Read Samoan Old Version Bible – O LE TUSI PAIA MATAIO, 17 Bible Online

MATAIO, 17 - Samoan Old Version Bible – O LE TUSI PAIA bible

MATAIO, 17

¹Ua mavae atu aso e ono, ona o ai lea o Iesu ma Peteru, ma Iakopo, ma Ioane lona uso, ua ia avae ia te i latou i le mauga māualuga ua na o i latou lava.

²Ona liua ai lea o ia i o latou luma, ua pupula mai ona fofoga e pei o le la, ua sisina mai foi ona ofu e pei o le malamalama.

³Faauta foi, ua faaali mai Mose ma Elia ia i latou, ua latou fetautalatala‘i ma ia.

⁴Ona fai mai ai lea o Peteru, ua faapea mai ia Iesu, Le Alii e, e lelei ona tatou nonofo iinei; a ē finagalo i ai, matou te faia iinei ni fale apitaga se tolu; mo oe le tasi, mo Mose le tasi, mo Elia foi le tasi.

⁵Faauta, o le ao pupula ua ufitia ai i latou a o tautala ia; faauta foi, o le siufofoga mai le ao ua faapea mai, O lo‘u Atalii pele lena, ou te fiafia ia te ia; ia outou faalogo ia te ia.

⁶Ua faalogo ai le au soo, ona latou faapauu faō ai lea, ua matuā matatau lava.

⁷Ona maliu atu ai lea o Iesu ua pa‘i atu ia te i latou, ua faapea atu, Ina tutū ia outou; aua foi tou te matatau.

⁸Ona tetepa ae ai lea o latou mata, ua latou le iloa atu se tasi, ua na o Iesu lava.

⁹Ua latou o ifo i le mauga, ona vavao atu ai lea o Iesu ia te i latou, ua faapea atu, Aua ne‘i outou ta‘u atu i se tasi le mea na vaaia, seia toe tu mai le Atalii o le tagata mai e ua oti.

¹⁰Ona fesili mai lea o ona soo ia te ia, ua faapea mai, Se a le mea ua fai mai ai le au tusiupu, e ao ina muai sau o Elia?

¹¹Ona tali atu ai lea o Iesu, ua faapea atu ia te i latou, E muai sau lava Elia, ma toe fuatai mea uma.

¹²A ou te fai atu ia te outou, Ua mavae ona sau o Elia, e lei iloa foi o ia e i latou, a ua latou faia ia te ia o mea uma na latou loto i ai; e faapea foi le Atalii o le tagata o le a faatigaina e i latou.

¹³Ona iloa ai lea e le au soo, o Ioane le papatiso ua fetalai atu ai o ia ia te i latou.

¹⁴Ua latou oo atu i le motu o tagata, ona sau ai lea ia te ia o le tasi tagata, ua tootuli ia te ia, ua faapea mai,

¹⁵Le Alii e, ia e alofa mai i lo‘u atalii, ua ma‘i māliu, ua tiga lava; auā ua paū soo ia i le afi, ua faapea soo foi i le vai.

¹⁶Na ou au mai ia te ia i ou soo, a ua latou le mafaia ona faamalolo ia te ia.

¹⁷Ona tali atu ai lea o Iesu, ua faapea atu, Le tupulaga le faatuatua ma le faapiopio, ou te i ai ia te outou seia afea? ou te faapalepale ia te outou seia afea? au mai ia o ia iinei ia te au.

¹⁸Ua vavao atu Iesu ia te ia, ona alu ai lea i fafo o le temoni sa ia te ia; ona malolo ai lea o le tama talu i lea lava itu aso.

¹⁹Ona o ane ai lea o le au soo ia Iesu ua na o i latou, ua faapea ane, Se a le mea na matou le mafai ai ona tulia o ia?

²⁰Ona fetalai atu ai lea o Iesu ia te i latou, Ona o lo outou le faatuatua; auā e moni, ou te fai atu ia te outou, afai e tusa lo outou faatuatua ma le fua o le sinapi, e fai atu outou i lenei mauga, Alu atu ia oe i lela mea; ona alu atu ai lea; e leai foi se mea tou te le mafaia.

²¹A ua na o le tatalo ma le anapogi e o ese ai mea faapena.

²²Ua latou ui ane i Kalilaia, ona fetalai atu lea o Iesu ia te i latou, O le a tuuina atu le Atalii o le tagata i lima o tagata;

²³latou te fasioti foi ia te ia, a e toe faatuina o ia i le aso tolu. Ona matuā tiga ai lea o i latou.

²⁴Ua latou oo atu i Kapanaumi, ona o mai ai lea ia Peteru o e tali taulaga, ua faapea mai, E le faia ea le taulaga e lo outou a‘oa‘o?

²⁵Ua fai atu ia, E fai lava. Ua ulufale atu ia i le fale, ona tomua atu ai lea o le fetalaiga a Iesu ia te ia, ua faapea atu, Simona e, pe ni a fa oe? e tali telo ma taulaga mai ia te ai e tupu o le lalolagi? o a latou fanau ea, po o tagata ese?

²⁶Ona fai mai ai lea o Peteru ia te ia, O tagata ese. Ona fetalai atu ai lea o Iesu ia te ia, O lea foi ua saoloto ai le fanau.

²⁷A o lenei, ne‘i latou tausuai ia i tatou, ina alu ia oe i le vai, ma lafo ai se mātau, o le uluai i‘a e te maua, ia e tago i ai, ma fafasi lona gutu, ona e maua ai lea o le setatara; ia e ave lea, ma avatu ia te i latou mā oe ma a‘u.