Read Samoan Old Version Bible – O LE TUSI PAIA NUMERA 5 Bible Online

NUMERA 5 - Samoan Old Version Bible – O LE TUSI PAIA bible

NUMERA 5

¹Ua fetalai mai foi Ieova ia Mose, ua faapea mai,

²Ina fai atu ia i le fanauga a Isaraelu ia latou aueseina i le toagālauapi o e lepela uma, ma i latou uma o i ai le gau, ma i latou uma ua leaga i le tagata oti;

³tou te aueseina le tane atoa ma le fafine, tou te aueseina atu i latou i tua lava o le toagalauapi; ina ne‘i leaga ia te i latou o a latou toagalauapi ou te nofo ai a‘u.

⁴Ona faapea lava lea ona faia e le fanauga a Isaraelu, ua latou aueseina i latou i tua o le toagālauapi; e pei ona fetalai mai o Ieova ia Mose, ua faapea lava ona faia e le fanauga a Isaraelu.

⁵Ua fetalai mai foi Ieova ia Mose, ua faapea mai,

⁶Ia e fai atu i le fanauga a Isaraelu, Pe a faia e se tane po o se fafine se agasala o agasala uma a tagata e soli ai tulafono a Ieova, ma nofo sala ai lea tagata;

⁷e faaali lava e ia lana agasala na ia faia, na te taui atu foi lana agasala i lona atoatoa, ma faaopoopo i ai o lona vaega e lima, ma avatu ai i le na ia agasala i ai.

⁸A e afai e leai se aiga o le tagata e taui atu i ai le agasala, ia avatu le taui o le agasala ia Ieova, i le ositaulaga lava, e faaopoopo ai i le mamoe poa e togiola a‘i, e fai a‘i se togiola mo ia.

⁹O taulaga sii uma lava i mea paia uma a le fanauga a Isaraelu e aveina atu ai e i latou i le ositaulaga, e fai mana lava ia.

¹⁰O mea paia a tagata taitasi e fai māna lava ia; ai se mea e foaiina e se tagata i le ositaulaga e fai māna lava ia.

¹¹Ua fetalai mai foi Ieova ia Mose, ua faapea mai,

¹²Ia e fai atu i le fanauga a Isaraelu, ia faapea atu ia te i latou, Ai se tane ua alu lana avā,

¹³ma agaleaga ia te ia, ua la momoe ma e tasi tane, a e lei iloa e lana tane, ua lilo lava, ua leaga ai o ia, a e leai se na te molimau ia te ia, e lei maua foi o ia;

¹⁴afai e oo le loto fuā ia te ia, ma ua fuā o ia i lana avā, ua leaga foi le fafine; pe oo le loto fuā ia te ia, ma ua fuā ia i lana avā, a e lei leaga le fafine;

¹⁵ia avatu e le tagata lana avā i le ositaulaga, ia avatu foi e ia lana taulaga mā lana avā, o le omera o falaoa karite; a e aua na te sasaa i ai ni suāuu, aua foi na te avane i ai pulu lipano; auā o le taulaga o le fuā lea, o le taulaga e faamanatu a‘i, o loo faamanatuina ai le agasala.

¹⁶Ona faalatalataina ai lea o ia e le ositaulaga, ma tuuina atu o ia i luma o Ieova;

¹⁷e ave foi e le ositaulaga ni vai paia i le ipu omea, e ave foi e le ositaulaga ni efuefu ai le efuefu o i le loto fale o le malumalu, ma tuu i le vai;

¹⁸ona tuuina atu lea e le ositaulaga o le fafine i luma o Ieova, ma to ese le ufiufi i le ulu o le fafine, e tuu foi e ia i ona lima le taulaga e faamauatu a‘i, o le taulaga o le fuā lea; e i le lima foi o le ositaulaga le vai oona e malaia ai;

¹⁹ona fai atu ai lea o le ositaulaga i le fafine ia tauto mai, ua faapea atu ia te ia, Afai e leai se tane ua oulua momoe ma oe, afai foi ua e le alu ese, ua e le leaga oe i se tasi e le o lau tane, ia sao oe i lenei vai oona e malaia a‘i.

²⁰A e afai ua e alu ese i le tasi e le o lau tane, afai foi ua leaga oe, ma ua oulua momoe ma le tasi tane e le o lau tane;

²¹ona fai atu ai lea o le ositaulaga i le fafine i le tauto e faafano ai, e fai atu foi le ositaulaga i le fafine; Ia tuuina atu oe e Ieova ia faafano oe ma fetuuina i lou nuu, pe a faaoo e Ieova i lou ogavae ia paū ese, ma lou manava ia fula;

²²o lenei vai foi e malaia a‘i e alu ifo lea i lou manava, ina ia fula ai lou manava, ma ia paū ese ai lou ogavae. Ona tali mai ai lea o le fafine, Amene, Amene.

²³Ona tusi ai lea e le ositaulaga o nei faafano i le tusi, na te sōloi foi i le vai oona;

²⁴e avatu foi e ia i le fafine le vai oona e malaia a‘i e inu ai, e oo foi i totonu ia te ia le vai e malaia a‘i ina ia ona ai.

²⁵E aveesea foi e le ositaulaga i le lima o le fafine le taulaga o le fuā, ma luluina le taulaga i luma o Ieova, ona avatu ai lea i le fata faitaulaga;

²⁶e ave foi e le ositaulaga le luutaga ai le taulaga, o lona faamanatuga lea, ona susunu ai lea i luga o le fata faitaulaga, e mulimuli ane ona avatu lea e ia i le fafine le vai e inu.

²⁷Pe a uma ona faainua o ia i le vai, afai ua leaga o ia, ma ua agaleaga i lana tane, e oo lava i totonu ia te ia le vai e malaia a‘i, ina ia ona ai, ona fula lava lea o lona manava, e paū ese foi lona ogavae;; ona avea lea o le fafine ma le ua fetuuina i lona nuu.

²⁸A e afai e lei leaga le fafine, a ua lelei o ia, ona sao lava lea o ia, e to foi o ia.

²⁹O le tulafono lea i le fuā, pe a alu ese le fafine i le tasi e le o lana tane, ma ua leaga ai o ia;

³⁰i le ma lea foi pe a oo le loto fuā i le tane, ma ua fuā o ia i lana avā, ma tuuina atu e ia le fafine i luma o Ieova, ona faia lea e le ositaulaga ia te ia lenei tulafono uma.

³¹Ona sao lea o le tane a le agasala, a e nofo sala le fafine.