Read Samoan Old Version Bible – O LE TUSI PAIA SAKARIA, 13 Bible Online

SAKARIA, 13 - Samoan Old Version Bible – O LE TUSI PAIA bible

SAKARIA, 13

¹O lea aso e i ai le vaipuna ua suena mo le aiga o Tavita ma e o nonofo i Ierusalema, mo le agasala atoa ma mea leaga.

²Ua fetalai mai Ieova o ‘au, O lea aso ou te tineia ai igoa o tupua i le lalolagi, e le toe manatua i latou; atoa foi ma perofeta ma le agaga leaga, ou te faate‘aeseina ia i le lalolagi.

³Afai foi e toe vavalo se tasi, ona fai atu ai lea ia te ia o lona tamā ma lona tinā na fanaua mai ai o ia, E te le ola; auā ua e tala pepelo i le suafa o Ieova; ona tutu‘i ai lea ia te ia e lona tamā ma lona tinā na fanaua mai ai o ia, pe a vavalo mai ai o ia.

⁴O lea aso foi e taitasi le perofeta ma mā ai o ia i lana mea na vaaia, pe a faia lana valoaga; latou te le oofu foi i se ofu taufulufulu e pepelo ai.

⁵E fai mai foi o ia, Ou te le se perofeta a‘u; o a‘u le tagata e galue i fanua; auā na faapologaina a‘u, talu ina ou taulealea.

⁶Ona fai mai lea o se tasi ia te ia, O a ea ia manua i ou lima? Ona fai atu lea o ia, O mea ia na manua ai a‘u i le fale o a‘u uo.

⁷Ala mai ia, le pelu e, i lo‘u leoleo mamoe, ma le tagata ma te faatasi ma a‘u, ua fetalai mai ai Ieova o ‘au; ina ta ia o le leoleo mamoe, ona faataapeapeina ai lea o le au mamoe; ona faafoi atu lea o lo‘u lima i e iti.

⁸Ua fetalai mai Ieova, E oo ina vavaeeseina i le nuu uma lava ona vaega e lua, e fano lava ia; a e faatotoeina ai lona tolu o vaega.

⁹Ou te avane lona tolu o vaega i le afi; ou te faate‘aese ai le eleele ia te i latou, e pei ona faate‘aeseina ai le eleele o le ario; ou te totofofoina i latou, e pei ona tofotofoina o le auro; e valaau i latou i lo‘u igoa; o a‘u foi, ou te tali atu ai ia te i latou; ou te fai ane, O lo‘u nuu lava i latou; a e fai mai i latou, O Ieova o lo‘u Atua lava o ia.