Read Samoan Old Version Bible – O LE TUSI PAIA SAPAKUKA, 3 Bible Online

SAPAKUKA, 3 - Samoan Old Version Bible – O LE TUSI PAIA bible

SAPAKUKA, 3

¹O le tatalo a le perofeta o Sapakuka, na fai ma pese.

²Ieova e, ua ou faalogo i le tala ia te oe, ua ou mata‘u ai; Ieova e, ia e toe faaolaolaina lau galuega i ia tausaga, o ia tausaga ia e faailoa mai ai; ia e manatu i le alofa ao e toasa.

³Na afio mai le Atua mai Timanu, na afio mai foi le Paia mai le mauga o Parana. Selā. Sa ufitia le lagi i lona pupula, o lona viiga foi sa tumu ai le lalolagi.

⁴O le pupula foi sa faapei o le la, sa oo mai ‘ave ai lona aao, sa iai foi le ufiufi o lona mana.

⁵Sa muamua atu le faamai i ona luma, sa mulimuli foi ia te ia le ma‘i vevela

⁶Sa tu o ia ma fuafua le lalolagi; na ia silasila mai, ma na faagateteina nuu ese; na faataapeapeina ai foi mauga o le vavau; na faamaualaloina ai mauga iti o le vavau; o ona ala ia mai le vavau.

⁷Na ou iloa fale ie o Kusa ua puapuagatia; na gatete ie puipui o le nuu o Mitiana.

⁸Na toatamai ea Ieova i vaitafe? pe na e toasa ea i vaitafe? pe na e maemaea ea i le sami, ina ua e tietie i au solofanua ma ou nofoa faataavalevale o le faaolataga?

⁹Na to ese lava le faamoega o lau aufana, o tautoga na e fetalai mai ai i itu aiga. Selā. Na e vaevaea le lalolagi i vaitafe.

¹⁰Na iloa oe e mauga, ua latou gatete ai; ua tafe ane le tafega o vai; na gagana mai le moana, ua na sisii i luga ona lima.

¹¹Sa tutū pea le la ma le masina i le mea la te mau ai; o le malamalama o au u fanafana na latou savavali ai, ma le malamalama o lou tao pupula.

¹²Sa e afio atu i le lalolagi ma le toatamai, sa e soli nuu ese i lou toasa.

¹³Sa e afio atu e faaola i lou nuu, e faaola i le na e faauuina; sa e foa le ulu i le fale o lē amio leaga, i lou faataatia fua le faavae ia oo i le ua lava. Selā.

¹⁴Sa e sosoa le alii sili o ona ta‘ita‘i i ona lava tao; sa latou feosofi mai pei se afā e faataapeape ia te au; sa fai mo latou mitamita le faaumatia faalilolilo o le tagata mativa.

¹⁵Sa e afio i totonu o le sami ma au solofanua, sa e afio foi i le faupuegāvai e tele.

¹⁶Na ou faalogo ai, ona sapotuvale ai lea o lo‘u manava, sa tete o‘u laugutu i le leo; ua oo mai ai le pala i o‘u ivi, ua ou tetemu ai lava; a e filemu a‘u i le aso o le puapuaga, pe a alu ae o ia i le nuu e sii mai le taua ia te i tatou.

¹⁷E ui lava ina le fuga mai le mati, e leai foi ni fua i vine, e iuvale le fua o le olive, e le tupu mai foi ni mea e ‘ai i le fanua; e faaumatia le lafu mamoe i le lotoā e leai foi ni povi i le fale povi;

¹⁸a e peitai a‘u, ou te olioli lava ia Ieova, ou te fiafia lava i le Atua o lo‘u faaolataga.

¹⁹O Ieova le Alii, o lo‘u malosi ia, na te faia o‘u vae e pei o vae o aila, o ia foi ou te savali ai i a‘u mea maualuluga. Ma le usu pese i nekina.