Read Samoan Old Version Bible – O LE TUSI PAIA NUMERA 10 Bible Online

NUMERA 10 - Samoan Old Version Bible – O LE TUSI PAIA bible

NUMERA 10

¹Ua fetalai mai foi Ieova ia Mose, na faapea mai, Ia e faia ni pu ario se lua, ia togitogi faamamanuina;

²o ia pu foi e te tala‘i atu ai faapotopotoga ma malaga a toagālauapi.

³Pe a ilia uma le lua, ona faapotopoto mai ai lea o le faapotopotoga uma lava ia te oe i le faitotoa o le fale fetafai o le faapotopotoga.

⁴A e afai ua latou ilia na o le pu e tasi, ona potopoto mai ai lea o alii sili ia te oe, o matai o afe o Isaraelu.

⁵Pe a outou ilia le leo faatetetete, ona o malaga ai lea o le toagālauapi o i le itu i sasae.

⁶Pe a outou ilia faalua i le leo faatetetete ona o malaga ai lea o le toagālauapi o i le itu i toga; latou te ilia le leo faatetetete pe a latou o malaga.

⁷Peitai a faapotopotoina le faapotopotoga, tou te ili, a e aua le ilia le leo faatetetete.

⁸O atalii o Arona o ositaulaga la te ilia pu; e fai foi lenei ma tulafono ia te outou i a outou tupulaga a le tu a le tu lava.

⁹Afai foi tou te o e tau i lo outou laueleele ma e fai outou ma fili, o e saua mai ia te outou, ona outou ili ai lea o pu i le leo faatetetete; ona manatua ai lea o outou i luma o Ieova lo outou Atua, e faaolaina foi outou ai e ua ita mai ia te outou.

¹⁰O le aso foi tou te fiafia ai, ma aso o outou tausamiga, ma amataga o outou masina, tou te ili ai pu i luga o a outou taulaga mu ma luga o a outou taulaga faafetai; e fai foi lea ia te outou ma faamanatuga i luma o lo outou Atua; o a‘u lava o Ieova lo outou Atua.

¹¹Ua oo i le aso e luafulu o le masina e lua, o le tausaga e lua, ona siitia ai lea o le ao ai luga o le malumalu ua i ai le tulafono.

¹²Ona o ai lea o le fanauga a Isaraelu i la latou malaga ai le vao o Sinai; ua nofo foi le ao i le vao o Parana.

¹³O la latou faatoa o malaga lea i le afioga a Ieova ia Mose.

¹⁴E muamua atu le tagavai o le toagālauapi o le fanauga a Iuta i a latou ‘au; o le na pule foi i ana ‘au, o Naasona lea o le atalii o Aminatapu.

¹⁵O le na pule foi i ‘au a le itu aiga o le fanauga a Isakara, o Natanielu lea o le atalii o Suaro.

¹⁶O le na pule foi i ‘au a le itu aiga o le fanauga a Sepulona, o Eliapo lea o le atalii o Holona.

¹⁷Ua tatalaina foi le malumalu, ona o ai lea o le fanauga a Keresoma ma le fanauga a Merari, ua latou ave le malumalu.

¹⁸Ona ave ai lea o le tagavai o le toagālauapi o Reupena i a latou ‘au; o le na pule foi i ana ‘au, o Elisura lea o le atalii o Seturo.

¹⁹O le na pule foi i ‘au a le itu aiga o le fanauga a Simeona, o Selumielu lea o le atalii o Surisatai.

²⁰O le na pule foi i ‘au a le itu aiga o le fanauga a Kato, o Eliasafo lea o le atalii o Tuelu.

²¹Ona o ai lea o sa Koatō, ua latou ave mea paia; a ua uma ona faatuina o le malumalu e i latou na muamua ina ua latou oo atu.

²²Ona ave ai lea o le tagavai o le toagālauapi o le fanauga a Efaraima i a latou ‘au; o le na pule foi i ana ‘au, o Elisama lea o le atalii o Ameuta.

²³O le na pule foi i ‘au a le itu aiga o le fanauga a Manase, o Kamalielu lea o le atalii o Petasura.

²⁴O le na pule foi i ‘au a le itu aiga o le fanauga a Peniamina, o Apitano lea o le atalii o Kitione.

²⁵Ona ave ai lea o le tagavai o le toagālauapi o le fanauga a Tanu, e muli‘au lava lea i toagalauapi uma, i a latou ‘au; o le na pule foi i ana ‘au, o Aisera lea o le atalii o Amisatai.

²⁶O le na pule foi i ‘au a le itu aiga o le fanauga a Asera, o Pagielu lea o le atalii o Okirano.

²⁷O le na pule foi i ‘au a le itu aiga o le fanauga a Nafatali, o Akira lea o le atalii o Enano.

²⁸Ua faapea malaga a le fanauga a Isaraelu i a latou ‘au ina o latou o malaga.

²⁹Ua fai ane Mose ia Opapo le atalii o Reuelu o le Mitiana, o le tamā o le avā a Mose, O loo o nei i matou i le mea na fetalai mai ai Ieova, Ou te foaiina atu ai ia te outou; ina tatou o ia ma oe, matou te agalelei ia te oe, auā ua folafola mai e Ieova mea lelei ia Isaraelu.

³⁰A ua tali mai o ia ia te ia, Ou te le alu; a e ou te alu i lo‘u lava nuu ma lo‘u aiga.

³¹Ona fai atu ai lea o ia, Ou te aioi atu lava, aua e te tuua i matou, auā ua e iloa mea matou te to lauapi ai i le vao, e fai foi oe mo matou mata.

³²Afai foi tatou te o ma oe, ona matou agalelei ai lea ia te oe i mea lelei uma e agalelei mai ai Ieova ia te i matou.

³³Ona latou o malaga ai lea ai le mauga o Ieova, ua po tolu la latou malaga; o ia po foi e tolu na muamua atu ai ia te i latou i le malaga o le atolaau o le feagaiga a Ieova, e sailiili se mapusaga mo i latou.

³⁴Sa i luga ia te i latou i lea aso ma lea aso le ao mai ia Ieova, ina o latou o atu nai le toagālauapi.

³⁵A ave le atolaau, ona fai ane ai lea o Mose, Ieova e, ina tulai ia oe, ma ia faataapeapeina o e fai oe mo latou fili; ia sosola foi i ou luma o e ita ia te oe.

³⁶A tuu i lalo ona fai ane ai lea o ia, Ieova e, ina foi mai ia i manomano o Isaraelu.