Read Samoan Old Version Bible – O LE TUSI PAIA HAKAI, 1 Bible Online

HAKAI, 1 - Samoan Old Version Bible – O LE TUSI PAIA bible

HAKAI, 1

¹O le lua o tausaga o le tupu o Tariu, o lona ono o masina, o le aso muamua o le masina, na au mai ai le afioga a Ieova e le perofeta o Hakai ia Serupapelu le atalii o Salatielu, le alii e pule ia Iuta, atoa ma Iosua le atalii o Iosataka o le faitaulaga sili, o loo faapea mai,

²Ua faapea ona fetalai mai o Ieova o ‘au, o loo faapea mai, Ua fai mai lenei nuu, E lei oo i ona aso, o aso e fai ai le fale o Ieova.

³Ona au mai ai lea o le afioga a Ieova e le perofeta o Hakai, o loo faapea,

⁴O ona po nei ea tou te nonofo ai i o outou fale ua tăpapa, a o lenei fale ua faatafunaina.

⁵O lenei, o loo faapea ona fetalai mai o Ieova o ‘au, Ia outou mafaufau i o outou ala.

⁶Ua outou totō mea e tele, a e itiiti mea na outou au mai ai; ua outou aai, a e lei maoona ai outou; ua outou feinu, a e lei malilie ai outou; ua outou oofu, a e lei mafanafana ai outou; o le ua galue foi i se taui, e fai lana taui e fafao i le taga ua pūpū solo.

⁷O loo faapea ona fetalai mai o Ieova o ‘au, Ia outou mafaufau i o outou ala.

⁸Ina o ae ia outou i le mauga, ma outou aumaia laau, ma outou faia le fale; ona ou fiafia lea i ai, e viia ai foi au, ua fetalai mai ai Ieova.

⁹Ua outou faamoemoe i mea e tele, faauta foi, ua itiiti; ua outou aumaia i fale, ona a‘u ulafia lea; ai se a? o loo fetalai mai ai Ieova o ‘au. Auā o lo‘u fale o loo ua faatafunaina lea, a e taitasi outou ma momo‘e atu i lona lava fale.

¹⁰O le mea lea ua taofia ai e le lagi i o outou luga, ina ne‘i totō mai ai le sau; o le laueleele foi ua taofi e ia ona fua.

¹¹Ua ou valaau foi i le lāmala i luga o le eleele ma luga o mauga, ma luga o le saito, ma luga o le uaina, ma luga o le suāuu, ma luga o mea e tutupu i le eleele, ma luga o tagata, ma luga o manu vaefa, ma luga o galuega uma a o outou lima.

¹²Ona faalogo ai lea o Serupapelu le atalii o Salatielu, ma Iosua le atalii o Iosataka le faitaulaga sili, atoa ma e na totoe uma o le nuu, i le siufofoga o Ieova lo latou Atua, ma upu a le perofeta o Hakai, e tusa ma mea na auina mai ai o ia e Ieova lo latou Atua; ua matatau foi le nuu ia Ieova.

¹³Ona fai mai lea o Hakai le sāvali a Ieova i le feau a Ieova i le nuu, ua faapea mai, O loo fetalai mai Ieova, O a‘u, ou te ia te outou.

¹⁴Ona lagaina ai lea e Ieova o le loto o Serupapelu le atalii o Salatielu, o le alii e pule ia Iuta, ma le loto o Iosua le atalii o Iosataka le faitaulaga sili, ma loto o e na totoe uma o le nuu; ua latou o mai, ma latou faia le galuega o le fale o Ieova o ‘au o lo latou Atua,

¹⁵i le aso e luafulu ma le fa, i le onoga masina, i le lua o tausaga o Tariu le tupu.