Read Samoan Old Version Bible – O LE TUSI PAIA NUMERA 19 Bible Online

NUMERA 19 - Samoan Old Version Bible – O LE TUSI PAIA bible

NUMERA 19

¹Ua fetalai mai foi Ieova ia Mose ma Arona, ua faapea mai,

²O le faatonuga lenei o le tulafono ua poloai mai ai Ieova, ua faapea mai, Ia e fai atu i le fanauga a Isaraelu ia latou au mai ia te oe se povi fafine efu, e sao ona lelei, e le o i ai se pona, e lei oo foi i ai se amo.

³Tou te tuuina atu ai ia Eleasaro le ositaulaga, na te ta‘ita‘iina i tua o le toagālauapi, ona fasia ai lea e se tasi i ona luma.

⁴E ave foi e Eleasaro le ositaulaga nisi ona toto i lona tamatamai lima, ma sausau faafitu nisi ona toto i luma lava o le fale fetafai o le faapotopotoga.

⁵E susunuina foi e se tasi i ona luma le povi fafine; o lona pa‘u, ma lona aano, ma lona toto, atoa foi ma lona otaota na te susunuina.

⁶E ave foi e le ositaulaga le laau o le arasi, ma le isopo, ma le ie mūmū, ma lafo i le sunuga o le povi fafine.

⁷Ona ta ai lea e le ositaulaga ona ofu, ma taele lona tino i le vai; mulimuli ane ona sau ai lea o ia i le toagālauapi; e leaga foi le ositaulaga seia oo i le afiafi.

⁸O le na te susunuina ai foi e ta e ia ona ofu i le vai, ma taele lona tino i le vai, e leaga foi o ia seia oo i le afiafi.

⁹E faaputuina foi e se tagata ua mamā o le lefulefu o le povi fafine, ma teu ai i se mea mamā i tua o le toagālauapi; e i ai foi ia e tausia mo le faapotopotoga o le fanauga a Isaraelu, e fai a‘i le vai mo e ua leaga; o le taulaga mo le agasala lea.

¹⁰O le na te faaputuina foi le lefulefu o le povi fafine, e ta e ia ona ofu, e leaga foi o ia seia oo i le afiafi; e fai foi lea ma tulafono e faavavau i le fanauga a Isaraelu, atoa foi ma le tagata ese e āumau ia te i latou.

¹¹O le pa‘i atu i le tino o se tasi lava tagata oti e leaga o ia i po e fitu.

¹²E faamamā o ia ia te ia i lea vai i le aso tolu, ona mamā ai lea o ia i le aso fitu; a e afai na te le faamamā ia te ia i le aso tolu ma le aso fitu, ona le mamā lea o ia.

¹³Ai se pa‘i atu i le tino o se tagata ua oti, a e le faamamā o ia ia te ia, e leaga ia te ia le malumalu o Ieova; e vavaeeseina foi lea lava tagata ia Isaraelu, auā e lei sausauina o ia i le vai mo e ua leaga, e leaga o ia; e i ai pea lona leaga ia te ia.

¹⁴O le tulafono lenei pe a oti se tagata i se fale ie; o i latou uma e ulu atu i le fale ie, ma i latou uma o i le fale ie, e leaga i latou i aso e fitu.

¹⁵O ipu uma foi e le ufitia, e leai ni ufi o fusi ai, e leaga ia.

¹⁶Ai se pa‘i atu i se tasi ua fasia i le pelu ua taatia i le vao, po o se tagata oti, po o se ivi o se tagata, po o se tuugamau, e leaga ia i po e fitu.

¹⁷Latou te au mai foi mo le tagata ua leaga nisi lefulefu o le povi fafine na sunua, o le taulaga mo le agasala, ma latou avane i ai se suāvaipuna i se ipu.

¹⁸Ona tago ai lea o se tagata ua mamā i le isopo, ma fufui i le vai, ma sausau ai le fale ie, ma mea uma, atoa ma tagata na i ai, ma le na pa‘i atu i se ivi, po o se na fasia, po o se ua oti, po o se tuugamau.

¹⁹E sausauina foi e le ua mamā le ua leaga i le aso tolu, atoa foi ma le aso fitu; ona faamamā ai lea o ia ia te ia i le aso fitu, ma ta ona ofu, ma taele i le vai, ona mamā ai lea o ia i le afiafi.

²⁰A o le tagata ua leaga, e le faamamā foi o ia ia te ia, e vavaeeseina lea tagata i le faapotopotoga, auā ua leaga ia te ia le malumalu o Ieova; e lei sausauina o ia i le vai mo e ua leaga; e leaga o ia.

²¹E fai foi lenei mea ma tulafono e faavavau ia te i latou, o le na te sausauina le vai mo e ua leaga, e ta e ia ona ofu, ma le na te pa‘i atu i le vai mo e ua leaga e leaga o ia seia oo i le afiafi.

²²O mea uma foi e pa‘i atu i ai le ua leaga, e leaga ia; o le na te pa‘i atu i ai foi e leaga o ia seia oo i le afiafi.