Read Samoan Old Version Bible – O LE TUSI PAIA MATAIO, 15 Bible Online

MATAIO, 15 - Samoan Old Version Bible – O LE TUSI PAIA bible

MATAIO, 15

¹Ona o mai ai lea ia Iesu o tusiupu ma faresaio mai Ierusalema, ua faapea mai,

²Se a le mea ua soli ai e ou soo le uputuu a ē anamua? auā ua le fafano o latou lima pe a latou aai.

³A ua tali atu ia, ua faapea atu ia te i latou, Se a le mea ua soli ai e outou foi le poloaiga a le Atua i a outou uputuu?

⁴Auā ua poloai mai le Atua, ua faapea mai, Ia e ava i lou tamā ma lou tinā; i le ma lea, O lē upu leaga i le tamā po o le tinā, ia fasiotia lava ia.

⁵A ua outou fai mai, Ai se fai ane i le tamā po o le tinā, ai se mea ua ia te au e aoga ia te oe, o le taulaga lea;

⁶ona le toe ava lea o ia i lona tamā po o lona tinā. Ua faapea ona outou faaleaogaina le poloaiga a le Atua i a outou uputuu.

⁷O outou tagata pepelo, e tatau lava ia te outou le valoaga a Isaia, ua faapea mai,

⁸Ua faalatalata mai ia te au lenei nuu i o latou gutu, ma vivii mai ia te au i oo latou laugutu, a o latou loto ua taumamao ia te au.

⁹E tapuai fua mai i latou ia te au i lo latou fai ma mataupu o poloaiga a tagata.

¹⁰Ona valaau atu lea o ia i le motu o tagata, ua fetalai atu ia te i latou, Faalogo mai ia, ma ia outou lagona.

¹¹E le o le mea ua tuu i le gutu e leaga ai le tagata, a o le mea e sau mai le gutu, o lea ua leaga ai le tagata.

¹²Ona o mai ai lea o ona soo ia te ia, ua fai mai ia te ia, Ua e silafia ea ua tiga le au faresaio i lo latou faalogo i lea upu?

¹³A ua tali atu ia, ua faapea atu, O laau uma e lei totōina e lo‘u Tamā o i le lagi, e liaiina ia.

¹⁴Tuu pea ia i latou, o tauaso i latou e ta‘ita‘i i e ua tauaso; afai foi e ta‘ita‘iina le tauaso e le tauaso, ona la pauu uma ai lea i le lua.

¹⁵Ona tali mai ai lea o Peteru, ua faapea mai ia te ia, Ia e faamatala mai ia te i matou lena faataoto.

¹⁶Ona fetalai atu ai lea o Iesu, Tou te le āu lagona foi ea e outou?

¹⁷Tou te le āu iloa ea, o mea uma ua tuu i le gutu, ua oo ia i le manava, ona lafoaiina lea i le māliuga?

¹⁸A o mea e sau mai le gutu, ua alu ae ia mai le loto, o mea ia e leaga ai le tagata.

¹⁹Auā e alu ae mai le loto o le manatu leaga, o le fasioti tagata, ole mulilua, o le faitaaga, o le gaoi, o le molimau pepelo, ma le upu leaga.

²⁰O mea ia e leaga ai le tagata; a o le ‘ai ma lima e lei fafano, e le o lea e leaga ai le tagata.

²¹Ua maliu ese Iesu i lea mea, ona oo atu ai lea o ia i le laueleele o Turo ma Saitonu.

²²Faauta foi, o le fafine o Kanana ua sau mai lea lava itu, ua alaga mai ia te ia, ua faapea mai, Le Alii e, le alo o Tavita, ia e alofa mai ia te au; ua leaga lava la‘u tama teine i le temoni ua i ai.

²³A ua leai se upu na ia tali atu ai ia te ia. Ona o mai ai lea o ona soo, ua aioi mai ia te ia, ua faapea mai, Ia e tuuina atu ia te ia e alu, auā ua mulimuli mai o ia, ma alaga mai ia te i tatou.

²⁴A ua tali atu ia, ua faapea atu, E lei auina mai a‘u i nisi, a e tau lava o mamoe o le aiga o Isaraelu ua le iloa.

²⁵Ona sau ai lea o ia, ua ifo ia te ia, ua faapea mai, Le Alii e, ia e fesoasoani mai ia te au.

²⁶Ona tali atu ai lea o ia, ua faapea atu, E le tatau ona ave le mea e ‘ai a le fanau, ma lafo i ulī.

²⁷Ona fai mai ai lea o ia, Le Alii e, e moni a oe; auā foi ua aai e ulī o momoi mea ua pauu i laulau a o latou tāula.

²⁸Ona tali atu ai lea o Iesu, ua faapea atu ia te ia, Funa e, ua tele lou faatuatua; e pei o lou manao, ia faapea lava ona faia ia te oe. Ona malolo ai lea o lana tama teine i lea lava itu aso.

²⁹Ua maliu ese Iesu i lea mea, ona oo atu ai lea o ia e lata ane i le vai o Kalilaia; ua maliu ae i le mauga, ua nofo ai i lalo.

³⁰Ona o mai ai lea ia te ia o le motu o tagata e toatele, ua ia te i latou o e pipili, o e tauaso, o e gūgū, o e mumutu, atoa ma nisi e toatele, ua latou tuu atu ia i latou i vae o Iesu; ona faamalolo ai lea e ia o i latou.

³¹Ona taufaiofo ai lea o le motu o tagata ina ua latou iloa atu o e sa gūgū ua tautala, o e sa mumutu ua atoatoa, o e sa pipili ua savavali, o e sa tauaso foi ua vaai; ona latou vivii atu ai lea i le Atua o Isaraelu.

³²Ona valaau atu ai lea o Iesu i ona soo, ua faapea atu, Ou te alofa atu i le motu o tagata, auā o le aso tolu lenei o tatou nonofo ma i latou, e leai foi ni a latou mea e ‘ai. Ou te le mafai ona tuuina atu ia te i latou e ō mātelaina, ne‘i latou lailoa i le ala.

³³Ona fai mai ai lea o ona soo ia te ia, Tatou te maua ifea ea i le vao ni areto e tele, ina ia maoona ai le motu o tagata ua toatele naua?

³⁴Ona fetalai atu ai lea o Iesu ia te i latou, E fia ea ni a outou areto? Ona latou fai mai ai lea, E fitu, ma nai i‘a lāuiti.

³⁵Ona fetalai atu ai lea o ia i le motu o tagata ia latou taooto i lalo;

³⁶ona tago ai lea o ia i areto e fitu ma i‘a, ua faafetai, ma tofitofi, ona avatu ai lea e ia i ona soo, ona avatu ai lea e le au soo i le motu o tagata.

³⁷Ona aai ai lea o i latou uma lava, ua maoona; ua latou fu‘e foi i toe ‘aiga, ua tutumu ai ete e fitu.

³⁸O i latou foi na aai e toafagaafe o tane, a e lei faitaulia fafine ma tama iti.

³⁹Ua tuuina atu e ia le motu o tagata e ō, ona maliu ae ai lea o ia i le vaa, ua alu atu i le nuu o Makatala.