Read Samoan Old Version Bible – O LE TUSI PAIA MIKA, 7 Bible Online

MIKA, 7 - Samoan Old Version Bible – O LE TUSI PAIA bible

MIKA, 7

¹Aue a‘u nei! auā ua avea a‘u pei o le fuata ua uma ona faaputuina, pei o toe fuifui vine i le taugāvine; e leai se fuifui vine e ‘ai ai; na ou manao i le mati e muai matua.

²Ua fano le ua agalelei nai le nuu; e leai se tasi tagata ua amiotonu; latou te lamalama uma ina ia fasioti tagata; ua latou taitasi ma tuli lona uso ma le upega.

³Ua matuā faia mea leaga i o latou lima; ua fai atu le alii sili atoa ma le faamasino i se taui; ua tautala atu foi le matai tagata i lona manumanu; o lea ua latou faapiopio ai.

⁴O so latou e lelei e tusa ia ma le laau tuitui; o sē amiotonu e sili ona matuitui o ia i le āi laau tuitui; o loo oo mai le aso o ou tagata vaai, o lou asiasiga lava; e i ai nei lava lo latou fememeai.

⁵Aua ne‘i outou faatuatua i le uo, aua ne‘i faalagolago i le aumeamamae; ia e leoleo i puipui o lou gutu i lau avā pele.

⁶Auā o loo ‘ino‘ino le atalii i le tamā, o le tama teine ua tu o ia e tetee i lona tinā, o le avā a le tama tane e tetee atu o ia i le tinā o lana tane; o e ua ita i le tagata, o tagata ia o lona lava aiga.

⁷A o a‘u, ou te faatalitali ia Ieova, ou te faamoemoe i le Atua o lo‘u olataga; e faafofoga mai lo‘u Atua ia te au.

⁸Aua e te mitamita ia te au, o oe na, le ua ita mai ia te au; e ui lava ina ou paū, ou te toe tu lava i luga; e ui lava ina ou nofo i le pouliuli, a o Ieova o lo‘u malamalama ia.

⁹Ou te faatoatoa i le toatamai o Ieova, auā ua ou agasala atu ia te ia; seia faia e ia la‘u finauga, ma na faia foi lo‘u faamasinoga; na te faaooina a‘u i le malamalama, ou te iloa lana amiotonu.

¹⁰E iloa ai foi e le ua ita mai ia te au, e liloia foi o ia i le mā, o le na fai mai ia te au, O ifea ea Ieova lou Atua? E iloa o ia e o‘u mata, e solia nei o ia pei o le palapala i le ala.

¹¹O le aso e atiina ae ai ou pa, o le aso lea e avea mamao ai le tulafono.

¹²O lea aso latou te o mai ai lava ia te oe nai Asuria, atoa ma aai o Aikupito, ma Aikupito lava e oo i le vaitafe, mai le tasi sami e oo i le tasi sami, mai le tasi mauga e oo i le tasi mauga.

¹³A e faatafunaina le nuu ona o e mau ai, ona o le fua o a latou amio.

¹⁴Ia e leoleo i lou nuu ma lou tootoo, o le lafu mamoe o lou tofi; o e nofo ese i le vao, i Karamelu; ia latou aai i Vasana ma Kiliata, pei o ona po anamuā lava.

¹⁵Faapei o ona po sa e sau ai i le nuu o Aikupito, ou te faaali atu i ai vavega.

¹⁶E iloa e nuu ese, ona masiasi ai lea o i latou i lo latou malosi uma; latou te ufiufi ai o latou gutu i o latou lima, e tutuli foi o latou taliga.

¹⁷Latou te etoeto i le efuefu pei o le gata; e pei o mea fetolofi i le laueleele latou te tetemu ai i mea ua puipuia mo i latou; latou te matatau ia Ieova lo tatou Atuā; latou te fefefe foi ia te oe.

¹⁸O ai ea se Atua e tusa ma oe o le faamagalo agasala, ma ua le manatua solitulafono a e o totoe o lona tofi? Na te le faamoemoe pea i lona toasa, auā e fiafia o ia i le alofa.

¹⁹E toe alofa mai o ia ia te i tatou, e faatoilaloina e ia a tatou amioletonu; e te lafo foi a latou agasala uma i mea loloto o le sami.

²⁰E te faaoo le faamaoni ia Iakopo, o le alofa ia Aperaamo, sa e tauto ai i o matou tamā talu mai ona po anamua.