Read Samoan Old Version Bible – O LE TUSI PAIA NUMERA 4 Bible Online

NUMERA 4 - Samoan Old Version Bible – O LE TUSI PAIA bible

NUMERA 4

¹Ua fetalai mai foi Ieova ia Mose ma Arona, ua faapea mai,

²Ia oulua faitauaofaiina le fanauga a Koato mai le fanauga a Levi, i o latou aiga,

³i aiga o latou tamā, e afua mai i e ua tolu sefulu o latou tausaga atoa ma e ua matutua ai, e oo i e ua lima sefulu o latou tausaga, atoa uma o e o atu e auauna e fai ai le galuega i le fale fetafai o le faapotopotoga.

⁴O le galuega lenei a le fanauga a Koato i le fale fetafai o le faapotopotoga, i mea e sili ona paia.

⁵Auā pe a alu le toagālauapi, ona o ane ai lea o Arona ma ona atalii, ma ave ifo le ie puipui, ma latou ufiufi a‘i le atolaau o le tulafono.

⁶E tuu foi e i latou i ona luga le ufiufi pau takesa, ma folasia ai i ona luga le ie e uli uma lava, latou te sulu ai foi ona amo.

⁷Latou te folasia foi le ie uli i luga o le laoai o areto e laulauina i luma, ma latou faaee i ona luga o tanoa salalafa, ma ipu, ma ipu e asu a‘i, ma tanoa e sasaa a‘i; e i ai foi i ona luga le areto tumau;

⁸latou te fofola foi i luga o ia mea le ie mūmū, latou te ufitia foi lea i le ufiufi pa‘u takesa, ona latou sulu ai lea o ona amo.

⁹Latou te avane foi le ie uli, ma ufiufi a‘i le tuugālamepa, ma ona lamepa, ma ona selelamepa, ma ona tuugāmatapa‘u o le afi, ma ona tuugāuu uma lava, latou te fai a‘i ona sauniga;

¹⁰latou te tuu ai foi ma ana mea uma i totonu o le ufiufi pa‘u takesa, ma tuu ai i luga o se amo.

¹¹Latou te fofola foi le ie uli i luga o le fata auro e fai ai taulaga, ma ufitia lea mea i le ufiufi pa‘u takesa, ona latou sulu ai lea o ona amo.

¹²Latou te ave foi mea uma lava e fai a‘i le galuega latou te auauna a‘i i le malumalu, ma tuu ai i le ie uli, ma latou ufitia ai i le ufiufi pa‘u takesa, ma tuu ai i luga o se amo.

¹³Latou te ave ese foi le lefulefu mai le fata faitaulaga, ma fofola i ona luga le ie pāuli;

¹⁴latou te tuu i ona luga ana mea uma ua latou fai a‘i ona sauniga, o salefu, ma tui, ma suo, ma ipu; o mea uma o le fata faitaulaga; latou te folasia foi i ona luga le ufiufi pa‘u takesa, ma sulu ai ona amo.

¹⁵Pe a uma foi ona ufiufitia e Arona ma ona atalii o le mea paia ma mea uma o i le mea paia, auā o le toagālauapi o le a alu, mulimuli ane ona ulu ane ai lea o le fanauga a Koato e ave ai; a e aua ne‘i latou papai atu i se mea paia, ne‘i latou oti. O avega ia a le fanauga a Koato i le fale fetafai o le faapotopotoga.

¹⁶E ia Eleasaro le atalii o Arona le ositaulaga le pule i le suāuu e mu ai le afi, ma mea manogi lelei e mu, ma le taulaga i mea e ‘ai e fai soo, ma le suāuu e faauu a‘i; e i lana pule le malumalu uma, ma mea uma ua i le mea paia, atoa ma ana mea.

¹⁷Ua fetalai mai foi Ieova ia Mose ma Arona, ua faapea mai,

¹⁸Aua ne‘i lua vavaeeseina le aiga o sa Koatō i sa Levī;

¹⁹a o le mea lenei lua te faia ia te i latou, ina ia latou ola, ia latou le oti, pe a latou faalatalata i mea e sili ona paia: ia ulu atu Arona ma ona atalii, ma ia latou totofi ia te i latou, o le tagata ma lana galuega ma lana avega;

²⁰a e aua ne‘i latou ulu atu e matamata ai i sina emo lava i mea paia, ina ne‘i latou oti.

²¹Ua fetalai mai foi Ieova ia Mose, ua faapea mai,

²²Ia e faitauaofaiina le fanauga a Keresoma, o i latou lava i aiga o latou tama, i o latou aiga;

²³e afua mai i e ua tolugafulu o latou tausaga atoa ma e ua matutua ai, e oo i e ua lima sefulu o latou tausaga, e te faitaulia i latou, o i latou uma lava o e o atu e auauna, e fai ai le galuega i le fale fetafai o le faapotopotoga.

²⁴O le galuega foi lenei a aiga o sa Keresomā latou te faia, ma a latou avega;

²⁵latou te ave ie puipui o le malumalu ma le fale fetafai o le faapotopotoga, o lona ufiufi, ma le ufiufi pa‘u takesa o loo i ona lava luga, ma le ie puipui o le faitotoa o le fale fetafai o le faapotopotoga,

²⁶o ie puipui foi o le lotoā, ma le ie puipui o le pupuni o le faitotoa o le lotoā, o le ua felatai ma le malumalu e felatai foi ma le fata faitaulaga e faataaliolio ai, ma o latou maea, ma mea uma o latou sauniga, ma mea uma e faia mo i latou; o la latou galuega lea.

²⁷O le upu a Arona ma ona atalii e fai ai e le fanauga a sa Keresomā a latou galuega uma, i a latou avega uma ma a latou galuega uma; tou te totofi lava ia te i latou i le tausiga o a latou avega uma.

²⁸O le galuega lea a aiga o le fanauga a sa Keresomā i le fale fetafai o le faapotopotoga; o a latou mea e tausi foi e i le pule lea a Itamaro le atalii o Arona le faitaulaga.

²⁹E te faitaulia le fanauga a sa Merarī, i o latou aiga, i aiga o latou tamā;

³⁰e afua mai i e ua tolugafulu o latou tausaga atoa ma e ua matutua ai, e oo i e ua limagafulu o latou tausaga, e te faitaulia i latou, o i latou uma lava o e o atu e auauna, e fai ai le galuega o le fale fetafai o le faapotopotoga.

³¹O le tausiga lenei o a latou avega, i a latou galuega uma i le fale fetafai o le faapotopotoga; o laupapa o le malumalu, ma ona faalava, ma ona pou, ma ona lago,

³²o pou foi o le lotoā e faataaliolio ai, ma o latou lago, ma o latou faamau, ma o latou maea, ma a latou mea uma, ma o latou sauniga uma; tou te faitauina atu foi i o latou igoa o mea uma o le tausiga o a latou avega.

³³O le galuega lea a aiga o le fanauga a sa Merarī, i la latou galuega uma i le fale fetafai o le faapotopotoga; e i le pule lea a Itamaro le atalii o Arona le ositaulaga.

³⁴Ua faitaulia foi e Mose, ma Arona, ma alii sili o le faapotopotoga o le fanauga a sa Koatō, i o latou aiga, i aiga foi o latou tamā,

³⁵e afua mai i e ua tolu sefulu o latou tausaga atoa ma e ua matutua ai, e oo i e ua lima sefulu o latou tausaga, o i latou uma lava o e o atu e auauna i le galuega i le fale fetafai o le faapotopotoga,

³⁶o i latou foi na faitaulia i o latou aiga, e lua afe ma le fitu o selau ma le lima sefulu.

³⁷O i latou ia na faitaulia o aiga o sa Koatō, o i latou uma e auauna i le fale fetafai o le faapotopotoga, o e na faitaulia e Mose ma Arona e tusa ma le afioga a Ieova ia Mose.

³⁸O i latou foi na faitaulia o le fanauga a Keresoma, i o latou aiga,

³⁹i aiga foi o latou tamā, e afua mai i e ua tolu sefulu o latou tausaga atoa ma e ua matutua ai, e oo i e ua lima sefulu o latou tausaga, o i latou uma lava o e o atu e auauna i le galuega i le fale fetafai o le faapotopotoga,

⁴⁰o i latou lava na faitauina i o latou aiga, i aiga o latou tamā, e lua afe ma le ono selau ma le tolu sefulu.

⁴¹O i latou ia na faitaulia i aiga o le fanauga a Keresoma, o i latou uma e auauna i le fale fetafai o le faapotopotoga, o e na faitaulia e Mose ma Arona e tusa ma le afioga a Ieova.

⁴²O i latou foi na faitaulia i aiga o le fanauga a Merari, i o latou aiga,

⁴³i aiga o latou tamā, e afua mai i e ua tolu sefulu o latou tausaga atoa ma e ua matutua ai, e oo i e ua lima sefulu o latou tausaga, o i latou uma lava o e o atu e auauna i le galuega i le fale fetafai o le faapotopotoga.

⁴⁴O i latou lava na faitaulia i o latou aiga, e tolu afe ma le lua o selau.

⁴⁵O i latou lava ia na faitaulia i aiga o le fanauga a Merari, o e na faitaulia e Mose ma Arona e tusa ma le afioga a Ieova ia Mose.

⁴⁶O i latou uma lava na faitaulia i sa Levī, o i latou na faitaulia e Mose, ma Arona, ma alii sili o Isaraelu, i o latou aiga, i aiga foi o latou tamā,

⁴⁷e afua mai i e ua tolu sefulu o latou tausaga atoa ma e ua matutua ai, e oo i e ua lima sefulu o latou tausaga, o i latou uma lava o e o atu e auauna i feau o le galuega, ma le galuega i avega i le fale fetafai o le faapotopotoga.

⁴⁸O i latou lava na faitaulia o i latou, e valu afe ma le lima selau ma le valu sefulu.

⁴⁹Na faitaulia i latou e Mose e tusa ma le afioga a Ieova, o le tagata ma lana galuega ma lana avega; na faitaulia lava i latou e ia e pei ona poloai mai ai o Ieova ia Mose.