Read Samoan Old Version Bible – O LE TUSI PAIA MATAIO, 18 Bible Online

MATAIO, 18 - Samoan Old Version Bible – O LE TUSI PAIA bible

MATAIO, 18

¹O lea itu aso ua o ane ai le au soo ia Iesu, ua faapea ane, O ai ea e sili i le malo o le lagi?

²Ona valaau atu ai lea o Iesu i le tama itiiti, ua faatu ia te ia i o latou luma,

³ua faapea atu, E moni, ou te fai atu ia te outou, a le liua outou, ma avea ia pei o tama iti, tou te le sao lava i le malo o le lagi.

⁴O lenei o sē faamaulalo o ia ia te ia e pei o le tama itiiti nei, e sili lea i le malo o le lagi.

⁵Ai se talia se tama itiiti faapenei ona o lo‘u igoa, ua ia talia a‘u;

⁶ai se na te faatausuai se tasi o i latou nei e faatauvaa o e faatuatua ia te au, e lelei i lea tagata pe ana nonoa se maaolo tele i lona ua, ma faagotoina o ia i le moana loloto.

⁷Oi talofa i le lalolagi i mea e tausuai ai! auā e oo mai lava mea e tausuai ai e ao ai; a e ui lava i lea, oi talofa i lea tagata e oo mai ai le mea e tausuai ai.

⁸Afai foi e te tausuai i lou lima po o lou vae, ina tutū ese ia, ma e lafoai; e lelei ona e sao i le ola a ua lima mutu, pe pipili, a e leaga pe a lafoina oe i le afi e faavavau ma ou lima e lua ma ou vae e lua.

⁹Afai foi e te tausuai i lou mata, ina sali ese ia, ma e lafoai; e lelei ona e sao i le ola ma le mata e tasi, a e leaga pe a lafoina oe ma ou mata e lua i le afi o Kēna.

¹⁰Ia outou, ne‘i tou faaleaogaina se tasi o i latou nei e faatauvaa; auā ou te fai atu ia te outou, o a latou agelu i le lagi e le aunoa ona latou vaavaai i fofoga o lo‘u Tamā o i le lagi.

¹¹Auā ua sau le Atalii o le tagata e faaola i le na le iloa.

¹²Pe ni a fa outou? ai se tagata o i ai mamoe e selau, afai e sē le tasi, na te le tuua ea le ivagafulu ma le iva i mauga, a e alu o ia e saili i le na sē?

¹³Afai foi na te maua, e moni, ou te fai atu ia te outou, e tele lona olioli i lea, a e itiiti i le ivagafulu ma le iva e lei sē.

¹⁴E faapea lo outou Tamā o i le lagi, e le finagalo ia ina ia fano se tasi o i latou nei e faatauvaa.

¹⁵Afai e agaleaga mai lou uso ia te oe, ia e alu, ma aoai ia te ia tau lava o oulua ma ia. Afai e faalogo mai o ia ia te oe, ua e maua lou uso.

¹⁶A e afai e le faalogo mai o ia, lua te o ma se tasi, po o se toalua, ina ia faamaoni ai upu uma i le mau a le toalua, po o le toatolu.

¹⁷A le faalogo lava o ia ia te i laua, ia e ta‘u atu i le ekalesia; pe afai e le faalogo lava o ia i le ekalesia, ia avea o ia ia te oe, ia pei o le faapaupau, po o le telona.

¹⁸E moni, ou te fai atu ia te outou, O mea uma tou te fusifusia i le lalolagi, e fusifusia ia i le lagi; o mea uma foi tou te tālā i le lalolagi, e tatalaina ia i le lagi.

¹⁹Ou te fai atu foi ia te outou, Afai e loto gatasi se toalua o outou o i le lalolagi i se mea la te ole atu ai, e faia lea mo i laua e lo‘u Tamā o i le lagi.

²⁰Auā o le mea ua faapotopoto ai se toalua, po o se toatolu i lo‘u igoa, ou te i ai faatasi ma i latou.

²¹Ona alu ane ai lea o Peteru ia te ia, ua faapea ane, Le Alii e, e agaleaga mai faafia ea lo‘u uso ia te au, ma ou faamagalo ia te ia? seia atu fitu ea?

²²Ua fetalai atu Iesu ia te ia, Ou te le fai atu ia te oe, seia atu fitu, a ia fitugafulu ni fitu.

²³O le mea lea e tusa ai le malo o le lagi ma le tasi tupu, o le na manatu e faamasino i mea ua i ana auauna.

²⁴Ua amata e ia ona faamasino, ona au mai ai lea ia te ia o le tasi ua i ai ana taleni e sefulu afe.

²⁵Ua le maua e ia ni mea e taui a‘i, ona fai atu lea o lona alii ia faatauina o ia, ma lana avā, ma ana fanau, atoa ma ana mea uma, ina ia taui a‘i mai.

²⁶Ona faapaū ai lea o le auauna, ua ifo ia te ia, ua faapea mai, Le alii e, ia e faapalepale mai ia te au, ou te taui atu ai au mea uma.

²⁷Ona mutimuti vale ai lea o le alofa o le alii o lea auauna, ua tuu atu o ia ia saoloto, ma faamagalo atu ana tupe ua i ai.

²⁸Ona alu atu lea o lea auauna, ua iloa e ia le tasi o ona uso a auauna ua i ai ana tenari e selau; ona pue lea ma titina ia te ia, ua faapea atu, Ina taui mai ia a‘u mea ua ia te oe.

²⁹Ona faapaū atu ai lea o lona uso a auauna i ona vae, ua aioi atu ia te ia, ua faapea atu, Ia e faapalepale mai ia te au, ou te taui atu au mea uma.

³⁰A ua le mafai o ia; a ua alu ma tuu atu ia te ia i le fale puipui, seia tauia mai ana mea.

³¹Ua iloa e ona uso a auauna o mea na faia, ona latou matuā tiga ai lea; ua latou o atu, ma ta‘u atu i lo latou alii o mea uma lava na faia.

³²Ona valaau atu ai lea o lona alii ia te ia, ua faapea atu ia te ia, Le auauna leaga e, na a‘u faamagaloina atu a‘u mea uma ua ia te oe, ina ua e aioi mai ia te au;

³³e le tatau ea ona e alofa atu i lou uso a auauna, e pei o a‘u foi na ou alofa atu ia te oe?

³⁴Ona ita ai lea o lona alii, ua tuu atu ia te ia i e faataumaoi, seia tauia mai ana mea uma.

³⁵E faapea foi ona faia ia te outou e lo‘u Tamā o i le lagi, pe afai tou te le taitasi ma faamagalo ma o outou loto atoa i o outou uso pe a latou agaleaga mai.