Read Samoan Old Version Bible – O LE TUSI PAIA NUMERA 13 Bible Online

NUMERA 13 - Samoan Old Version Bible – O LE TUSI PAIA bible

NUMERA 13

¹Ua fetalai mai foi Ieova ia Mose, ua faapea mai, Ia e aauina atu tagata,

²latou te asiasi le nuu o Kanana ou te foaiina i le fanauga a Isaraelu, e taitoatasi le tagata i itu aiga o latou tamā ia e aauina atu ai, o alii uma i latou ia te i latou.

³Ona aauina atu ai lea o i latou e Mose ai le vao o Parana e tusa ma le afioga a Ieova; o ia tagata uma lava o matai i latou o le fanauga a Isaraelu.

⁴O latou igoa foi nei; o Samua o le atalii o Sakuro, o lo le itu aiga o Reupena ia.

⁵O Safata o le atalii o Hori, o lo le itu aiga o Simeona ia.

⁶O Kalepo o le atalii o Iefune, o lo le itu aiga o Iuta ia.

⁷O Ikalo o le atalii o Iosefa, o lo le itu aiga o Isakara ia.

⁸O Hosea le atalii o Nuno, o lo le itu aiga o Efaraima ia.

⁹O Paleti o le atalii o Rafo, o lo le itu aiga o Peniamina ia.

¹⁰O Katieli o le atalii o Soti, o lo le itu aiga o Sepulona ia.

¹¹O lo le itu aiga o Iosefa; o Kati o le atalii o Suse, o lo le itu aiga o Manase ia.

¹²O Amueli o le atalii o Kameli, o lo le itu aiga o Tanu ia.

¹³O Seturi o le atalii o Mekaeli, o lo le itu aiga o Asera ia.

¹⁴O Naepi o le atalii o Vapese, o lo le itu aiga o Nafatali ia.

¹⁵O Keueli o le atalii o Maki, o lo le itu aiga o Kato ia.

¹⁶O igoa ia o tagata na aauina e Mose e asiasi le nuu. Ua faaigoa foi e Mose ia Hosea le atalii o Nuno o Iosua.

¹⁷Ua aauina atu i latou e Mose e asiasi le nuu o Kanana, ua fai atu foi ia te i latou, Ina o ae ia outou i lenei ala i le itu i toga, ma o ae i le mauga;

¹⁸ia outou matamata i le laueleele pe faapefea ia, ma tagata e nonofo ai, pe malolosi i latou pe vaivai, pe toaitiiti i latou pe toatele;

¹⁹pe faapefea foi le laueleele ua latou nonofo ai, pe lelei pe leaga, pe faapefea foi aai ua latou nonofo ai, pe nonofo faatoagālauapi, pe nofo ‘olo;

²⁰pe faapefea foi le laueleele, pe lafulemu pe lafua; pe i ai ni laau pe leai; ina faalototetele ia outou, ia outou au mai foi ni fua o le fanua. (O ona po foi ia o vine e muai matutua.)

²¹Ona latou o ae ai lea, ma latou matamata i le nuu, e amata i le vao o Tisina e oo i Reopa e ui ai i Amato.

²²Ua latou o ae i le itu i toga, ma latou oo atu i Heperona, sa i ai o Aimano, ma Sesai, ma Talemai, o le fanau i latou a Anaki. (Na faia Heperona e muamua i Soana i Aikupito, e fitu lava tausaga na va a‘i i laua.)

²³Ua oo foi i latou i le alia o Esekolo, ona latou sala ai lea o le la o le vine ma le fuifui vine e tasi, ua tausoa e le toalua i le amo, ua au mai foi e i latou ni rimoni ma ni mati.

²⁴Na faaigoa foi lena mea o le alia o Esekolo, ona o le fuifui vine na sala mai ai e le fanauga a Isaraelu.

²⁵Ua mavae po e fagafulu, ona foi mai ai lea o i latou i le asiasiga o le nuu.

²⁶Ua latou toe o mai ia Mose, ma Arona, ma le faapotopotoga uma alva o le fanauga a Isaraelu i le vao o Parana, i Katesa; ua latou au mai la latou tala ia te i latou ma le faapotopotoga uma, ua latou faaali mai foi ia te i latou o fua o le fanua.

²⁷Ua latou talatala mai foi ia te ia, ua faapea mai, Na matou oo atu i le nuu na e aauina i ai i matou, e moni foi ua tafe ai le suāsusu ma le meli, o ona fua foi nei.

²⁸A e peitai ane e malolosi lava tagata o nonofo i le nuu, o aai foi e nofo ‘olo e matuā tetele lava; i le ma lea foi na matou iloa ai le fanau a Anaki.

²⁹O loo nonofo Amaleka i le nuu i le itu i toga; o sa Hetī foi, ma sa Iepusē, ma sa Amorī, o loo nonofo i latou i mauga; o sa Kananā foi o loo nonofo i latou e lata ane i le sami atoa ma le itu e i ai Ioritana.

³⁰Ona vavao ai lea e Kalepo i le nuu ia filemu i luma o Mose, ua faapea atu, Se‘i tatou matuā o ae lava i ai, ma fai ai mo i tatou; auā e mafai lava ona tatou manumalo ai.

³¹Ona fai ane ai lea o ia tagata na o ae ma ia, Tatou te le mafaia ona o ae e tau ma lena nuu; auā e sili lo latou malosi i lo tatou.

³²Ua latou fai tala leaga mai foi i le fanauga a Isaraelu i le nuu na latou asiasi i ai, ua faapea mai, O le nuu na matou o atu i ai e asiasi i ai, o le nuu lava lea e faaumatia e o nonofo ai; o tagata uma foi na matou iloa ai o tagata tino eese lava i latou.

³³Na matou iloa ai foi tagata maualuluga, o atalii o Anaki, na tutupu mai i tagata maualuluga; e pei ni sē lava i matou i o matou manatu, sa faapea foi i matou i o latou manatu.