Read Samoan Old Version Bible – O LE TUSI PAIA MALAKI, 1 Bible Online

MALAKI, 1 - Samoan Old Version Bible – O LE TUSI PAIA bible

MALAKI, 1

¹O le avega o le afioga a Ieova ia Isaraelu na aumaia e Malaki.

²Ua ou alofa atu ia te outou, ua fetalai mai ai Ieova; a ua outou fai mai, Ua e alofa mai ia i matou i ni a? E le uso ea Esau ma Iakapo? ua fetalai mai ai Ieova; a ua ou alofa ia Iakopo,

³ma ou ‘ino‘ino ia Esau; ua faia foi e a‘u ona mauga ma mea tuufua, ua faia foi lona tofi ma fale i mea gaogao.

⁴Ua fai mai Etoma, Ua faatafunaina i matou, a e matou te toe faia fale ua masofasofa; o le mea lea, o loo faapea ona fetalai mai ai o Ieova o ‘au, Latou te faia, a o a‘u, ou te lepetia, e ta‘ua i latou, O le laueleele o e amio leaga, ma Le nuu e toasa i ai Ieova e faavavau.

⁵E vaai foi i ai o outou lava mata, ona outou faapea ai lea, Ia viia Ieova mai le laueleele o Isaraelu.

⁶E ava le atalii i lona tamā, e ava foi le auauna i lona alii; afai o a‘u o le tamā, o ifea ni o‘u ava? afai foi o a‘u o le alii, o ifea lo‘u matautia? ua fetalai mai ai Ieova o ‘au ia te outou faitaulaga o e ‘ino‘ino i lo‘u igoa; a ua outou fai mai, Ua matou ino‘ino i lou suafa i ni a?

⁷Ua ‘ino‘ino ina ua outou au mai o mea e ‘ai ua leaga i la‘u fata faitaulaga; a ua outou fai mai, Ua leaga oe ia te i matou i ni a? Ua leaga ina ua outou fai ane, O le laoai a Ieova, o le mea faatauvaa lava lea.

⁸A outou aumaia le mea tauaso e fai ma taulaga, e le leaga ea? A outou aumaia le mea pipili ma le mea e ma‘i, e le leaga ea? Se‘i avatu ia i le alii e pule ia te oe; pe fiafia mai ea o ia ia te oe? pe talia mai oe e ia? ua fetalai mai ai Ieova o ‘au.

⁹O lenei, ia outou ole atu i luma o le Atua ina ia alofa mai o ia ia te i tatou; ua tupu mai ia te outou lenei mea; pe na te talia mai ea outou? ua fetalai mai ai Ieova o ‘au.

¹⁰O ai lava so outou na te punitia fua faitotoa? Tou te le tafu fua le afi i la‘u fata faitaulaga; e leai lava so‘u fiafia ia te outou, ua fetalai mai ai Ieova o ‘au; ou te le talia foi se taulaga ai o outou lima.

¹¹Auā e fua mai i le mea e alu ae ai le la, e oo i le mea e alu ifo ai, e viia ai lo‘u igoa i nuu ese; e aumaia foi le mea manogi e mu i lo‘u igoa i nuu uma lava, atoa ma le taulaga lelei; auā e viia lo‘u igoa i nuu ese, ua fetalai mai ai Ieova o ‘au.

¹²A o outou, ua outou faaleagaina ai, ina ua outou fai ane, Ua leaga le laoai a Ieova; mōna fua, o ana mea e ‘ai lea, o le mea faatauvaa lava.

¹³Ua outou fai ane foi, Aue, o le mea tiga naua! ma outou ‘ino‘ino i ai ua fetalai mai ai Ieova o ‘au; ua outou aumaia foi le mea ua faoa, ma le mea pipili, ma le mea e ma‘i; ua outou au mai ai ma taulaga? Ou te talia ea lea mea ai o outou lima? ua fetalai mai ai Ieova.

¹⁴A ia faafanoina le tagata pepelo ua i ai le poa i lona lafu, a ua tauto o ia ma fai taulaga i le Alii i le mea leaga; auā o le Tupu sili lava a‘u, ua fetalai mai ai Ieova o ‘au; e matautia lava lo‘u igoa i nuu ese.