Read Samoan Old Version Bible – O LE TUSI PAIA MATAIO, 11 Bible Online

MATAIO, 11 - Samoan Old Version Bible – O LE TUSI PAIA bible

MATAIO, 11

¹Ua uma ona poloai e Iesu i ona soo e toasefulu ma le toalua, ona maliu ese ai lea o ia i lea mea, e a‘oa‘o atu ma tala‘i atu i o latou aai.

²Ua lagona e Ioane i le fale puipui o galuega a Keriso, ona aauina mai ai lea e ia ni ona soo se toalua, ua faapea mai ia te ia,

³O oe ea lē maliu mai, pe matou te faatali i se tasi?

⁴Ona tali atu ai lea o Iesu, ua faapea atu ia te i laua, Ina o atu ia oulua, ma faailoa atu ia Ioane o mea na oulua faalogo i ai, ma vaai i ai;

⁵ua pupula tauaso ma ua savavali pipili, ua faamamāina lepela ma ua logo tutuli, ua faatutūina o e na oti ma ua folafolaina foi le tala lelei i e matitiva.

⁶E manuia foi se le tausuai ia te a‘u.

⁷Ua la o, ona oo ane lea o le lauga a Iesu i le motu o tagata ia Ioane, Na outou o atu ea i le vao e matamata i ni a? o le u ea ua luluina e le matagi?

⁸Pe na outou o lava e matamata i ni a? o le tagata ea ua ofu i ofu malulu? faauta, o e oofu i ofu malulu o i maota o tupu i latou.

⁹A o le a ea na outou o atu e matamata i ai? o le perofeta ea? E moni, ou te fai atu ia te outou, E sili lava ia i le perofeta.

¹⁰Auā o ia lea ua tusi mai i ai, Faauta, ou te auina atu la‘u sāvali i ou luma, o le na te teuteua lou ala i ou luma.

¹¹E moni, ou te fai atu ia te outou, e lei tu mai i e na fananau i fafine sē sili ia Ioane le papatiso; a o lē aupito itiiti i le malo o le lagi, e sili lea ia te ia.

¹²Na afua mai i ona po o Ioane le papatiso, ua oo i nei ona po, ua taufaoa ai le malo o le lagi, o loo ua avea faamalosi foi e i latou o taufao.

¹³Auā ua vavalo mai le au perofeta uma ma le tulafono, ua oo lava ia Ioane.

¹⁴Afai foi tou te loto ina talia, o Elia lava lea na tuu e sau.

¹⁵O le ua i ai taliga e faalogo ai, ina faalogo mai ia o ia.

¹⁶Ou te faatusaina i ni a lenei tupulaga?? E tusa ia ma tama iti ua nonofo i malae, ma valaau atu i a latou aumea,

¹⁷ua faapea atu, Ua matou faaili atu ia te outou, a e tou te lei saasaa mai; ua matou tagi aue ia te outou, a e tou te lei taufaitagitu‘i mai.

¹⁸Auā na sau Ioane, e lei ‘ai, e lei inu foi ia; ona latou fai ane ai lea, Ua ia te ia le temoni.

¹⁹Ua sau foi le Atalii o le tagata, ua ‘ai o ia ma inu; ona latou fai ane ai lea, Faauta, o le tagata ‘ai tele ma le inu uaina, o le uo a telona ma ē agasala. A e ta‘uamiotonuina le poto e ana tama.

²⁰Ona faasa‘i atu ai lea o ia i aai na fai ai le tele o ona vavega, auā latou te lei salamo.

²¹Oi talofa ia te oe Koasini! oi talofa ia te oe Petesaita! auā ana faia i Turo ma Saitonu o vavega na faia ia te outou, po ua leva ona latou salamo i le ie talatala ma le lefulefu.

²²O lea ou te fai atu ai ia te outou, E feoloolo Turo ma Saitonu i le aso faamasino ia te outou.

²³O oe foi Kapanaumi, ua faaeaina e oo i le lagi, e lafotuina oe i lalo lava i seoli; auā ana faia i Sotoma o vavega na faia ia te oe, po ua tumau ia ua oo i nei ona po.

²⁴O lea foi ou te fai atu ai ia te outou, E feoloolo le nuu o Sotoma i le aso faamasino ia te oe.

²⁵O lea lava itu aso ua fetalai atu ai Iesu, ua faapea atu, Ou te faafetai ia te oe, lo‘u Tamā e, le Alii o le lagi ma le lalolagi, ina ua e nanā ia mea i e popoto ma e atamamai, a ua faaalia atu ia mea i tama valevale.

²⁶O lea lava, lo‘u Tamā e, auā o lou finagalo lava lea.

²⁷Ua tuuina mai mea uma ia te au e lo‘u Tamā; e leai foi se tasi ua iloa le Atalii, ua na o le Tamā; e leai foi se tasi ua iloa le Tamā, ua na o le Atalii, ma se ua loto le Atalii e faaali atu i ai.

²⁸Ia outou o mai ia te au, o outou uma o e tigaina ma mafatia i avega, o a‘u foi e malolo ai outou.

²⁹Ia outou amoina la‘u amo, ma ia outou faaa‘oa‘o ia te au, auā o a‘u lē agamalu ma le loto maulalo; ona maua lea e outou o le malologa mo outou agaga.

³⁰Auā e avegofie la‘u amo, o la‘u avega foi e māmā ia.