Read Samoan Old Version Bible – O LE TUSI PAIA NUMERA 36 Bible Online

NUMERA 36 - Samoan Old Version Bible – O LE TUSI PAIA bible

NUMERA 36

¹O Matai sili o le aiga o le fanauga a Kiliata, le atalii o Makiro, le atalii ia o Manase, o aiga o atalii o Iosefa, ua latou o mai, ma fai mai i luma o Mose, ma luma o alii sili, o matai sili o le fanauga a Isaraelu,

²ua faapea mai i latou, Na poloai mai Ieova ia te oe, lo matou alii, ia tuuina atu le nuu i le vili i le fanauga a Isaraelu ia fai ma tofi; na poloaiina foi oe, lo matou alii, e Ieova ia tuuina atu le tofi o lo matou uso o Selofeata i ona afafine.

³Afai e nofo tane i latou i tagata o isi itu aiga o le fanauga a Isaraelu, ona vavaeeseina ai lea o lo latou tofi i tofi o matou tamā, ma faaopoopoina i le tofi o le itu aiga latou te i ai; e vavaeeseina ia i le fanua o lo matou tofi.

⁴A oo foi i le iupeli o le fanauga a Isaraelu, ona faaopoopoina ai lea o lo latou tofi i le tofi o le itu aiga latou te i ai; ona vavaeeseina ai lea o lo latou tofi i le tofi o le itu aiga o matou tamā.

⁵Ona fai atu ai lea o Mose i le fanauga a Isaraelu e tusa ma le afioga a Ieova, ua faapea atu, E tonu le upu a le itu aiga o le fanauga a Iosefa.

⁶O le mea lenei ua poloai mai ai Ieova i afafine o Selofeata, o loo faapea mai, Ia nofo tane i latou i e latou te loto i ai, a e tau lava o le aiga o le itu aiga o lo latou tamā latou te nofo tane ai.

⁷Ona le feaveaiina ai lea o tofi o le fanauga a Isaraelu i lea itu aiga ma lea itu aiga; auā o le fanauga a Isaraelu latou te taitasi ma nofo mau i le tofi o le itu aiga o lona tamā.

⁸Ai se fafine foi ua i ai se tofi i itu aiga o le fanauga a Isaraelu, e nofo tane o ia i se tasi o se aiga o le itu aiga o lona tamā, ina ia taitasi le fanauga a Isaraelu ma fai mona le tofi o lona tamā.

⁹E le feaveaiina foi le tofi i lea itu aiga ma lea itu aiga; a e taitasi le tagata o itu aiga o le fanauga a Isaraelu ma nofo mau i lona lava tofi.

¹⁰E pei ona poloai mai o Ieova ia Mose, sa faapea lava ona faia e afafine o Selofeata.

¹¹Auā o Maala, ma Tiresa, ma Hakelu, ma Meleka, ma Noa, o afafine o Selofeata, na latou nofo tane i atalii o uso o lo latou tamā.

¹²Ua latou nofo tane i aiga o le fanauga a Manase, le atalii o Iosefa; ona i ai pea lea o lo latou tofi i le itu aiga o le aiga o lo latou tamā.

¹³O poloaiga lava ia ma faamasinoga na poloai mai ai Ieova ia Mose i le fanauga a Isaraelu i le eleele laugatasi o Moapi, e latalata ane i Ioritana, e fesagai ma Ieriko.