Read Samoan Old Version Bible – O LE TUSI PAIA NUMERA 6 Bible Online

NUMERA 6 - Samoan Old Version Bible – O LE TUSI PAIA bible

NUMERA 6

¹Ua fetalai mai foi Ieova ia Mose, ua faapea mai,

²Ia e fai atu i le fanauga a Isaraelu, ia faapea atu ia te i latou, O le tane po o le fafine o le na te vavae mai o ia e ia e tauto i le tautoga o le naseri, ina ia vavae mai o ia e ia mo Ieova;

³ia sa lava ia te ia le uaina ma le ‘ava, aua ne‘i inu le vineta e faia i le uaina po o le vineta e faia i le ‘ava, aua ne‘i inu foi le sua o le fua o le vine, aua ne‘i ‘ai foi o ia le fua o le vine pe mata pe mago.

⁴O ona po uma lava e fai ai o ia ma naseri aua ne‘i ai lava ia se mea e tasi e faia i le vine e fai a‘i le uaina, o fatu atoa ma pa‘u.

⁵O ona po uma lava o lona tautoga faanaseri e le oo lava se tafi i lona ulu; e paia lava o ia, seia uma ona po e vavae mai ai o ia e ia mo Ieova, ia tutupu pea ona fuafuati lauulu.

⁶O ona po uma foi e vavae mai ai o ia e ia mo Ieova, aua ne‘i papai atu o ia i se tagata oti.

⁷Aua ne‘i leaga o ia ona o lona tama, po o lona tinā, po o lona uso, po o lona tuafafine, pe a latou oti; auā o loo i luga o lona ulu le faanaseri mo lona Atua.

⁸O ona po uma e fai ai o ia ma naseri e paia lava o ia mo Ieova.

⁹Afai foi e oti faafuasei se tasi tagata i ona tafatafa, ma ua leaga ai lona ulu faanaseri, ona tafi ai lea e ia o lona ulu i le aso o lona faamamāina, o le aso fitu na te tafi ai.

¹⁰O le aso valu foi na te au mai ai le uluga manutagi, po o tamai lupe e lua fua i le ositaulaga i le faitotoa o le fale fetafai o le faapotopotoga;

¹¹ona osia ai lea e le ositaulaga, o le tasi e fai ma taulaga mo le agasala, ma le tasi e fai ma taulaga mu, na te faia foi le togiola mo ia, ina ua agasala o ia ona o le tagata oti, e faapaiaina foi e ia lona ulu i lea lava aso.

¹²Ona faasa ai lea e ia mo Ieova o po e fai ai o ia ma naseri, e avatu foi e ia o le tamai mamoe e tasi lona tausaga e fai ma taulaga mo le sese; a o po na muamua e le taulia lava ia, auā ua leaga lona naseri.

¹³O le tulafono lenei o le naseri, o le aso e atoa ai po sa fai ai o ia ma naseri e au mai ai o ia i le faitotoa o le fale fetafai o le faapotopotoga;

¹⁴ona avatu ai lea e ia o lana taulaga ia Ieova, o le tamai mamoe poa e tasi, e tasi lona tausaga, e sao ona lelei, e fai ma taulaga mu; o le tamai mamoe fafine foi e tasi, e tasi lona tausaga, e sao ona lelei, e fai ma taulaga mo le agasala; o le mamoe poa foi e tasi, e sao ona lelei, e fai ma taulaga faafetai;

¹⁵o le ato foi o areto e lei faafefetena, o potoi falaoa lelei ua palua ma le uu, o faapāpā foi o areto e lei faafefeteina ua nini i le uu, o la latou taulaga foi i mea e ‘ai, ma la latou taulaga i mea e inu.

¹⁶E aveina atu ai foi e le ositaulaga i luma o Ieova, na te fai ai foi lana taulaga mo le agasala, ma lana taulaga mu;

¹⁷o le mamoe poa foi ua te fai a‘i le taulaga faafetai ia Ieova, e faatasi ma le ato o areto e lei faafefeteina; e faia foi e le ositaulaga lana taulaga i mea e ‘ai, ma lana taulaga i mea e inu.

¹⁸Ona tafi ai lea e le naseri o lona ulu faanaseri i le faitotoa o le fale fetafai o le faapotopotoga, e ave foi e ia le lauulu o lona ulu faanaseri, ma tuu ai i le afi o loo i lalo o le taulaga faafetai.

¹⁹Ona tago ai lea o le ositaulaga i le ālagālima o le mamoe poa ua tunu, ma le potoi areto e le faafefeteina e tasi nai le ato, ma le faapāpā e le faafefeteina e tasi, na te faaee ai foi i alofilima o le naseri, pe a uma ona tafi o lona ulu faanaseri.

²⁰Ona luluina ai lea e le ositaulaga, o le taulaga lulu lea i luma o Ieova; o le mea paia lea mā le ositaulaga, i le ma le fatafata e luluina atoa ma le ālagālima e siitia; e mulimuli ane ona mafai lea ona inu uaina e le naseri.

²¹O le tulafono lea i le naseri o le ua tauto, ma lana taulaga ia Ieova ona o lona faanaseri, e faaopoopoina ia mea i le mea e maua e ia; e tusa ma lana tautoga na ia tauto ai, ia faapea lava ona faia e ia, e tusa ma le tulafono i lona faanaseri.

²²Ua fetalai mai foi Ieova ia Mose, ua faapea mai,

²³Ia e fai atu ia Arona ma ona atalii, ia faapea atu, Ia faapenei ona outou faamanuia atu i le fanauga a Isaraelu, ia faapea atu ia te i latou,

²⁴Ia faamanuia oe e Ieova, ma ia na tausi ia te oe;

²⁵ia faamalamalamaina e Ieova ona fofoga i luga ia te oe, ma alofa atu ia te oe;

²⁶ia faasaga mai e Ieova ona fofoga ia te oe, ma tuuina atu ia te oe le manuia.

²⁷Latou te ta‘u atu foi lo‘u igoa i luga o le fanauga a Isaraelu; o a‘u foi ou te faamanuia atu ia te i latou.