Read Samoan Old Version Bible – O LE TUSI PAIA SAKARIA, 6 Bible Online

SAKARIA, 6 - Samoan Old Version Bible – O LE TUSI PAIA bible

SAKARIA, 6

¹Ona ou toe tepa ae lea, ma ou iloa, faauta, o kariota e fa, ua o atu nai le va o mauga e lua; o mauga foi, o mauga ‘apa memea ia.

²O i le kariota muamua o solofanua mūmū: o i le lua o kariota o solofanua uliuli;

³o i le tolu o kariota o solofanua sisina; o i le fa o kariota o solofanua pulepule e malolosi.

⁴Ona ou fai atu lea, ua faapea atu i le agelu na ma tautala, Le alii e, o a ea ia mea?

⁵Ona tali mai lea o le agelu, ua fai mai ia te au, O i latou ia o agaga e toafa o le lagi, ua o atu sa tutū i luma o le Alii o le lalolagi uma.

⁶O le ua i ai solofanua uliuli e alu atu ia i le nuu i le itu i matu; ma ē sisina e mulimuli atu i ai; a o e pulepule e o atu ia i le nuu i le itu i toga.

⁷Ua o atu foi ē malolosi, ua fia o ina ia feoai i le lalolagi. Ua ia fai atu foi, O ia, ina feoai i le lalolagi. Ona feoai lea o i latou i le lalolagi.

⁸Ona ia valaau mai lea ia te au, ma tautala mai ia te au, o loo faapea mai, Vaai ia i e ua o atu i le nuu i le itu i matu; ua maona ai lo‘u loto i le nuu i le itu i matu.

⁹Ua tŭlei mai foi le afioga a Ieova ia te au, o loo faapea mai;

¹⁰Ave ia nisi o i latou nai le tafeaga o sa Heletaī o sa Toviā, atoa ma o sa Itaiā; o i latou ia na o mai i Papelonia; e te alu lava oe i lea aso, e te ulu atu i le fale o Iosia le atalii o Sefanaia;

¹¹e te avatu foi ario ma auro, ma ia e fai a‘i pale, ma faaee ai i le ulu o Iosua le atalii o Iosataka le faitaulaga sili.

¹²E te fai atu foi ia te ia, ia faapea, Ua faapea ona fetalai mai o Ieova o ‘au, o loo faapea mai, Faauta, o le tagata o le LA LAAU lona igoa; e tupu ae o ia ai le mea e pogai mai ai; e faia foi e ia le malumalu o Ieova;

¹³o ia lava na te faia le malumalu o Ieova; e ia te ia foi le mamalu, e tietie foi o ia ma pule i luga o lona nofoālii; e fai foi o ia ma faitaulaga i luga o lona nofoālii; e i ai foi le pule o le manuia ia te i laua.

¹⁴E i ai foi ia pale mo Elemi, ma Tovia, ma Itaia, ma Heni le atalii o Sefanaia, e fai ma faamanatuga i le malumalu o Ieova.

¹⁵O e mamao foi latou te o mai e fai le malumalu o Ieova; ona iloa ai lea e outou, ua auina mai a‘u ia te outou e Ieova o ‘au; e oo foi lenei, pe afai tou te matuā faalogo i le siufofoga o Ieova lo outou Atua.