Read Samoan Old Version Bible – O LE TUSI PAIA MATAIO, 14 Bible Online

MATAIO, 14 - Samoan Old Version Bible – O LE TUSI PAIA bible

MATAIO, 14

¹O ia ona po ua lagona ai e le tupu o Herota le tala ia Iesu;

²ona fai atu lea o ia i ana auauna, O Ioane le papatiso lena; ua tu mai o ia i e ua oti; o le mea foi lea ua fai ai vavega e ia.

³Auā na pue e Herota ia Ioane, ua fusifusi foi ia te ia, ma tuuina atu o ia i le fale puipui, ona o Herotia le avā a Filipo lona uso.

⁴Auā na fai atu Ioane ia te ia. E sa ona fai o ia mau avā.

⁵Ua ia fia fasioti ia te ia, a ua mata‘u i le motu o tagata, auā o la latou taofi o le perofeta ia.

⁶Ua oo ina fai le faamanatuga o le aso na fanau mai ai Herota, na saasaa i o latou luma le tama teine a Herotia, na ia faafiafia foi ia Herota.

⁷O le mea lea na ia matuā fai atu ai ia te ia ma le augani na te avatu ia te ia se mea na te ole mai ai.

⁸A o ia, ua faaosoina e lona tinā, ua fai atu, Ia e au mai iinei ia te au le ulu o Ioane le papatiso i se tanoa.

⁹Ona tiga ai lea o le tupu; a ona o le augani, ma e ua taooto e aai faatasi ma ia, ua ia poloai atu e avatua.

¹⁰Ona auina atu ai lea e ia se tasi, ua vavae mai le ulu o Ioane i le fale puipui.

¹¹Ona au mai ai lea o lona ulu i le tanoa, ua avane i le teine, ua na aveina atu foi i lona tinā.

¹²Ona o ane ai lea o ona soo, ua ave le tino, na tanu ai; ua latou o mai foi, ma ta‘u mai ia Iesu.

¹³Ua faafofoga i ai Iesu, ona maliu ese ai lea o ia i lea mea i le vaa i le mea tuufua ua na o ia. Ua faalogo ai le motu o tagata, ona latou mulimuli atu ai lea ia te ia, ua ui a uta mai aai.

¹⁴Ua maliu atu Iesu, ua na silafia le motu o tagata e toatele, ona mutimuti vale ai lea o lona alofa ia te i latou, ua faamalolo foi e ia o latou ma‘i.

¹⁵Ua oo i le afiafi, ona o mai ai lea o ona soo ia te ia, ua faapea mai, O le mea tuufua lenei, ua leva foi le aso; ia e tuuina atu le motu o tagata, ina ia latou o i aai e faatau ni mea e ‘ai mā latou.

¹⁶A ua fetalai atu Iesu ia te i latou, E le aoga ona latou o; ia outou avane ni mea latou te aai ai.

¹⁷Ona latou fai mai lea ia te ia, E leai ni a tatou mea iinei, ua na o areto e limagafua ma i‘a e lua lau.

¹⁸Ua fetalai atu o ia, Aumaia iinei ia te au.

¹⁹Ona fetalai atu ai lea o ia i le motu o tagata ia latou taooto i le mutia. Ona tago lea o ia i areto e limagafua ma i‘a e lua lau, ua tepa ae i le lagi, ua faafetai; ua ia tofitofi foi i areto, ma avatu i le au soo, ona avatu ai lea e le au soo i le motu o tagata.

²⁰Ona aai ai lea o i latou uma lava, ua maoona; ua latou fu‘e foi toe ‘aiga, ua tutumu ai ato e sefulu ma le lua.

²¹O i latou foi na aai pe limagaafe o tane, a e lei faitaulia fafine ma tama iti.

²²Ona uunai loa lea o Iesu i ona soo e o ae i le vaa, e muamua atu ia te ia i le tasi itu, seia tuuina atu e ia le motu o tagata ia ō.

²³Ua tuuina atu e ia le motu o tagata ia ō, ona maliu ae lea ua na o ia i le mauga e tatalo. Ua oo i le afiafi, ua na o ia sa i ai.

²⁴A o le vaa ua i totonu o le vasa ua felafoaiina i le sou; auā ua agi mai i luma le matagi.

²⁵Ua maliu atu Iesu ia te i latou i le leoleoga e fa o le po, ua savali i luga o le vai.

²⁶Ua iloa mai e le au soo o ia ua savali i luga o le vai, ona latou atuatuvale ai lea, ua faapea ane, O le aitu; ona latou uio ai lea i le matatau.

²⁷Ona fetalai atu loa lea o Iesu ia te i latou, ua faapea atu, Ia outou loto tetele; o a‘u lava, aua tou te matatau.

²⁸Ua tali mai Peteru ia te ia, ua faapea mai, Le Alii e, afai o oe, ia e fetalai mai ia te au, ou te alu atu ia te oe i luga o le vai.

²⁹Ona fetalai atu ai lea o ia, Ina sau ia. Ona alu ifo ai lea o Peteru nai le vaa, ua savali i luga o le vai e alu ia Iesu.

³⁰Ua vaai ia i le matagi ua tetele, ona fefe ai lea; ona afua ai lea ona goto, ua alaga, ua faapea mai, Le Alii e, ia e faaola mai ia te au.

³¹Ona aapa atu loa lea e Iesu o lona aao, ua tago ia te ia, ua faapea atu ia te ia, O oe na lē faatuatua itiiti, se a le mea ua e masalosalo vale ai?

³²Ona la o ae lea i le vaa, ona malū ai lea o le matagi.

³³Ona o mai ai lea o e na i le vaa, ua ifo mai ia te ia, ua faapea mai, E moni, o oe lava o le Alo o le Atua.

³⁴Ua o atu i latou i le tasi itu, ua oo i le nuu o Kenesareta.

³⁵Ua iloa mai o ia e tagata o lea nuu, ona latou feau atu ai lea i lea itu uma lava, ua latou au mai ai ia te ia o e mamai uma lava;

³⁶ma ua latou aioi mai ia te ia, tau lava ina latou papai i le tuupao o lona ofu; ua faamaloloina foi o i latou uma e na papai mai i ai.