Read Samoan Old Version Bible – O LE TUSI PAIA HAKAI, 2 Bible Online

HAKAI, 2 - Samoan Old Version Bible – O LE TUSI PAIA bible

HAKAI, 2

¹O le fitu o masina, o le aso e lua sefulu ma le tasi i le masina, na au mai ai le afioga a Ieova e le perofeta o Hakai, o loo faapea mai,

²Ina e fai atu lava ia Serupapelu le atalii o Salatielu, le alii e pule ia Iuta, ma Iosua le atalii o Iosataka le faitaulaga sili, atoa ma e ua totoe o le nuu, ia faapea atu.

³O ai ea so outou ua toe, o le na iloa lenei fale i lona muai matagofie? Pe se a lo outou vaai nei i ai? E le ua peiseai ua leai ea i o outou manatu, pe a faatusa ma lena?

⁴A o lenei, ia e faamalosi o oe o Serupapelu, ua fetalai mai ai Ieova; ma ia e faamalosi o oe o Iosua le atalii o Iosataka le faitaulaga sili; ma ia faamalolosi outou tagata uma o le nuu, ua fetalai mai ai Ieova, ma ia outou galulue; auā o a‘u, ou te ia te outou, ua fetalai mai ai Ieova o ‘au.

⁵O le feagaiga na ou osia ma outou ina ua o mai outou nai Aikupito, atoa ma lo‘u Agaga o loo tumau ia te outou; aua le fefefe outou.

⁶Auā o loo faapea ona fetalai mai o Ieova o ‘au, E toe tasi, e toe itiiti lava, ona ou luluina ai lea o le lagi, ma le lalolagi, ma le sami, atoa ma le eleele matutu.

⁷Ou te luluina foi nuu uma; ona oo mai ai lea o mea ua manaomia e nuu uma; ou te faatumuina foi lenei fale i le pupula, ua fetalai mai ai Ieova o ‘au.

⁸O loo ia te au le ario, o loo ia te au foi le auro, ua fetalai mai ai Ieova o ‘au.

⁹E sili le mamalu o lenei fale ua mulimuli i le na muamua, ua fetalai mai ai Ieova o ‘au; ou te avatu foi le manuia i le mea nei, ua fetalai mai ai Ieova o ‘au.

¹⁰O le aso e luafulu ma le fa, o le ivaga masina o le lua o tausaga o Tariu, na au mai ai le afioga a Ieova e le perofeta o Hakai, o loo faapea mai,

¹¹Ua faapea ona fetalai mai o Ieova o ‘au, Fesili ia i faitaulaga i le tulafono, ia faapea,

¹²Afai e ave e se tasi se tufaaga paia i lona pito ofu, ona pai atu lea o lona pito ofu i se areto, po o se mea ua tunua, po o se uaina, po o se suāuu, po o se tasi mea e ‘aina, pe faapaiaina ai ea ia mea? Ona tali mai lea o faitaulaga, ua faapea mai, E leai.

¹³Ona fai atu lea o Hakai, Afai ua pai atu le ua leaga i le tagata oti i se mea o ia mea, pe leaga ai ea ia mea? Ona tali mai lea o faitaulaga, ua faapea, E leaga ai.

¹⁴Ona tali atu lea o Hakai, ua faapea atu, Ua faapena nei tagata, ua faapena foi lenei nuu i o‘u luma, o loo fetalai mai ai Ieova; ua faapena foi mea uma ua faia e o latou lima, o mea foi ua latou avatua iina ua leaga lava ia.

¹⁵O lenei foi, ia mafaufau lava outou, ia afua mai i lenei lava aso e oo i aso ua tuanai, a o lei faaeetia se maa i luga o le tasi maa i le malumalu o Ieova;

¹⁶e afua mai i ia ona po, na alu ane ai le tagata i le faaputugāsaito, o fuataga e luafulu, a ua i ai na o le sefulu; na alu ane le tagata i le tuugāuaina e asu ai tumu e limagafulu ai le tuugāuaina, a ua i ai na o le luafulu.

¹⁷Na ou taia outou i le mamae, ma le polopologa, ma le uato‘a, i galuega uma a outou lima; a ua outou le foi mai ia te au, ua fetalai mai ai Ieova.

¹⁸Se‘i mafaufau lava outou, ia afua mai i lenei lava aso, e oo i aso ua tuanai, o le aso e luafulu ma le fa i le ivaga masina, talu le aso na faavaeina ai le malumalu o Ieova; ina outou mafaufau ia.

¹⁹E i ai pea ea le saito i le fale saito? Ua oo foi i lenei aso ua le fua mai le vine, ma le mati, ma le rimoni, ma le olive; e amata mai i lenei lava aso ona ou faamanuia ia te outou.

²⁰Ua oo mai foi le afioga a Ieova, o le atu lua lea, ia Hakai i le aso e luafulu ma le fa o le masina, o loo faapea mai,

²¹Fai atu ia Serupapelu le alii e pule ia Iuta, ia faapea atu, Ou te luluina le lagi ma le lalolagi;

²²ou te fulisia le nofoālii o malo; ou te faaumatia foi le malosi o malo o nuu ese; ou te fulisia foi kariota ma ē tietie ai; e pauu solofanua ma ē tietie ai, e fegaseai i latou i a latou pelu.

²³Ua fetalai mai Ieova o ‘au, O lea lava aso ou te avea ai oe la‘u auauna o Serupapelu le atalii o Salatielu, ua fetalai mai ai Ieova; ou te faia oe e pei se faamaufaailoga; auā ua ou filifilia oe, ua fetalai mai ai Ieova o a‘u.