Read Samoan Old Version Bible – O LE TUSI PAIA SAPAKUKA, 2 Bible Online

SAPAKUKA, 2 - Samoan Old Version Bible – O LE TUSI PAIA bible

SAPAKUKA, 2

¹Ou te tu i le mea ou te leoleo ai, ou te tu foi a‘u i le ‘olo, ou te vaavaai foi ina ia ou iloa pe se a se mea e fetalai mai ai o ia ia te au, pe se a foi se mea ou te tali atu ai i la‘u finauga.

²Ua tali mai foi Ieova ia te au, ua faapea mai, Ia e tusi le faaaliga, ia e togitogi i papa, ina ia momo‘e o ia le na te faitauina.

³Auā o le faaaliga ua tuuina mo ona aso ua tuupoina, a e tautala mai pe a oo i le iuga, e le pepelo lava; e ui lava ina tuai mai, a ia faatalitali pea i ai; auā e oo mai lava, e le faatuai mai.

⁴Faauta, o le ua faafefeteina e le tonu lona loto i totonu ia te ia; a o le ua amiotonu e ola ia i lona faatuatua.

⁵A e moni lava, o le uaina o le faa‘ole‘ole lea; o le tagata faafefeteina e le nofo foi o ia i lona fale, na te faateleina lona manao pei o seoli, e pei o le oti lava ia, e le maona lava; na te faapotopotoina nuu uma lava ia te ia, na te aofaiina foi ia te ia nuu uma.

⁶E le sauni ea e i latou uma le faataoto ia te ia, atoa ma le pese faatauemu foi ia te ia, ma latou faapea atu, Oi talofa i le na te faaputu mea e le ni ana mea! Seia afea? Oi talofa foi ia te ia o le na te faafaupue ia te ia oloa ese!

⁷E le faafuasei ea ona tulai atu i latou o e a feutia oe, ma latou ala mai o e faatigaina oe, ona avea lea o oe ma vete mā latou?

⁸Sa e vetea nuu e tele, o le mea lea e vetea ai oe e nuu uma o totoe; ona o le toto o tagata, ma le saua i le nuu, ma le aai, ma i latou uma o e nonofo ai.

⁹Oi talofa i le na te maua i le amio leaga le oloa mā lona aiga, ina ia tuu lona ofaga i le mea maualuga, ina ia laveaiina o ia i le malaia!

¹⁰Ua e filifili se mea e oo ai le mā i lou lava aiga, i lou faaumatia o nuu e tele; ua e agasala foi ia te oe lava.

¹¹Auā e alaga mai le maa ai le pa puipui, o le faalava foi ai le laau e tali atu i ai.

¹²Oi talofa i le na te faia se aai i le toto, ma faatumauina se aai i le amioletonu!

¹³Faauta, e le mai ia Ieova o ‘au ea ona ia galulue tagata mā le afi, ma ia lailoa nuu ia i latou lava i mea le aoga lava?

¹⁴Auā e tumu le lalolagi i le malamalama o le mamalu o Ieova, faapei ona ufitia o le iliti tai i le suāsami.

¹⁵Oi talofa i le na te faainu i le tasi tagata, o oe o lē liligi atu lau mea oona ia te ia, ua e faaonā foi ia te ia, ina ia e vaai atu i lo latou le lavalavā.

¹⁶E tumu oe i le mā e le o le mamalu; ia e inu foi oe, ma ia aliali lou le peritomeina; e liliu atu ia te oe le ipu a le aao taumatau o Ieova, e i ai foi le puaiga e faamāina ai i luga o lou mamalu.

¹⁷Auā e liloia oe i le saua na faia i Lepanona, ma le faaumatia o manu e matuā matatau ai i latou; ona o le toto o tagata, ma le saua i le nuu, ma le aai, ma i latou uma o e nonofo ai.

¹⁸Se a ea le aoga o le tupua ua ta ina ua taia e le na na faia; o le tupua uamea, ma le a‘oa‘o i le pepelo, ina ua faatuatua le na faia i lana mea na fai, ia fai ai e ia tupua e le magagana?

¹⁹Oi talofa i le na te fai atu i le laau, Ala mai ia; ma le maa e le magagana, Tulai mai ia! E a‘oa‘o mai ea lena mea? Faauta ia te ia, ua ufitia i le auro ma le ario, ae leai lava se mānava i totonu ia te ia.

²⁰A o Ieova ua i lona malumalu paia o ia; ina faalologo ia le lalolagi uma i ona luma.