Read Samoan Old Version Bible – O LE TUSI PAIA MIKA, 5 Bible Online

MIKA, 5 - Samoan Old Version Bible – O LE TUSI PAIA bible

MIKA, 5

¹O lenei, ina faalaei ‘au ia o oe le tama fafine e ana ‘au; ua ia siosioina i tatou i le taua; latou te ta i le tootoo le faamasino o Isaraelu i lona alafau.

²A o oe, Peteleema-Efarata, e itiiti oe i afe o Iuta, a e tupu mai ia te oe mo a‘u o le na te fai ma faipule ia Isaraelu, o lona tupu mai talu mai anamuā lea, talu mai ona po o le vavau lava.

³A e peitai e tuua i latou e ia seia oo i ona po e fanau mai ai o ia o le a fanau; ona toe foi mai ai lea i le fanauga a Isaraelu o e totoe i ona uso.

⁴E tu foi o ia ma leoleo ia te i latou i le mana o Ieova, ma le mamalu o le suafa o Ieova lona Atua, ona latou nofo mau ai lea; auā o ona po ia e mamalu ai o ia e oo i tuluiga o le lalolagi.

⁵E fai foi o ia ma manuia. Pe a sau Asuria i lo tatou laueleele, pe a soli foi e ia o tatou maota, ona tatou totofi ai lea o leoleo e toafitu e tetee ia te ia, ma alii sili e toavalu.

⁶Latou te faasaunoa foi le nuu o Asuria i le pelu, ma le nuu o Nimarota i ona lava faitotoa; na te laveai foi ia te i tatou ai Asuria, pe a oo mai o ia i lo tatou laueleele, pe a soli foi o ia i lo tatou nuu.

⁷E i ai foi e ua totoe o Iakopo i nuu e tele e pei o le sau mai ia Ieova, pei o le ua foi i luga o vao iti, o le mea e le faatalitali i tagata, e le faatalitali foi i le fanau a tagata.

⁸E i ai foi e ua totoe o Iakopo i nuu ese, o nuu e tele e pei o le leona i manu o le vao, pei o le leona taanoa i lafu mamoe; pe a ui ane o ia na te soli, ma saei, e leai foi se na te laveaiina.

⁹E taualuga lou lima i e faasaua mai ia te oe, e faaumatia foi e ua ita mai uma lava ia te oe.

¹⁰O loo faapea mai Ieova, O lea aso ou te faaumatia ai au solofanua o ia te oe, ou te faaumatia foi ou kariota.

¹¹Ou te faaumatia foi aai o lou nuu, ou te matuā sŏloia foi ou ‘olo uma.

¹²Ou te faaumatia togafiti faataulāitu ai lou lima, e le i ai foi ia te oe ni e iite i ao o le lagi.

¹³Ou te faaumatia foi au tupua ua ta, atoa ma au tupua maa; ona e le toe ifo ai lea i galuega a ou lima.

¹⁴Ou te lepeti foi i au tupua o Asaira i totonu ia te oe, ma ou faatafunaina ou aai.

¹⁵Ou te taui atu ma le ita e matuā tele i nuu ese o e ua le faalogo mai.