Read Samoan Old Version Bible – O LE TUSI PAIA MATAIO, 13 Bible Online

MATAIO, 13 - Samoan Old Version Bible – O LE TUSI PAIA bible

MATAIO, 13

¹O lea lava aso ua ulufafo ai Iesu nai le fale, ua nofo i lalo e latalata ane i le vai;

²ona faapotopoto mai ai lea ia te ia o le motu o tagata e toatele, o le mea lea na maliu ae ai o ia i le vaa, ua nofo ai; ua tutū mai foi le motu o tagata uma i le auvai.

³Ona fetalai atu lea o ia ia te i latou i mea e tele i faataoto, ua faapea atu, Faauta, ua alu atu le tagata lulu saito e lulu ai saito.

⁴Ua ia lulu saito, ua pa‘u ai isi i le auala; ona o ane lea o manu felelei, ma aai ai.

⁵Ua paū foi isi i le mea papa, e itiiti le eleele sa i ai; ona vave tupu ai lea, ona o le eleele ina itiiti;

⁶ua alu ae le la, ua velasia; ona magumagu ai lea, ona ua leai ni aa.

⁷Ua paū foi isi i le vao tuitui, ua tutupu ae foi le vao tuitui, ona fetinaiina ai lea.

⁸A ua paū isi i le eleele lelei, ona fua mai ai lea e taiselau i nisi ma taionogafulu i nisi ma taitolugafulu i nisi.

⁹O le ua i ai taliga e faalogo ai, ina faalogo mai ia o ia.

¹⁰Ona o mai ai lea o ona soo, ua faapea mai ia te ia, Se a le mea ua e fetalai atu ai ia te i latou i faataoto?

¹¹Ona tali atu ai lea o ia, ua faapea atu ia te i latou, Ua foaiina atu ia te outou ia outou iloa mea lilo a le malo o le lagi, a ua le foaiina atu ia te i latou.

¹²Auā o le ua i ai mea, e foaiina atu ia te ia, e atili tele ai ana mea; a o se le i ai mea, e aveeseina foi ia te ia le mea ua ia te ia.

¹³O le mea lea ou te tautala atu ai ia te i latou i faataoto, auā o lo latou vaai latou te le vaai ai, o lo latou faalogo foi, latou te le faalogo ai, pe lagona.

¹⁴Ua taunuu ai ia te i latou le valoaga a Isaia, ua faapea mai, E faalogo lava outou, a e tou te le lagona; e matuā vaavaai foi outou, a e tou te le iloa.

¹⁵Auā ua mafiafia loto o lenei nuu, ma ua faalogo gata o latou taliga i faalogo, ua moeiini foi o latou mata; ne‘i vaai o latou mata, ma faalogo o latou taliga, ma lagona o latou loto ma liliuina i latou, ma ou faamaloloina i latou.

¹⁶Amuia o outou mata, auā ua vaavaai; ma o outou taliga, auā ua faalogo;

¹⁷auā e moni, ou te fai atu ia te outou, E toatele perofeta ma tagata amiotonu sa naunau i le fia iloa o mea ua outou vaai i ai, a e lei iloa; na latou fia faalogo foi i mea ua outou faalogo i ai, a e lei faalogo ai lava.

¹⁸O lenei, ina faalogologo mai ia outou i le faataoto i le tagata lulu saito.

¹⁹A faalogo se tasi i le upu o le malo, a e le lagona, ona alu ane ai lea o le ua leaga, ua fao le mea sa luluina i lona loto; o le mea lea sa luluina i le auala.

²⁰A o le mea sa luluina i le mea papa, o le tagata lea ua faalogo i le upu, ona talia loa lea ma le fiafia;

²¹a ua leai ni aa ia te ia, ua faaletumau ia; auā pe a tupu le puapuaga, po o le sauaga ona o le upu, ona tausuai loa lea o ia.

²²O le mea sa luluina i le vao tuitui, o ia lea ua faalogo i le upu, a o le loto popole i mea a lenei lalolagi, ma le pepelo o le oa ua fetinaiina ai le upu, ona le fua mai lava lea.

²³A o le mea sa luluina i le eleele lelei, o ia lea ua faalogo i le upu, ma lagona ai; ua fua mai lava ia, e taiselau i nisi, e taiono gafulu i nisi, e taitolugafulu foi i nisi.

²⁴Ua sauni atu e ia le tasi faataoto ia te i latou, ua faapea atu, Ua faatusaina le malo o le lagi i le tagata ua luluina le saito lelei i lona fanua;

²⁵ua momoe tagata, ona alu ane ai lea o le ua ita mai ia te ia, ua na luluina le titania i totonu o le saito, ona alu ese ai lea o ia.

²⁶Ua totogo ae le saito, ma fua mai, ona iloa ai lea o le titania.

²⁷Ona o mai ai lea o auauna a le matai o le aiga, ua faapea mai ia te ia, Le alii e, e le o le saito lelei ea na e luluina i lou fanua? O lenei, pe naifea nei titania?

²⁸Ona fai atu ai lea o ia ia te i latou, Ua fai lenei mea e se tagata ua ita mai. Ona fai mai ai lea o auauna ia te ia, E te finagalo ea matou te o atu e veleeseina ia mea?

²⁹A ua fai atu ia, Aua; ina ne‘i outou liai ma le saito pe a outou vele ese le titania.

³⁰Tuu ia, ia tupu lua pea seia oo i le seleselega; a oo atu i ona po e selesele ai, ou te fai atu ai i e selesele, Ia outou muai faapotopoto mai le titania, ma outou fusia i fusi e susunu ai; a o le saito, tou te faaputuina lea i lo‘u fale saito.

³¹Ua sauni atu e ia le tasi faataoto ia te i latou, ua faapea atu, E tusa le malo o le lagi ma le fua o le sinapi, na ave e le tasi tagata, ma totō i lona fanua;

³²e itiiti lava ia i fua o laau uma; pe a uma ona tupu, e sili ia i laau afu, e iu ina fai ma laau tele, e o mai ai manu felelei, ma latou momoe i ona la.

³³Ua fetalai atu e ia le tasi faataoto ia te i latou, E tusa le malo o le lagi ma le mea faafefete, na ave e le fafine, ma tuu i totonu o le falaoa e tolu tumu, ua oo ina faafefeteina uma ai.

³⁴Ua fealai atu Iesu ia mea uma i le motu o tagata i faataoto, ua na o faataoto na fetalai atu ai o ia ia te i latou.

³⁵Ina ia taunuu ai o le upu a le perofeta, ua faapea mai, Ou te tautala atu i faataoto, ou te ta‘u atu mea na lilo talu ona faavaeina o le lalolagi.

³⁶Ona tuuna ai lea e Iesu o le motu o tagata, ua ulufale atu ai i le fale; ona o mai ai lea ia te ia o ona soo, ua faapea mai, Ia e faamatala mai ia te i matou le faataoto i le titania i le fanua.

³⁷Ona tali atu ai lea o ia, ua faapea atu ia te i latou, O lē lulu le saito lelei, o le Atalii lea o le tagata;

³⁸a o le fanua, o le lalolagi lea; o le saito lelei, o tagata ia o le malo; o le titania, o le fanau ia a le ua leaga;

³⁹o le ua ita mai na na luluina ia mea, o le tiapolo lea; o le seleselega, o le gataaga lea o le lalolagi; o e selesele, o agelu ia.

⁴⁰O lea e pei ona faaputuina ai o le titania, ma susunuina i le afi, e faapea foi ona faia i le gataaga o lenei lalolagi.

⁴¹E aauina atu e le Atalii o le tagata ana agelu, latou te faapotopotoina nai lona malo mea uma e tausuai ai ma ē amio leaga.

⁴²E lafoina i latou i totonu o le ogāumu aasa; e i ai le tagiaue ma le lilivau o nifo.

⁴³Ona pupula ai lea o e amiotonu e pei o le la i le malo o lo latou Tamā. O le ua i ai taliga e faalogo ai, ina faalogo mai ia o ia.

⁴⁴E tusa foi le malo o le lagi i le oa ua natia i le fanua; ua iloa e le tasi, ona nanā ai lea e ia; ua alu foi ma le fiafia, ma faatau atu ana mea uma, i le faatau a‘i mai lea fanua.

⁴⁵E tusa foi le malo o le lagi ma le tagata faatauoa, ua sailiili penina lelei;

⁴⁶ua iloa e ia le tasi penina tau tele, ona alu ai lea o ia, ua faatau atu ana mea uma, i le faatau a‘i mai.

⁴⁷E tusa foi le malo o le lagi ma le upega ua lafo i le vai, ua maua ai i‘a eseese uma.

⁴⁸Ua tumu, ona latou toso ae ai lea i le matafaga, ua nonofo ma fafao i‘a lelei i ola, a o i‘a leaga ua lafoai.

⁴⁹E faapea foi i le gataaga o le lalolagi; e o atu le au agelu e vavae ese i e amio leaga ma e amiotonu,

⁵⁰ona latou lafoina lea ia te i latou i le ogāumu aasa; e i ai le tagiaue ma le lilivau o nifo.

⁵¹Ona fetalai atu lea o Iesu ia te i latou, Ua outou lagona ea nei mea uma? Ua latou fai mai ia te ia, Ioe, le Alii e.

⁵²Ona fetalai atu lea o ia ia te i latou, O lenei, o tusiupu uma o e ua a‘oa‘oina i le malo o le lagi, e tusa i latou ma le matai o le aiga, ua au mai mea fou ma mea tuai mai lona fale oloa.

⁵³Ua faaiu e Iesu nei faataoto, ona maliu ese ai lea o ia i lea mea.

⁵⁴Ua oo atu ia i lona lava nuu, ona a‘oa‘o atu ai lea o ia ia te i latou i lo latou sunako; ua latou taufaiofo ai, ua faapea ane, Po o fea na maua ai e lenei tagata lenei poto ma ia vavega?

⁵⁵E le o le atalii ea lenei o le tufuga? e le o Maria ea le igoa o lona tinā, o ona uso foi o Iakopo, ma Iose, ma Simona, ma Iuta?

⁵⁶E le o ia te i tatou ea ona tuafāfine uma? po o fea foi na maua ai e lenei tagata nei mea uma?

⁵⁷Ona latou tausuai ai lea ia te ia. A ua fetalai atu Iesu ia te i latou, E leai se perofeta e le mamalu, ua na o lona lava nuu ma lona aiga e le mamalu ai.

⁵⁸Ua le tele foi ni vavega na na faia i lea mea, ona o lo latou le faatuatua.