Read Samoan Old Version Bible – O LE TUSI PAIA SAKARIA, 1 Bible Online

SAKARIA, 1 - Samoan Old Version Bible – O LE TUSI PAIA bible

SAKARIA, 1

¹O le valuga masina, o le lua o tausaga o Tariu, na tŭlei mai ai le afioga a Ieova ia Sakaria le perofeta le atalii o Parakaio, o le atalii ia o Ito, o loo faapea mai,

²Sa matuā toasa Ieova i o outou tamā.

³E te fai atu foi ia te i latou, O loo faapea ona fetalai mai o Ieova o ‘au, Ia outou foi mai ia te au, ua fetalai mai ai Ieova o ‘au; ona ou foi atu lea ia te outou, ua fetalai mai ai Ieova o ‘au.

⁴Aua tou te faapei o outou tamā, o e na valaauina e perofeta anamua, na faapea, O loo faapea ona fetalai mai o Ieova o ‘au, Ina foi mai ia i o outou ala leaga, ma a outou galuega leaga; a e lei faalogo mai i latou, ma lei uai mai o latou taliga ia te au, ua fetalai mai ai Ieova.

⁵O outou tamā po o fea o i ai i latou? o le au perofeta foi, e faavavau ea ona ola o i latou?

⁶A e peitai o a‘u upu ma a‘u tulafono, na ou poloai atu ai i a‘u auauna le au perofeta, na le maua atu ai ea o outou tamā? ona latou foi mai ai lea, ma latou fai mai, E pei ona finagalo o Ieova o ‘au, e fai ia te i matou, e tusa ma o matou ala ma a matou galuega, ua faapea lava ona faia e ia ia te i matou.

⁷O le aso e luafulu ma le fa, o le masina e sefulu ma le tasi, o le masina o Sapata lea, o le tausaga e lua o Tariu, na tŭlei mai ai le afioga a Ieova ia Sakaria le perofeta le atalii o Parakaio, o le atalii ia o Ito, o loo faapea mai,

⁸Na ou vaai i le po; faauta foi, o le tagata o loo tietie i le solofanua mūmū, o loo tu foi o ia i le ulu atasi, i le paolo; o loo i ona tua foi o solofanua mūmū ma e eefu, ma e sisina.

⁹Ona ou fai atu lea, Le alii e, o a ea nei mea? Ua fai mai ia te au le agelu na ma tautala, Ou te faailoa ia te oe le uiga o nei mea.

¹⁰Ona tali mai lea o le tagata sa tu i le ulu atasi, ua faapea mai, O i latou ia ua aauina e Ieova e feoai i le lalolagi.

¹¹Ona tali mai lea o i latou i le agelu a Ieova, sa tu i le ulu atasi, ua faapea mai, Ua matou feoai lava i le lalolagi; faauta foi, o loo nofonofo le lalolagi uma, ua fifilemu lava.

¹²Ona fai atu lea o le agelu a Ieova, ua faapea atu, Ieova o ‘au e, se‘i afea ona e le alofa ia Ierusalema, ma aai o Iuta, ua e toasa i ai i ia tausaga e fitugafulu?

¹³Ua tali mai Ieova i le agelu na ma tautala, i upu lelei ma upu faamafanafana.

¹⁴Ua fai mai foi ia te au le agelu na ma tautala, Ia e alaga, ia faapea atu, O loo faapea ona fetalai mai o Ieova o ‘au, Ua ou maelega ona o Ierusalema ma Siona i le maelega tele.

¹⁵Ua ou matuā ita lava i nuu ese o e nonofo faafifilemu; auā na itiiti lo‘u ita, a o i latou, ua latou faateleina le malaia.

¹⁶O le mea lea, o loo faapea ona fetalai mai ai o Ieova, Ua ou foi atu i Ierusalema ma le alofa; e fai ai lo‘u fale, ua fetalai mai ai Ieova o ‘au; e faataotoina foi le fua i luga o Ierusalema.

¹⁷Ia e toe alaga, ia faapea atu, O loo faapea ona fetalai mai o Ieova o ‘au, E toe oso i tua o‘u aai ona o le manuia; e toe faamafanafana Ieova ia Siona, na te toe filifili foi ia Ierusalema.

¹⁸Ua ou tepa ae foi i luga, ua ou vaai, faauta, o nifo e fa.

¹⁹Ona ou fai atu lea i le agelu na ma tautala, O a ea ia mea? Ua fai mai o ia ia te au, O mea ia, o nifo na faataapeapeina ai Iuta, ma Isaraelu, ma Ierusalema.

²⁰Ua faaali mai foi e Ieova ia te au o tufuga e toafa.

²¹Ona ou fai atu lea, Ua o mai i latou na e fai i ni a? Ua tali mai o ia, ua faapea mai, O nifo ia na faataapeapeina ai Iuta, ua oo ina leai se tasi na ea i luga lona ulu; a ua o mai i latou nei e faamatau ia te i latou, e lafo i lalo nifo o nuu ese, e na sii i luga lo latou nifo i le laueleele o Iuta e faataapeapeina ai.