Read Samoan Old Version Bible – O LE TUSI PAIA NUMERA 33 Bible Online

NUMERA 33 - Samoan Old Version Bible – O LE TUSI PAIA bible

NUMERA 33

¹O savaliga ia a le fanauga a Isaraelu, e na o mai mai le nuu o Aikupito, i a latou ‘au i le pule a Mose ma Arona.

²Na tusia e Mose o mea na latou o mai ai i o latou savaliga e tusa ma le afioga a Ieova. O latou savaliga ia i mea na latou o mai ai.

³Na o mai i latou mai Ramese i le masina muamua, i le aso e sefulu ma le lima o le masina muamua; o le aso ua aupito mai i le paseka na o mai ai le fanauga a Isaraelu ma le lima malosi i luma o Aikupito uma.

⁴Auā na tatanu e Aikupito o ulumatua uma na fasiotia e Ieova ia te i latou na faasalaina foi e Ieova o latou atua.

⁵Na o mai le fanauga a Isaraelu mai Ramese, ma latou to lauapi i Sukota.

⁶Na latou o mai mai Sukota, ma latou to lauapi i Etama, o loo tupito i le vao.

⁷Na latou o mai mai Etama, ona toe foi atu lea i Peairota, ua fesagai ma Paalasefona, ma latou to lauapi i luma o Mekatala.

⁸Na latou o mai mai luma o Airota, ona latou ui atu lea i totonu o le sami i le vao, e tolu aso o la latou malaga i le vao o Etama, ona latou to lauapi ai lea i Mara.

⁹Na latou o mai mai Mara, ona oo mai ai lea o i latou i Ailima; ua i Ailima o vaipuna e sefulu ma le lua, ma pama e fitugafulu; ua latou to lauapi ai.

¹⁰Na latou o mai mai Ailima, ma latou to lauapi e latalata ane i le sami Ulaula.

¹¹Na latou o mai mai le sami Ulaula, ma latou to lauapi i le vao o Sina.

¹²Na latou o mai mai le vao o Sina, ma latou to lauapi i Tapeka.

¹³Na latou o mai mai Tapeka, ma latou to lauapi i Alusa.

¹⁴Na latou o mai mai Alusa, ma latou to lauapi i Refiti; sa leai se vai i lea mea e feinu ai le nuu.

¹⁵Na latou o mai mai Refiti, ma latou to lauapi i le vao o Sinai.

¹⁶Na latou o mai mai le vao o Sinai, ma latou to lauapi i Kiperota-atava.

¹⁷Na latou o mai mai Kiperota-atava, ma latou to lauapi i Haserota.

¹⁸Na latou o mai mai Haserota, ma latou to lauapi i Ritima.

¹⁹Na latou o mai mai Ritima, ma latou to lauapi i Rimoni-paresa.

²⁰Na latou o mai mai Rimoni-paresa, ma latou to lauapi i Lipena.

²¹Na latou o mai mai Lipena, ma latou to lauapi i Risa.

²²Na latou o mai mai Risa, ma latou to lauapi i Kailata.

²³Na latou o mai mai Kailata, ma latou to lauapi i le mauga o Sapera.

²⁴Na latou o mai mai le mauga o Sapera, ma latou to lauapi i Harata.

²⁵Na latou o mai mai Harata, ma latou to lauapi i Makelota.

²⁶Na latou o mai mai Makelota, ma latou to lauapi i Taata.

²⁷Na latou o mai mai Taata, ma latou to lauapi i Tara.

²⁸Na latou o mai mai Tara, ma latou to lauapi i Meteka.

²⁹Na latou o mai mai Meteka, ma latou to lauapi i Hasamoni.

³⁰Na latou o mai mai Hasamoni, ma latou to lauapi i Moserota.

³¹Na latou o mai mai Moserota, ma latou to lauapi i Peneakana.

³²Na latou o mai mai Peneakana, ma latou to lauapi i Horokikata.

³³Na latou o mai mai Horokikata, ma latou to lauapi i Iatepata.

³⁴Na latou o mai mai Iatepata, ma latou to lauapi i Aperona.

³⁵Na latou o mai mai Aperona, ma latou to lauapi i Esiokape.

³⁶Na latou o mai mai Esiokape, ma latou to lauapi i le vao o Tisina, o Katesa lea.

³⁷Na latou o mai mai Katesa, ma latou to lauapi i le mauga o Horo, i le pito nuu o Etoma.

³⁸Na alu ae Arona le ositaulaga i le mauga o Horo, e tusa ma le afioga a Ieova, ona oti ai lea o ia i lea mea i le tausaga e fagafulu talu ona o mai o le fanauga a Isaraelu ai le nuu o Aikupito, i le aso muamua o le masina e lima.

³⁹E tasi le selau ma le luafulu ma le tolu o tausaga o Arona ina ua oti o ia i le mauga o Horo.

⁴⁰Na faalogo le tupu o Arata, o le sa Kananā, o le na nofo i Kanana, i le itu i toga, ua o mai le fanauga a Isaraelu.

⁴¹Na latou o mai mai le mauga o Horo, ma latou to lauapi i Salemoni.

⁴²Na latou o mai mai Salemoni, ma latou to lauapi i Pinono.

⁴³Na latou o mai mai Pinono, ma latou to lauapi i Opoto.

⁴⁴Na latou o mai mai Opoto, ma latou to lauapi i Ieaperima, o i le tuaoi o Moapi.

⁴⁵Na latou o mai mai lima, ma latou to lauapi i Tipona-kato.

⁴⁶Na latou o mai mai Tipona-kato, ma latou to lauapi i Alemoni-tipelata.

⁴⁷Na latou o mai mai Alemoni-tipelata, ma latou to lauapi i mauga o Aperima, e feagai ma Nepo.

⁴⁸Na latou o mai mai mauga o Aperima, ma latou to lauapi i le eleele laugatasi o Moapi, e latalata ane i Ioritana e fesagai ma Ieriko.

⁴⁹Na to lauapi i latou e latalata ane i Ioritana, pau mai i Petesemota, pau mai i Apelasetima, i le eleele laugatasi o Moapi.

⁵⁰Ona fetalai mai lea o Ieova ia Mose i le eleele laugatasi o Moapi, e latalata ane i Ioritana, e fesagai ma Ieriko, ua faapea mai,

⁵¹Ia e fai atu i le fanauga a Isaraelu, ia faapea atu ia te i latou, A outou oo atu i lela itu o Ioritana i le nuu o Kanana,

⁵²ona outou tulia ai lea o e o nonofo i le nuu uma lava ai o outou luma, ia outou faaumatia a latou faatagata uma lava, ia faaumatia foi e outou a latou tupua uamea lava; o a latou mea maualuluga uma lava tou te matuā faaumatia.

⁵³Ia tulia e outou le nuu, ma outou nonofo ai; auā ua ou tuuina atu le nuu ia te outou e fai mo outou tofi.

⁵⁴Tou te tofitofi le nuu i le vili e fai ma tofi i o outou aiga; o e toatele ia outou avatu i ai le tofi ia tele; a o e toaitiiti, ia outou avatu i ai le tofi ia itiiti; o le mea e faasaga i ai le vili a le tagata e fai lea mona, e maua o outou tofi i itu aiga o outou tamā.

⁵⁵A e afai tou te le tulia i o outou luma o e o nonofo i le nuu, ona avea lea o i latou o e ua outou faatotoeina, ma mea matuitui i o outou mata, ma laau talatala i o outou itu, ma latou faatiga ia te outou i le nuu tou te nonofo ai.

⁵⁶E iu foi ina ou faia ia te outou e faapei ona ou manatu e fai ia te i latou.