Read Samoan Old Version Bible – O LE TUSI PAIA NUMERA 34 Bible Online

NUMERA 34 - Samoan Old Version Bible – O LE TUSI PAIA bible

NUMERA 34

¹Ua fetalai mai foi Ieova ia Mose, ua faapea mai,

²Ia e poloai atu i le fanauga a Isaraelu, ia faapea atu ia te i latou, A outou oo atu i le nuu o Kanana, o le nuu lava lea e maua e outou e fai mo outou tofi, o le nuu o Kanana ma ona itu;

³o lo outou itu i le itu i toga, e gata mai i le vao o Tisina i tafatafa o le tuaoi o Etoma, o lo outou tuaoi foi i le itu i toga o le pito sami oona lea i sasae.

⁴E afe ane foi lo outou tuaoi ai le itu i toga i le aega o Akarava, a e ui atu i Tisina; o lona alu atu ai le itu i toga e oo i Katesapanea, e alu atu foi i Hasaratara, a e ui atu i Asemoni.

⁵E afe ane foi le tuaoi ai Asemoni i le alia o Aikupito, o lona gataaga o le sami lea.

⁶O le tuaoi foi i sisifo, e fai mo o outou tuaoi le sami tele; o lo outou tuaoi lea i sisifo.

⁷O lenei foi lo outou tuaoi i le itu i matu; tou te fuafuatia mo outou ai le sami tele e oo atu i le mauga o Horo.

⁸Tou te fuafua foi ai le mauga o Horo e oo i le mea e ui atu ai i Amato; o le gataaga foi o le tuaoi e oo atu i Setata.

⁹E alu atu foi le tuaoi i Seferona, o lona gataaga foi e oo i Hasarenana; o lo outou tuaoi lea i le itu i matu.

¹⁰Tou te fuafua foi lo outou tuaoi i sasae mai Hasarenana e oo atu i Sefama.

¹¹E alu ifo foi le tuaoi mai Sefama e oo atu i Ripelu, i ona gagae o Aino; e alu ifo le tuaoi e oo atu lava i le itu i sasae o le vai o Kinereta.

¹²E alu ifo le tuaoi i Ioritana, o lona gataaga foi o le sami oona lea; o lo outou laueleele lea ma ona tuaoi e siosio a‘i.

¹³Ua fai atu Mose i le fanauga a Isaraelu, ua faapea atu, O le laueleele lava lea e fai ai mo outou tofi i le vili, na poloai mai ai Ieova e tuuina atu i itu aiga e iva ma le vaega o le tasi itu aiga.

¹⁴Auā ua maua lo latou tofi e le itu aiga o le fanauga a sa Reupenā e faatatau i le aiga o latou tamā, ma le itu aiga o le fanauga a sa Katō e faatatau i le aiga o latou tamā; atoa ma le vaega o le itu aiga o Manase, ua maua lava e i latou o latou tofi.

¹⁵Ua maua e itu aiga e lua ma le vaega o le tasi itu aiga o latou tofi i lenei itu i sasae o Ioritana, e fesagai ma Ieriko, i le mea e alu ae ai le la.

¹⁶Ua fetalai mai foi Ieova ia Mose, ua faapea mai,

¹⁷O igoa ia o tagata latou te totofi le laueleele mo outou, O Eleasaro le ositaulaga, ma Iosua le atalii o Nuno.

¹⁸Tou te ave foi alii sili ia taitasi i itu aiga e faasoa tofi i le laueleele.

¹⁹O igoa foi ia o tagata. O Kalepo le atalii o Iefune, o lo le itu aiga o Iuta ia.

²⁰O Semueli le atalii o Ameuta, o lo le itu aiga o le fanauga a Simeona ia.

²¹O Elitata le atalii o Kiselona, o lo le itu aiga o Peniamina ia.

²²O le alii sili o le itu aiga o le fanauga a Tanu, o Puki le atalii o Iakeli lea.

²³O le fanauga a Iosefa; o le alii sili o le itu aiga o le fanauga a Manase, o Hanieli le atalii o Efota lea.

²⁴O le alii sili o le itu aiga o le fanauga a Efaraima, o Kimueli le atalii o Sefatana lea.

²⁵O le alii sili o le itu aiga o le fanauga a Sepulona, o Elisafano le atalii o Parenaka lea.

²⁶O le alii sili o le itu aiga o le fanauga a Isakara, o Paletieli le atalii a Asani lea.

²⁷O le alii sili o le itu aiga o le fanauga a Asera, o Aiuta le atalii o Selomi lea.

²⁸O le alii sili o le itu aiga o le fanauga a Nafatali, o Petaeli le atalii o Ameuta lea.

²⁹O i latou ia na poloai mai ai Ieova ia latou faasoa tofi o le fanauga a Isaraelu i le nuu o Kanana.