Read Samoan Old Version Bible – O LE TUSI PAIA NUMERA 16 Bible Online

NUMERA 16 - Samoan Old Version Bible – O LE TUSI PAIA bible

NUMERA 16

¹Ua ave ni tagata e Koru le atalii o Isara, o le atalii ia o Koato, o le atalii ia o Levi, o Tatano foi ma Apiramo o atalii o Eliapo, o Ono foi le atalii o Peleto, o le fanauga a Reupena ia;

²ma ua latou laga mai ia Mose, na faatasi foi ma i latou nisi tagata o le fanauga a Isaraelu e lua selau ma le limagafulu, o alii i latou o le faapotopotoga, e ta‘ua i le faapotopotoga, o tagata mamalu;

³ua latou faapotopotoina i latou ia Mose ma Arona, ma latou faapea atu ia te i laua, Ua oulua faamaualuga lava, auā ua paia le faapotopotoga uma lava, o loo ia te i latou foi o Ieova, o lenei, se a ea le mea ua oulua faasili ai oulua i le faapotopotoga a Ieova?

⁴Ua faalogo i ai Mose, ona faapaūfao ai lea o ia.

⁵Ua fai atu foi o ia ia Koru ma i latou uma na ‘au faatasi ma ia, ua faapea atu, A taeao e faailoa mai ai e Ieova po o ai ona tagata, po o ai foi ua paia; e faalatalataina foi e ia lea tagata ia te ia; o le ua filifilia e ia, na te faalatalataina o ia ia te ia.

⁶Ia outou faia lenei mea; ina au mai ia e outou o salefu, o Koru ma i latou uma o e ‘au faatasi ma ia; ma tuu i ai ni afi,

⁷ma avane i ai mea manogi i luma o Ieova a taeao; o le tagata foi e filifilia e Ieova e paia lava o ia; ua outou faamaualuga lava o outou na le fanauga a Levi.

⁸Ua fai atu foi Mose ia Koru, Ina faalogologo mai ia o outou na le fanauga a Levi;

⁹se mea itiiti ea ia te outou ina ua vavaeeseina outou e le Atua o Isaraelu i le faapotopotoga o Isaraelu ina ia faalatalataina outou ia te ia e auauna i le galuega o le malumalu o Ieova, e tutū foi i luma o le faapotopotoga e auauna ia te i latou?

¹⁰Ua na faalatalataina foi oe ia te ia atoa ma ou uso uma lava o le fanauga a Levi faatasi ma oe, a e tou te mananao ea atoa ma le faiva o le ositaulaga?

¹¹O le mea lava lena ua outou faapotopotoina ai, o oe ma i latou uma e ua ‘au faatasi ma oe, e tetee atu ia Ieova; a o Arona, o ai ea o ia tou te muimui ai ia te ia?

¹²Ona auina atu lea e Mose se tasi e valaau ia Tatano ma Apiramo o atalii o Eliapo; a ua la tali mai ai,

¹³Ma te le o atu lava; se mea itiiti ea ina ua e aveina ae i matou ai le nuu o loo tafe ai le suāsusu ma le meli, ina ia oti i matou ia te oe i le vao, a e matuā fai ea oe mo matou alii?

¹⁴I le ma lenei foi, ua e le faaootia i matou i le nuu o loo tafe ai le suāsusu ma le meli, ua e le foaiina mai foi ia te i matou ni fanua ma ni tovine e fai ma matou tofi; a ē sasali ea mata o nei tagata? Ma te le o atu lava.

¹⁵Ona ita tele lava lea o Mose, ua na fai atu foi ia Ieova, Aua e te silasila i a latou taulaga; ou te lei avea sa latou asini e tasi, ou te lei agaleaga atu foi i so latou e toatasi.

¹⁶Ua fai atu foi Mose ia Koru, Ina o mai ia i luma o Ieova a taeao, o oe ma i latou uma o e ‘au faatasi ma oe, o oe, ma i latou, atoa foi ma Arona.

¹⁷Ia taitasi foi le tagata ma au mai lana salefu, ma avane i ai ni mea manogi, ma ia outou au mai taitasi e le tagata lana salefu i luma o Ieova, e lua selau ma le lima sefulu o salefu; o oe foi ma Arona ia taitasi ma lana salefu.

¹⁸Ona latou au mai ai lea taitoatasi ma lana salefu, ma latou avane i ai ni afi, ma avane i ai mea manogi, ua latou tutū faatasi foi ma Mose ma Arona i le faitotoa o le fale fetafai o le faapotopotoga.

¹⁹Ona faapotopotoina ai lea e Koru o le faapotopotoga uma lava i le faitotoa o le fale fetafai o le faapotopotoga e tetee ia te i laua; ona faaali mai ai lea o le pupula o Ieova i le faapotopotoga uma lava.

²⁰Ona fetalai mai lea o Ieova ia Mose ma Arona, ua faapea mai,

²¹Ina vavae ese ia oulua i lenei faapotopotoga, seia ou faaumatia i latou e pei o se emo o le mata.

²²Ona faapauufao ai lea o i laua, ua faapea atu, Le Atua e, o le Atua o agaga o tagata uma, a agasala le tagata e toatasi, e te toasa mai ai ea i le faapotopotoga uma lava?

²³Ona fetalai mai ai lea o Ieova ia Mose, ua faapea mai,

²⁴Ia e fai atu i le faapotopotoga, ia faapea atu, Ina o ese atu ia outou i itu uma o fale ie o Koru, ma Tatano, ma Apiramo.

²⁵Ona tulai ai lea o Mose, ua alu atu ia Tatano ma Apiramo, ua mulimuli atu foi ia te ia toeaina o Isaraelu.

²⁶Ona fai atu ai lea o ia i le faapotopotoga, ua faapea atu, Ou te aioi atu, ia outou o ese i fale ie o ia tagata amio leaga, aua foi ne‘i papai atu i sina a latou mea, ina ne‘i fano outou i a latou agasala uma.

²⁷Ona o ese ai lea o i latou i itu uma o fale ie o Koru, ma Tatano, ma Apiramo; ona ulu fafo ai lea o Tatano ma Apiramo, ua tutū i faitotoa o laua fale ie, ma a la avā, ma o laua atalii, ma a la tama iti.

²⁸Ona fai atu ai lea o Mose, O le mea lava lenei tou te iloa ai na auina mai a‘u e Ieova e fai ia galuega uma, a e lei fai i lo‘u lava loto.

²⁹Afai e oti ia tagata e pei o le oti o tagata uma pe oo ia te i latou e pei ona oo i tagata uma, ona iloa lea ua le auina a‘u e Ieova.

³⁰A e afai e faia e Ieova le mea fou, ma faamaga le gutu o le eleele, ma folo ia te i latou, ma mea uma o loo ia te i latou, ma latou o ifo i seoli o ola lava, ona outou iloa ai lea ua ‘ino‘ino ia tagata ia Ieova.

³¹Ua uma ona fai atu e ia o ia upu uma, ona māvae ai lea o le eleele i lalo o i latou.

³²Ua faamaga le gutu o le eleele, ua folo ifo ia te i latou, ma o latou aiga, atoa ma tagata uma na ia Koru, ma a latou mea uma.

³³Ua o ifo i seoli i latou ma i latou uma e na ia i latou o ola lava, ona toe soo ane lea o le eleele i luga ia te i latou; ona fano ai lea o i latou ai le faapotopotoga.

³⁴Ona sosola ai lea i lo latou alalaga o Isaraelu uma sa vagavagai ia te i latou, auā na latou faapea ane, Ina ne‘i foloina i tatou e le eleele.

³⁵Ua oo atu foi le afi mai ia Ieova, ua faaumatia ai ia tagata e toalua selau ma le toalima sefulu o e na avatu mea manogi e mu.

³⁶Ona fetalai mai ai lea o Ieova ia Mose, ua faapea mai,

³⁷Ia e fai atu ia Eleasaro le atalii o Arona le ositaulaga na te aveina ae salefu ai totonu o le mu, ma ia e sasaa le afi i se mea mamao; auā e paia ia mea.

³⁸O salefu a ia tagata na agasala i o latou lava agaga ia fai a‘i mea salalafa lautetele e fai ma ufiufi o le fata faitaulaga; auā na latou aveina atu ai i luma o Ieova, o le mea lea ua paia ai lava ia mea; e fai foi ia mea ma faailoga i le fanauga a Isaraelu.

³⁹Ona ave ai lea e Eleasaro le faitaulaga o salefu ‘apa memea, na faitaulaga ai e na susunuina, ua faalauteleina ia e fai ma ufiufi o le fata faitaulaga.

⁴⁰O le faamanatuga lea i le fanauga a Isaraelu, ina ne‘i faalatalata atu se tagata ese, e le o le fanau a Arona, e mu ai mea manogi i luma o Ieova; ina ne‘i avea o ia pei o Koru ma e sa ‘au faatasi ma ia; e pei o le afioga a Ieova na fai atu e Mose ia te ia.

⁴¹O le taeao na muimui ai le faapotopotoga uma o le fanauga a Isaraelu ia Mose ma Arona, ua faapea mai, Ua fasiotia e oulua le nuu o Ieova.

⁴²Ua aofia mai le faapotopotoga e tetee ia Mose ma Arona, ona latou vaavaai atu ai lea i le fale fetafai o le faapotopotoga, faauta, ua ufitia i le ao, ua faaali mai ai foi le pupula o Ieova.

⁴³Ona o mai ai lea o Mose ma Arona i luma o le fale fetafai o le faapotopotoga.

⁴⁴Ona fetalai mai ai lea o Ieova ia Mose, ua faapea mai,

⁴⁵Ina o ese ia oulua i lenei faapotopotoga, seia ou faaumatia i latou e pei o se emo o le mata. Ona la faapauufao ai lea.

⁴⁶Ona fai atu ai lea o Mose ia Arona, Ia e tago i le salefu, ma avane i ai se afi ai le fata faitaulaga, ma avane i ai ni mea manogi, ma ia e vave alu i le faapotopotoga, ma fai se togiola mo i latou; auā ua alu atu le toasa mai ia Ieova; ua amataina le mala.

⁴⁷Ona tago ai lea e Arona e pei ona fai atu ai e Mose, ua tamo‘e lava ia i totonu o le faapotopotoga; faauta, ua amataina lava le mala i le nuu; ua ia avane foi mea manogi e mu, ma na fai ai le togiola mo le nuu.

⁴⁸Ua tu foi o ia i le va o e oti ma e ola; ona taofia ai lea o le mala.

⁴⁹O i latou foi ua oti i le mala, o afe e tasi le sefulu ma le fa ma le fitu o selau, e faaopoopoina i e ua oti i le mea a Koru.

⁵⁰Ona toe foi mai ai lea o Arona ia Mose i le faitotoa o le fale fetafai o le faapotopotoga; ua taofia foi le mala.