Read Samoan Old Version Bible – O LE TUSI PAIA MATAIO, 12 Bible Online

MATAIO, 12 - Samoan Old Version Bible – O LE TUSI PAIA bible

MATAIO, 12

¹O ia ona aso ua ui atu ai Iesu i tosaito i le sapati; ua fia aai foi ona soo, ona ooti ai lea e i latou o ‘au saito, ma aai ai.

²Ua iloa atu e le au faresaio, ona latou faapea atu ai lea ia te ia, Faauta, ua faia e ou soo le mea e sa ona fai i le sapati.

³A ua fetalai atu o ia ia te i latou, E lei faitaulia ea e outou le mea na faia e Tavita, ina ua fia ‘ai o ia, atoa ma i latou sa ia te ia;

⁴na ulufale ia i le fale o le Atua, na ‘ai foi o ia areto ua laulauina i luma, o mea o sa ona ‘ai ai o ia, atoa ma i latou sa ia te ia, e gata lava i le au faitaulaga?

⁵E lei faitaulia ea foi e outou i le tulafono, o sapati uma ua solia ai le sapati e le au faitaulaga i le malumalu, a e le sala i latou?

⁶Ou te fai atu foi ia te outou, O iinei le ua sili i le malumalu.

⁷Ana outou iloa le uiga o lea upu, Ou te loto i le alofa, a e le o le taulaga, po ua outou le faasalaina o e le sala.

⁸Auā o le Atalii o le tagata, o le Alii lava ia o le sapati.

⁹Ua maliu ese ia i lea mea, ona ulu atu ai lea o ia i lo latou sunako.

¹⁰Faauta foi, sa i ai le tagata ua gase lona lima; ona latou fesili mai ai lea ia te ia, ua faapea mai. E tatau ea ona faamalolo i le sapati? ina ia latou momoli ia te ia.

¹¹Ona fetalai atu ai lea o ia ia te i latou, O ai ea so outou e ana le mamoe e tasi, afai foi e paū o ia i le lua i le sapati, e le tago ea i ai, ma avae i luga?

¹²e le sili lava ea le tagata i le mamoe? o lea e tatau ai ona agalelei i le sapati.

¹³Ona fetalai atu ai lea o ia i le tagata, Ina faaloaloa ia o lou lima. Ona faaloaloa ai lea e ia, ona toe lelei ai lea, ua pei o le tasi.

¹⁴A ua o i fafo le au faresaio, ona latou taupulepule ai lea ia te ia, ina ia latou fasioti ia te ia.

¹⁵A ua silafia e Iesu, ona maliu ese ai lea o ia i lea mea; ua mulimuli mai foi ia te ia le motu o tagata e toatele; ona faamaloloina ai lea e ia o i latou uma;

¹⁶ua matua fetalai atu foi o ia ia te i latou, aua ne‘i latou faalaua‘i tele ia;

¹⁷ina ia taunuu ai le upu a le perofeta o Isaia, ua faapea mai.

¹⁸Faauta, o la‘u auauna na ou filifilia, o la‘u pele o loo fiafia i ai lo‘u loto; ou te tuuina atu lo‘u Agaga i ona luga, e faailoa atu e ia le faamasinoga i nuu ese;

¹⁹e le finau ia, e le alaga foi o ia, e le lagona foi lona leo e se tasi i ala.

²⁰E le gagau e ia le u ua gapēpē, e le tinei foi e ia le vavae ua mu itiiti; seia faamanumalo e ia le faamasinoga.

²¹O lona igoa foi e faamoemoe i ai nuu ese.

²²Ona aumaia lea ia te ia o le tagata ua uluitinoina e le temoni, o le tauaso foi o ia ma gūgū; ona faamaloloina ai lea e ia o ia, ona tautala ai lea ma vaai lē sa tauaso ma gūgū.

²³Ona taufaiofo ai lea o le motu o tagata uma, ua faapea ane, E le o le atalii ea lenei o Tavita?

²⁴A ua lagona e le au faresaio, ona latou fai ane ai lea, Aua le se anoa Pelesepulo le alii o temoni, e le tulia e lena tagata o Temoni.

²⁵A ua silafia e Iesu o latou manatunatu, ona fetalai atu ai lea o ia ia te i latou, O malo uma ua fevaevaeai e faaumatia ia; o aai uma foi po o aiga e fevaevaeai e lē tumau ia.

²⁶Afai foi e tulia e Satani ia Satani, ona fevaevaeai lea o ia ia te ia; pe faapefea foi ona tumau o lona malo?

²⁷Afai foi o Pelesepulo ou te tulia ai e a‘u temoni, po o ai ua tulia ai temoni e a outou fanau? O le mea lea e fai ai i latou ma faamasino ia te outou.

²⁸A e afai o le Agaga o le Atua ou te tulia ai e a‘u o temoni, ua oo mai lava ia te outou le malo o le Atua.

²⁹E mafai faapefea se tasi ona ulu atu i le fale o le tagata malosi, ma vete ana mea? seia muai fusifusia le tagata malosi, i le vete ai lona fale.

³⁰O se le ‘au ia te au, e ‘au ese lea ia te au; o se le faaputu faatasi ma a‘u, e faataapeape lea.

³¹O le mea lea ou te fai atu ai ia te outou, O agasala uma ma upu leaga e faamagaloina ia i tagata; a o le upu leaga i le Agaga, e le faamagaloina lea i tagata.

³²Ai sē fai upu i le Atalii o le tagata, e faamagaloina lea; a o lē fai upu i le Agaga Paia, e le faamagaloina lea i le olaga nei po o lē atali.

³³Ia outou ta‘ua le laau e lelei, ia lelei foi ma ona fua; a le o lea, ia outou ta‘ua le laau e leaga, ia leaga foi ma ona fua; auā o ona fua ua iloga ai le laau.

³⁴Fanau a gata feai e, outou o loo leaga, e mafaia faapefea ona outou upu lelei? auā o le tele o mea i le loto e tautala mai ai le gutu.

³⁵Ua au mai mea lelei e le tagata amio lelei i mea lelei ua teu i lona loto; o le tagata amio leaga foi, ua au mai mea leaga i mea leaga ua teu i lona loto.

³⁶A ou te fai atu ia te outou, o upu faatauvaa uma e faia e tagata, latou te talatala atu ai le tala i le aso faamasino.

³⁷Auā o au upu e ta‘uamiotonuina ai oe, o au upu foi e faasalaina ai oe.

³⁸Ona tali mai ai lea o isi o le au tusiupu ma le au faresaio, ua faapea mai, Le a‘oa‘o e, ua matou fia iloa se faailoga ia te oe.

³⁹A ua tali atu o ia, ua faapea atu ia te i latou, O le tupulaga leaga ma le mulilulua ua latou sailia mai se faailoga; a e leai se faailoga e avatua i ai, ua na o le faailoga o Iona le perofeta.

⁴⁰Auā e pei o Iona sa i le manava o le i‘a tele i ao e tolu ma po e tolu, e faapea foi ona i ai o le Atalii o le tagata i lalo i le eleele i ao e tolu ma po e tolu.

⁴¹E tutū mai tagata o Nineva i le faamasinoga faatasi ma le tupulaga nei, e faasala i ai; auā na latou salamo i le tala‘iga a Iona; faauta foi, o iinei lē sili ia Iona.

⁴²E tutū mai faatasi le tupu fafine o le itu i toga ma le tupulaga nei i le faamasinoga, e faasala i ai; auā na sau o ia mai le gataaga o le lalolagi e faalogologo i le poto o Solomona; faauta foi, o iinei lē sili ia Solomona.

⁴³Pe a alu i fafo i le tagata le agaga leaga, ona fealuai ai lea o ia i nuu naumati, ua saili se malologa, a e le maua.

⁴⁴Ona faapea ane ai lea o ia, Ou te foi atu i lo‘u fale na ou sau ai; ua alu i ai, ona iloa ai lea ua tuufua, ua uma foi ona tafitafi ma teuteu.

⁴⁵Ona alu ai lea o ia, ua na aumaia isi agaga e toafitu e sili lo latou leaga i lona, ona latou ulufale atu ai lea, ua nonofo ai; ona sili ai lea o le leaga o le iuga o lea tagata i lona amataga. E faapea foi ona fai i lenei tupulaga leaga.

⁴⁶Ua tautala ia i le motu o tagata, faauta, ua tutū mai i fafo o lona tinā ma ona uso, ua fia tautala ma ia.

⁴⁷Ona fai mai ai lea o le tasi ia te ia, Faauta, ua tutū mai i fafo lou tinā ma ou uso, ua fia tautala ma oe.

⁴⁸Ona tali atu ai lea o ia, ua faapea atu i le na ta‘u mai ia te ia, O ai ea lo‘u tinā? o ai foi o‘u uso?

⁴⁹Ona faaloaloa ai lea e ia o lona aao i ona soo, ua faapea atu, Faauta, o lo‘u tinā ma o‘u uso,

⁵⁰Auā o lē faia le finagalo o lo‘u Tamā o i le lagi, o lo‘u uso lea, ma lo‘u tuafafine, ma lo‘u tinā.