou uma o le fanauga a Isaraelu e na faitaulia, i aiga o latou tamā, e afua mai i e ua luafulu o latou tausaga atoa ma e ua matutua ai, o i latou uma o Isaraelu e mafai ona ō i le taua;

⁴⁶o i latou uma lava na faitaulia, e ono selau o afe ma afe e tolu ma le lima o selau ma le lima o sefulu.

⁴⁷A o sa Levī i le itu aiga o latou tamā e lei faitaulia faatasi ma i latou.

⁴⁸Auā na fetalai mai Ieova ia Mose, ua faapea mai,

⁴⁹Tau lava o le itu aiga o Levi aua e te faitaulia, aua foi e te faitau aofai i latou faatasi ma le fanauga a Isaraelu;

⁵⁰a ia e tofia sa Levī e pule i le malumalu ua i ai le tulafono, ma ona ipu uma, ma ana mea uma; latou te tauave le malumalu ma ona ipu uma; ma latou auauna i ai; latou te to lauapi foi faataaliolio i le malumalu.

⁵¹Pe a ave le malumalu, e talaina lava e sa Levī; pe a to foi le malumalu, e faatuina lava e sa Levī; a o le tagata ese e faalatalata i ai e fasiotia lava ia.

⁵²E to lauapi le fanauga a Isaraelu, o le tagata ma le toagālauapi o lona itu aiga, o le tagata foi i le mea e i ai lo latou tagavai, i a latou ‘au.

⁵³A o sa Levī, latou te to lauapi faataaliolio i le malumalu ua i ai le tulafono, ina ne‘i oo le toasa i le faapotopotoga o le fanauga a Isaraelu; e tausi foi e sa Levī sauniga o le malumalu ua i ai le tulafono.

⁵⁴Ua faia lava e le fanauga a Isaraelu e tusa ma mea uma na poloai mai ai Ieova ia Mose, ua faapea lava ona latou faia.