Read Samoan Old Version Bible – O LE TUSI PAIA NUMERA 14 Bible Online

NUMERA 14 - Samoan Old Version Bible – O LE TUSI PAIA bible

NUMERA 14

¹Ona alalaga ai lea o le faapotopotoga uma, ua fetagisi foi le nuu i lea po.

²Ua muimui foi le fanauga a Isaraelu uma lava ia Mose ma Arona, ua fai mai foi le faapotopotoga uma ia te i laua, E! ana matou oti i le nuu o Aikupito, E! Ana matou oti i lenei vao.

³Se a ea le mea ua au mai ai Ieova ia te i matou i lenei nuu ia oti i le pelu, e avea foi o matou fafine ma o matou tama iti o tagata o tana? E le lelei ea ona matou toe foi atu i Aikupito?

⁴Ona latou fetautalatalai ai lea, Se‘i tatou tofia so tatou ta‘ita‘i, ma tatou foi atu i Aikupito.

⁵Ona faapanufao ai lea o Mose ma Arona i luma o tagata uma o le faapotopotoga o le fanauga a Isaraelu.

⁶O Iosua foi le atalii o Nuno, ma Kalepo le atalii o Iefune, o i laua sa i le asiasiga o le nuu, ua la saeia o la ofu;

⁷ua la fai ane foi i le faapotopotoga uma o le fanauga a Isaraelu, ua faapea atu, O le nuu na matou ui ai e asiasi ai, o le nuu e matuā lelei tasi lava ia.

⁸Afai e finagalo alofa mai Ieova ia te i tatou, na te faaootia lava i tatou i lena nuu, ma foai mai ai ia te i tatou; o le nuu lava ua tafe ai le suāsusu ma le meli.

⁹A e aua lava ne‘i outou fouvale ia Ieova, aua foi tou te matatau i tagata o le nuu, auā e faia lava i latou ma mea e ‘ai mā tatou; ua mavae lo latou mamalu ia te i latou, a o loo ia te i tatou Ieova; aua tou te matatau ia te i latou.

¹⁰A ua fai ane le faapotopotoga uma e fetogi ia te i laua i maa. Ona faaali mai ai lea o le pupula o Ieova i le fale fetafai o le faapotopotoga i luma o le fanauga a Isaraelu uma lava.

¹¹Ona fetalai mai ai lea o Ieova ia Mose, E ‘ino‘ino mai lenei nuu ia te au seia afea? E ui lava i faailoga uma ua ou faia ia te i latou, a e latou te le faatuatua lava ia te au seia afea?

¹²Ou te taia i latou i le faamai, ou te faaumatia foi i latou, ou te faia foi oe ma tupuga o le nuu e tele ma le malosi, e sili ia te i latou.

¹³Ona fai atu ai lea o Mose ia Ieova, E faalogo mai i ai o Aikupito, (auā na e aveina ae lenei nuu i lou mana nai ia te i latou;)

¹⁴latou te ta‘u atu ai foi i e o nonofo i le nuu nei; auā ua latou faalogo lava, o oe lava, Ieova e, o loo e afio i totonu o lenei nuu, o oe foi Ieova o loo iloa oe ua faafeagai lava; o le ao foi mai ia te oe o loo tu i o latou luga, o loo e afio foi i luma ia te i latou i le ao faaniutu ina o ao, ma le afi faaniutu ina o po.

¹⁵O lenei, afai e te fasiotia lenei nuu, e pei o se tagata e toatasi, ona tautala ane ai lea o nuu ese o e ua iloa le logo ia te oe, e faapea ane,

¹⁶E le mafaia e Ieova ona faaoo lenei nuu i le nuu na tauto ai o ia ia te i latou, o le mea lava lea ua na fasia ai i latou i le vao.

¹⁷O lenei, ou te aioi atu ia te oe, ia tele le mamana o lo‘u Alii, e pei ona e fetalai mai ai, ua faapea,

¹⁸O Ieova e telegese lona toasa, e tele foi le alofa, e faamagalo atu i le agasala ma le solitulafono, a e le faasaoina lava ē agasala, e tauia e ia le agasala a mātua i le fanau e oo i le tolu ma le fa o tupulaga.

¹⁹Ou te aioi atu lava, ia e faamagalo le agasala a lenei nuu, ia tusa ma le tele o lou alofa, e pei ona e faamagaloina atu foi i lenei nuu talu ona o mai i Aikupito ua oo lava i ona po nei.

²⁰Ona fetalai mai ai lea o Ieova, Ua ou faamagaloina atu e tusa ma lau upu;

²¹a e peitai, o loo ola a‘u, e faatumuina lava le lalolagi uma lava i le mamalu o Ieova;

²²auā o na tagata uma o e na iloa lo‘u mamalu ma o‘u faailoga na ou faia i Aikupito ma le vao, ma ua tofotofo faasefulu lava ia te au, ma latou le faalogo i lo‘u leo;

²³latou te le iloa lava le nuu na ou tauto ai i o latou tamā, e leai lava so latou o e ‘ino‘ino mai ia te au e vaai i ai.

²⁴A o la‘u auauna o Kalepo, ona ua ia te ia le loto e ese i o latoū, ua na matuā mulimuli mai lava ia te au, o le mea lea ou te faaoo ai ia te ia i le nuu na ia alu atu i ai, e fai foi lea mo lana fanau.

²⁵(Sa nonofo sa Amalekā ma sa Kananā i le vanu.) A taeao ia outou liliu ane, ma o atu i le vao, i le ala i le sami Ulaula.

²⁶Ua fetalai mai foi Ieova ia Mose ma Arona, ua faapea mai,

²⁷Ou te faapalepale ea seia afea i lenei faapotopotoga leaga, o i latou lava o e muimui mai ia te au? Ua ou lagona lava i muimuiga a le fanauga a Isaraelu ua latou muimui mai ai ia te au.

²⁸Ia e fai atu ia te i latou, O loo fai mai Ieova, o loo ola a‘u, ou te faia lava ia te outou e pei o a outou upu ua oo mai i o‘u taliga;

²⁹e oti o outou tino i lenei lava vao; o outou uma lava na faitaulia, e tusa ma le faitau aofai o outou uma, e afua mai i e ua luafulu o latou tausaga atoa ma e ua matutua ai, o e na muimui mai ia te au;

³⁰tou te le oo atu lava i le nuu na ou tauto ai tou te nonofo ai, na o Kalepo le atalii o Iefune, ma Iosua le atalii o Nuno.

³¹A o outou tama iti na outou fai mai ai, E fai i latou ma tagata o taua, ou te faaoo ia te i latou, latou te iloa lava le nuu ua inosia e outou.

³²A o outou, e oti o outou tino i lenei lava vao.

³³O a outou fanau foi latou te feoai i le vao e fagafulu o tausaga, e tauave foi e i latou a outou mulilulua, seia faaumatia o outou tino i le vao.

³⁴E faatatau i le faitau o po na outou asiasi ai le nuu, e fagafulu o po, o le po e tasi o le faatatau lea o le tausaga e tasi, e fagafulu o tausaga lava tou te tauave ai o outou agasala, ona outou iloa ai lea o lo‘u lafoaiina o outou.

³⁵O a‘u lava o Ieova, ua ou fai atu, ou te matuā faia lava i lenei faapotopotoga leaga uma lava o e ua faapotopotoina e tetee mai ia te au; e faaumatia i latou i lenei lava vao, ma latou oti ai lava.

³⁶O tagata foi na aauina e Mose e asiasi i le nuu, ma latou toe foi mai, ma faatupuina le muimui o le faapotopotoga uma ia te ia i lo latou fai tala leaga i le nuu,

³⁷o ia lava tagata na fai tala leaga i le nuu, ua oti lava i latou i le mala i luma o Ieova.

³⁸A o Iosua le atalii o Nuno, ma Kalepo le atalii o Iefune na ola i laua ai ia tagata na ō e asiasi i le nuu.

³⁹Ua talatalaina atu e Mose ia upu i le fanauga a Isaraelu uma lava, ona matuā tele ai lea o le faanoanoa o le nuu.

⁴⁰Ona latou usuusu ai lea i le taeao, ma o ae i le tumutumu mauga, ua faapea ane, Faauta, o i matou nei, matou te o ae i le mea na fetalai mai ai Ieova; auā ua matou agasala.

⁴¹A ua fai atu Mose, Se a le mea tou te soli ai le afioga a Ieova? Ae le manuia lava lea mea.

⁴²Aua lava tou te o ae, auā e le o ia te outou Ieova; ina ne‘i fasia outou i luma o e fai outou ma fili.

⁴³Auā o i ai i o outou luma o sa Amalekā ma sa Kananā, e oti lava outou i le pelu; auā ua outou liliu ese ia Ieova, o le mea lea e le i ai Ieova ia te outou.

⁴⁴A na latou o faamaualuga i le tumutumu mauga; a o le atolaau o le feagaiga a Ieova ma Mose e lei te‘a ese ia ma le toagālauapi.

⁴⁵Ona o ifo ai lea o sa Amalekā ma sa Kananā o e na mau i lena mauga, ma latou fasia i latou, ma tutuli ia te i latou ua oo lava i Horema.