Read Samoan Old Version Bible – O LE TUSI PAIA MIKA, 2 Bible Online

MIKA, 2 - Samoan Old Version Bible – O LE TUSI PAIA bible

MIKA, 2

¹Oi talofa i e mafaufau i amioletonu, ma latou saunia mea leaga i o latou moega; pe a malama ae le taeao ua latou faia, auā ua mafai ia te i latou.

²Ua latou mananao foi i fanua, ma latou fao ai faasaua, atoa ma fale, ma latou avea; ua latou saua atu i le tagata ma lona aiga, o le tagata ma lona tofi.

³O le mea lea o loo faapea mai ai Ieova, Faauta, o loo ou te mafaufau i se mea leaga i lenei lava aiga, tou te le mafai ona ‘alo ese ai o outou ua; tou te le savavali foi ma le faasiasia; auā e leaga ia ona po.

⁴E saunia se faataoto ia te outou i lea aso, e pese le pese e aualofa a‘i tele lava, e faapea, Ua matuā faatafunaina i tatou; ua suia e ia le tofi o lo‘u nuu; aue! ua ia aveeseina ai ia te au, ua na tufatufa i o tatou fanua ina ia liliueseina.

⁵O le mea lea o le a leai ai ia te oe se na te lāfolafoina se maea pe a fai le vili i le faapotopotoga a Ieova.

⁶Ua latou faapea mai i e vavalo mai, Aua ne‘i outou vavalo. Latou te le vavalo ia te i latou nei, e le mavae le masiasi.

⁷Oi! o upu faapea a le aiga o Iakopo! E vaivai ea le Agaga o Ieova? O ana ea ia galuega? O a‘u upu e le lelei ai ea le ua savali ma le amiotonu?

⁸A ua tulai lo‘u nuu talu mai anamua pei o se ua ita mai lava; ua outou fao le pulupulu atoa ma le ofu tele ia te i latou o e ui ane ma le faatalanoa, o e ua foi mai i le taua.

⁹Ua outou tulia fafine o lo‘u nuu i o latou fale e fiafia i ai; ua outou ave ese foi lo‘u mamalu i a latou fanau e faavavau.

¹⁰Tutū ia i luga outou, ina o ese ia; auā e le o lo outou malologa lenei; ua leaga, o le mea lea e malaia ai outou, e matuā tele foi le malaia.

¹¹Ai se tagata e savali e tusa ma lona loto ma le faa‘ole‘ole e pepelo mai, e faapea mai, Ou te vavalo ia te oe i le uaina ma le ‘ava; e avea lava ia ma perofeta i lenei nuu.

¹²Iakopo e, ou te faapotopoto lava ia te outou uma lava; ou te aofaiina lava e o totoe o Isaraelu, ou te faatasia i latou pei o le lafu mamoe i Posara, pei o le lafu manu i totonu o le mea e fafaga ai, latou te soona ualolo ona o le vao tagata.

¹³Ua alu ae i o latou luma le na te lepetia, ua latou lepeti, ma latou ui ane i le faitotoa, ua latou o atu ai lava, e afio atu foi lo latou Tupu i o latou luma, e muamua foi Ieova ia te i latou.