Read Samoan Old Version Bible – O LE TUSI PAIA MATAIO, 19 Bible Online

MATAIO, 19 - Samoan Old Version Bible – O LE TUSI PAIA bible

MATAIO, 19

¹Ua faaiu e Iesu o ia upu, ona tuua lea e ia o Kalilaia, ua oo atu i le laueleele o Iutaia i tala atu o Ioritana.

²Ua mulimuli mai foi ia te ia le motu o tagata e toatele; Ona faamalolo lea e ia ia te i latou i lea mea.

³Ona o mai ai lea ia te ia o faresaio, ua faaosooso mai ia te ia, ua faapea mai ia te ia, Pe sa ea i se tasi ona faatea o lana avā ona o mea uma?

⁴Ona tali atu ai lea o ia, ua faapea atu ia te i latou, Tou te lei faitaulia ea, o le na faia tagata i le amataga, na ia faia i laua o le tane ma le fafine,

⁵na ia fetalai ane foi, O le mea lea e tuua ai e le tane o lona tamā ma lona tinā, a e faatasi ma lana avā; ona avea lea o i laua o le tino e tasi?

⁶O lea e le toe toalua ai, a o le tino e tasi i laua; o lenei, o e ua faatasia e le Atua, aua ne‘i faateaeseina e se tagata.

⁷Ona latou fai mai ai lea ia te ia, Se a foi le mea na poloai mai ai Mose e avatu le tusi alei e faatea ai ia te ia?

⁸Ona fetalai atu ai lea o ia ia te i latou, Ona o outou loto ina maaa na tuu mai ai e Mose ia te outou e faatea i a outou avā; a e lei faapea talu mai i le amataga.

⁹Ou te fai atu foi ia te outou, Ai se faatea i lana avā, a o lei mulilua ia, ma fai avā i se tasi, ua mulilua ia; o se fai avā i le na faate‘aina, ua mulilua foi lea.

¹⁰Ona fai mai ai lea ona soo ia te ia, Afai e faapea le tu a le tane ma le fafine, e ao ina le fai avā.

¹¹A ua fetalai atu ia ia te i latou, E le mafai ona talia lena upu e tagata uma, ua na o e ua foaiina atu i ai;

¹²auā o i ai eunuka o e faapea ina fanau mai; o i ai foi eunuka o e ua faaeunukaina e tagata; o i ai foi eunuka o e ua faaeunukaina i latou e i latou, ona o le malo o le lagi. Ai se na te mafaia ona talia, ina talia lea e ia.

¹³Ona au mai ai lea ia te ia o tama iti, ina ia faaee ona aao ia te i latou, ma tatalo; ona vavao atu ai lea o ona soo ia te i latou.

¹⁴A ua fetalai atu Iesu, Ina tuu mai ia o tama iti e o mai ia te au, aua le vaoia i latou; auā e faapei o i latou nei o e o i le malo o le lagi.

¹⁵Ua faaee ona aao ia te i latou, ona maliu ese ai lea o ia i lea mea.

¹⁶Faauta foi, ua sau le tasi tagata, ua faapea mai ia te ia, Le a‘oa‘o lelei e, se a se mea lelei ou te faia ou te maua ai le ola faavavau?

¹⁷Ona fetalai atu ai lea o ia ia te ia, Se a le mea e te ta‘ulelei mai ai a‘u? e leai se tasi e lelei, ua na o le toatasi, o le Atua lea. Afai e te fia oo i le ola, ia e tausi i poloaiga.

¹⁸Ua fai mai o ia ia te ia, Po o le fea? Ona faapea atu ai lea o Iesu, Aua e te fasioti tagata; aua e te mulilua; aua e te gaoi; aua e te molimau pepelo;

¹⁹ia e ava i lou tamā ma lou tinā; ma ia e alofa atu i lē lua te tuaoi, ia pei o oe lava ia te oe.

²⁰Ona fai mai ai lea o le taulealea ia te ia, Ua ou tausia na mea uma talu ina ou itiiti, se a se mea o toe ou te lei faia?

²¹Ua tali atu Iesu ia te ia, Afai e te manao ina ia atoatoa ona lelei o lau amio ia e alu ma e faatau atu au mea, i le e avatu ai i e matitiva; ona ia te oe lea o le faulaigāoloa i le lagi, i le e sau ma mulimuli mai ia te au.

²²Ua faalogo le taulealea i lea upu, ona alu ese ai lea o ia ma le tiga, auā e tele lava ana mea.

²³Ona fetalai atu ai lea o Iesu i ona soo, E moni, ou te fai atu ia te outou, e faigata ona sao atu o le mauoa i le malo o le lagi.

²⁴Ou te fai atu foi ia te outou, e faigofie ona ui atu o se kamela i le pu o le au, a e faigata ona sao o le mauoa i le malo o le Atua.

²⁵Ua faalogo ai ona soo, ona latou matuā taufaiofo ai lea, ua faapea ane, Afai o lea, o ai se tasi e mafai ona faaolaina?

²⁶Ona silasila atu ai lea o Iesu, ua faapea atu ia te i latou, E le mafaia e tagata lenei mea, a e mafaia mea uma e le Atua.

²⁷Ona tali mai ai lea o Peteru, ua faapea mai ia te ia, Faauta, ua matou tuua mea uma, a e matou mulimuli atu ia te oe; se a foi se mea matou te maua?

²⁸Ona fetalai atu ai lea o Iesu ia te i latou, E moni, ou te fai atu ia te outou, o outou ua mulimuli mai ia te au, pe a tietie le Atalii o le tagata i lona nofoālii mamalu i le toefuataiga, tou te tietie ai foi i nofoālii e sefulu ma le lua, e faamasino ai i itu aiga o Isaraelu e sefulu ma le lua.

²⁹Ai se tasi ua ia tuua o fale, po o uso, po o tuafāfine, po o le tamā, po o le tinā, po o le avā, po o le fanau, p o fanua ona o lo‘u igoa, e maua e ia e taisautuaselau, e fai foi mona tofi le ola faavavau.

³⁰A e toatele o e ua muamua e avea ma mulimuli; o e ua mulimuli foi e avea ma muamua.