Read Samoan Old Version Bible – O LE TUSI PAIA MIKA, 1 Bible Online

MIKA, 1 - Samoan Old Version Bible – O LE TUSI PAIA bible

MIKA, 1

¹O le afioga a Ieova na oo mai ia Mika le Morese i ona po o Iotama, ma Aasa, ma Esekia, o tupu o Iuta, na ia iloa i mea a Samaria ma Ierusalema.

²Faalogologo mai ia outou nuu uma; faasaga mai ia le lalolagi e, atoa ma mea ua tumu ai, seia fai e le Alii o Ieova ana mau ia te outou, o le Alii lava ai lona malumalu paia.

³Auā faauta, o loo afio mai Ieova ai lona afioga, e afio ifo o ia, ma soli i mea maualuluga o i le lalolagi.

⁴E liu suāvai mauga i lalo ia te ia, e māvaevae vanu, pei o le pulu i le afi, faapei o le vai ua tafe ifo i le tofē.

⁵Ona o le solitulafono a Iakopo e oo ai ia mea uma, ona o agasala foi a le aiga o Isaraelu. Se a ea le solitulafono a Iakopo? E le o Samaria ea? O a ea foi mea maualuluga a Iuta?

⁶E le o Ierusalema ea? O le mea lea ou te fai ai Samaria ma faupuegāmaa i le fanua, ma mea e totō ai vine, ou te tuleia foi i lalo i le vanu ona maa, ou te faataatitiafuaina ona faavae.

⁷E nutininiia foi ona tupua ua ta uma, e susunuina foi ona taui uma i le afi, ou te faatafunaina foi ona tupua uma; auā o le taui o le fafine talitane na ia faaputuina ai, e toe foi atu foi ia mea i le taui o le fafine talitane.

⁸O le mea lea ou te tagitu‘i ai, ma ou uio, ou te fealuai ma le le ofu ma le le lavalavā; ou te tagi pei o luko, ma ou faanoanoa pei o iaena.

⁹Auā e leaga ona manua; auā ua oo lava i Iuta; ua pāia lava le faitotoa o lo‘u nuu, o Ierusalema lava.

¹⁰Aua ne‘i ta‘uatua i Kato, aua ne‘i fetagisi i Ako; ia e taafili i le efuefu i Petofira.

¹¹Ina ui ane ia e le o lavalavā ma le mā, o oe na lē mau i Safiri; e lei alu atu le ua mau i Saanana; o le auega a Peteseli e aveeseina ia ia te outou le mea e tu ai o ia.

¹²Ua faanoanoa lava le ua mau i Marota ona o le manuia; auā ua oo ifo le malaia mai ia Ieova i le faitotoa o Ierusalema.

¹³O oe lē mau i Lakisa, ia e nonoa le nofoa faataavalevale i le solofanua televave; (o ia o le amataga o le agasala i le tama fafine a Siona;) auā ua iloa i totonu ia te oe solitulafono a Isaraelu.

¹⁴O le mea lea e te avatu ai se tusi alei ia Morese-Kato; e fai foi fale o Akasepa ma pepelo i tupu o Isaraelu.

¹⁵I le ma lea, o oe na o lē mau i Maresa, ou te au mai ia te oe o le na te fai oe mona; e oo lava ia i Atulama le mamalu o Isaraelu.

¹⁶Ia e tafi lou lauulu ma ia e sele mamā ona o au fanau pele, ia e faalautele le mea ua tafia pei o le aeto; auā ua tāfea ese i latou ia te oe.