Read Samoan Old Version Bible – O LE TUSI PAIA MATAIO, 16 Bible Online

MATAIO, 16 - Samoan Old Version Bible – O LE TUSI PAIA bible

MATAIO, 16

¹Ona o mai ai lea o le au faresaio ma le au satukaio, ua latou faaosooso ia te ia, ua fai mai ia faaali atu ia te i latou se faailoga mai le lagi.

²A ua tali atu o ia, ua faapea atu ia te i latou, A oo i le afiafi ua outou fai ane, E laofie; auā ua mūmū mai le lagi.

³O le taeao foi ua outou fai ane, E uaga le asō; auā ua mūmū mai, ma faamalumalu ifo le lagi. O outou tagata pepelo, ua outou iloa ona mātauina amio a le lagi, a o faailoga o tausaga tou te le mafaia ea?

⁴O le tupulaga leaga ma le mulilulua ua saili mai se faailoga; a e leai se faailoga e avatu i ai, ua na o le faailoga o Iona le perofeta. Ona tuua ai lea e ia o i latou, ua maliu ese.

⁵Ona oo atu ai lea o ona soo i le tasi itu, ua galo ia te i latou ona ave ni areto.

⁶Ua fetalai atu Iesu ia te i latou, Ia outou, ia matuā ‘alo ese i le mea faafefete a le au faresaio ma le au satukaio.

⁷Ona latou felafolafoai ai lea, ua faapea ane, O lana fetalaiga lea ina ua tatou le au mai ni areto.

⁸A ua silafia e Iesu, ona fetalai atu ai lea o ia ia te i latou, Se a le mea ua outou felafolafoai ai, o outou e faatuatua itiiti, ina ua le aumaia e outou ni areto?

⁹Tou te le āu lagona ea, tou te le manatua foi i areto e lima ma le toalimagaafe, pe fia ato na outou fu‘e ai?

¹⁰o areto foi e fitu ma le toafagaafe, pe fia ete na outou fu‘e ai?

¹¹E le lagona faapefea outou, e le o le areto na ou fai atu ai ia te outou, ia matuā ‘alo ese i le mea faafefete a le au faresaio ma le au satukaio?

¹²Onā latou lagona ai lea, e le o le mea faafefete o le areto na fetalai atu ai o ia ia matuā alo ese ai, a o le mataupu a le au faresaio ma le au satukaio.

¹³Ua maliu atu Iesu i le laueleele o Kaisareia Filipo, ona fesili atu ai lea o ia i ona soo, ua faapea atu, Pe se a le upu a tagata ia te au le Atalii o le tagata, po o ai?

¹⁴Ona latou fai mai ai lea, O le upu a isi, o oe o Ioane le papatiso; a o isi, o Elia, a o isi, o Ieremia, po o se tasi o le au perofeta.

¹⁵Ona fetalai atu lea o ia ia te i latou, A o outou, pe se a la outou upu ia te au, po o ai?

¹⁶Ona tali mai ai lea o Simona Peteru, ua faapea mai, O oe o le Keriso, o le Alo o le Atua soifua.

¹⁷Ona tali atu ai lea o Iesu, ua faapea atu ia te ia, Amuia oe Simona Pāiona; auā e le se tagata na ia faaali atu ai ia te oe, a o lo‘u Tamā o i le lagi.

¹⁸Ou te fai atu nei a‘u ia te oe, O Peteru oe, ou te ati ae foi la‘u ekalesia i luga o lenei papa, e le mafaia foi e faitotoa o seoli ona manumalo i ai.

¹⁹Ou te avatu foi ia te oe ki o le malo o le lagi; o se mea foi e te fusifusia i le lalolagi, e fusifusia foi lea i le lagi; o se mea foi e te tālā i le lalolagi, e tatalaina foi lea i le lagi.

²⁰Ona vavao atu ai lea e ia i ona soo, aua ne‘i latou ta‘uta‘u atu i se tasi, o ia o Iesu le Keriso.

²¹O ona po ia na amata ai e Iesu ona faailoa atu i ona soo, e tatau ona alu o ia i Ierusalema, e faatigaina foi i mea e tele e toeaina ma le au faitaulaga sili, ma le au tusiupu, e fasiotia foi o ia, e faatuina foi o ia i le aso tolu.

²²Ona ta‘ita‘i ane ai lea e Peteru, ia te ia, ua vavao ia te ia, ua faapea mai, Le Alii e, ia mamao ia te oe lea mea; e le oo lena mea ia te oe.

²³Ona fāliu atu ai lea o ia, ua faapea atu ia Peteru, Satani e, ina alu ia oe i o‘u tua, ua fai oe ma mea ou te tausuai ai; auā e le o mea a le Atua ua e loto i ai, a o mea a tagata.

²⁴Ona fetalai atu ai lea o Iesu i ona soo, Ai se tasi e fia mulimuli mai ia te au, aua ne‘i usiusitai o ia ia te ia, a ia ave e ia lona satauro, i le mulimuli mai ai ia te au.

²⁵Auā ai se fia faasaogalemuina lona ola, e māumau ai ia te ia; a o le faamāumau lona ola ona o a‘u, e maua ai e ia.

²⁶Auā se a le aoga i le tagata pe afai na te maua le lalolagi uma, a e māumau lona ola? se a foi se mea e avatu e le tagata e togiola a‘i lona ola?

²⁷Auā e sau le Atalii o le tagata faatasi ma ana agelu i le mamalu o lona Tamā; ona tauia lea e ia e taitasi e tusa ma lana galuega.

²⁸E moni, ou te fai atu ia te outou, O loo tutū mai iinei nisi e le oo ia te i latou le oti, seia latou vaaia le Atalii o le tagata ua sau i lona malo.