Read Samoan Old Version Bible – O LE TUSI PAIA SAKARIA, 9 Bible Online

SAKARIA, 9 - Samoan Old Version Bible – O LE TUSI PAIA bible

SAKARIA, 9

¹O le avega o le afioga a Ieova i le nuu o Hataraka, a o Tamaseko o lona malologa lea; auā e uai atu ia Ieova o mata o tagata, mai itu aiga uma o Isaraelu.

²O Amato foi o loo tuaoi ai; o Turo ma Saitonu e ui lava ona sili lona poto.

³Ua faia foi e Turo le ‘olo mōna, ma ua faafaupue le ario e pei o le efu, ma le auro e pei o le eleele i fafo.

⁴Faauta, e tulia o ia e le Alii; na te taia foi lona malosi ia paū i le sami; e faaumatia foi o ia i le afi.

⁵E vaai atu i ai Asekelona, ona mata‘u ai lea; o Kasa foi e vaai i ai o ia, ona tiga tele ai lea, atoa ma Ekerona; auā ua faamāina lona faatuatuaga, e fanoia foi le tupu o Kasa, ma Asekelona e le āina ia.

⁶E mau le tagata ese i Asetota; ou te faaumatia foi le matagofie o Filisitia.

⁷Ou te aveesea lona toto ai lona gutu, atoa ma ana mea e inosia nai le va o ona nifo; e faatoeina foi o ia lava mo lo tatou Atua; e fai o ia e pei se alii ia Iuta, a o Ekerona e pei o le sa Iepusē o ia.

⁸Ou te to lauapi i lo‘u fale e sioma‘i ona o le itu taua, i lo latou alu atu ma lo latou foi mai; e le toe alu atu lava lē faasaua ia te i latou; auā o lenei, ua vaavaai o‘u lava mata.

⁹Ia e matuā fiafia o oe le tama fafine a Siona; ia alaga fiafia o oe le tama fafine a Ierusalema; faauta, o le a alu atu lou Tupu ia te oe; o ia o le amiotonu ma le faaola; e agamalu o ia, o loo tietie i le asini, o le tamai asini foi.

¹⁰Ou te faaumatia le kariota i Efaraima, ma le solofanua i Ierusalema, e faaumatia foi le aufana o le taua; na te tautala foi i le leleiga i nuu ese; o lana pule e pau mai i le sami e oo atu i le sami, e pau mai i le vaitafe e oo i tuluiga o le lalolagi.

¹¹O oe foi, ona o le toto o lau feagaiga, ou te tuu atu ai ou tagata ua noanoa e o ese i le lua e le i ai se vai.

¹²Ina foi mai ia i le ‘olo, outou ua noanoa ua i ai le faamoemoe; o lenei lava aso ou te ta‘utino atu, ou te toe avatu faalua ia te oe.

¹³Auā ua ou lo‘ua Iuta mo a‘u; ua ou tuu Efaraima i le fu‘a o le aufana; ou te faaoso atu foi i ou tagata Siona e, e tetee atu i ou tagata Iavana e; ou te faia foi oe peiseai se pelu a se toa.

¹⁴E vaaia Ieova i o latou luga; e alu atu lana u e pei o le uila; e ili mai le pu e le Alii o Ieova; e alu atu foi ia i afā o le itu i toga.

¹⁵O Ieova o ‘au, o ia na te faamamalu ia te i latou; latou te aai, ma soli i lalo i maa o le maatā; latou te feinu, latou te pisapisaō pei o e inu uaina; e faatumuina i latou, pei o se ipu, pei o tulimanu o le fata faitaulaga.

¹⁶E faaolaina i latou e Ieova lo latou Atua i lena aso; e pei o le lafu mamoe lona nuu; auā e fai i latou ma maa o le palealii; o loo siitia i luga i latou i lona laueleele.

¹⁷Auā ua tele naua lona lelei, e tele naua lona matagofie; e faamalosia taulelea i le saito, ma taupou e faamalosia ia i le uaina.