Read Samoan Old Version Bible – O LE TUSI PAIA MATAIO, 21 Bible Online

MATAIO, 21 - Samoan Old Version Bible – O LE TUSI PAIA bible

MATAIO, 21

¹Ua latalata i latou i Ierusalema, ua oo i Petefake i le mauga o Olive, ona aauina atu ai lea e Iesu ona soo e toalua,

²ua faapea atu ia te i laua, Lua te o atu i le aai ua lumanai oulua, ona iloa atu loa lea e oulua o le asini ua nonoa, o lana tama foi ua faatasi ma ia; lua te tatalaina, i le ta‘ita‘i mai ai ia te au.

³Afai foi e fai ane se tasi se upu ia te oulua, ia oulua fai atu, E manao i ai le Alii; ona tuu loa mai ai lea e ia.

⁴Ua oo nei mea uma, ina ia taunuu ai le upu a le perofeta, ua faapea mai,

⁵Ia outou fai atu i le tama fafine a Siona, faauta, o loo afio mai ia te oe lou Tupu, ua agamalu o ia, o loo tietie i le asini, o le tamai asini foi.

⁶Ona o ai lea o ia soo, ua faia foi e i laua pei ona fetalai atu ai o Iesu ia te i laua.

⁷Ua la ta‘ita‘iina mai foi le asini ma le tamai asini, ua faaee i ai o latou ofu, ma faatietie ai o ia.

⁸O le toatele o le motu o tagata ua fofola o latou ofu i le ala; o isi foi ua latou sala i lālā o laau ma folasia ai le ala.

⁹O le motu o tagata ua muamua, ma e ua mulimuli, ua alalaga i latou, ua faapea mai, Osana i le alo o Tavita; ia manuia lē afio mai i le suafa o le Alii. Osana i mea e aupito i luga.

¹⁰Ua oo ia i Ierusalema, ona vevesi ai lea o le aai uma, ua faapea ane, O ai ea lenei?

¹¹Ona faapea atu ai lea o le motu o tagata, O Iesu lenei le perofeta mai Nasareta i Kalilaia.

¹²Ua ulufale atu Iesu i le malumalu o le Atua, ona ia tulia uma lea i fafo o e na fefaatauai i le malumalu, ma na fuli i lalo laulau a e na faatau tupe, ma nofoa o e na faatau lupe.

¹³Ua faapea atu o ia ia te i latou, Ua tusia, E ta‘ua lo‘u fale, o le fale tatalo; a ua faia e outou ma ana o e fao mea.

¹⁴Ona o mai ai lea ia te ia i le malumalu o e tauaso ma e pipili, ua na faamalolo ia te i latou.

¹⁵Ua iloa atu e le au faitaulaga sili ma le au tusiupu o vavega ua faia e ia, o tama foi ua alalaga i le malumalu, ua faapea ane, Osana i le alo o Tavita; ona matuā tiga ai lea o i latou,

¹⁶ona faapea mai ai lea o i latou ia te ia, Ua e lagona ea a latou upu? Ona fetalai atu ai lea o Iesu ia te i latou, Ioe; tou te lei faitaulia lava ea, Ua e saunia le viiga mai gutu o tama meamea ma tama fesusui?

¹⁷Ona tuua lea o i latou e ia, a e maliu atu i tua o le aai ua oo i Petania, ua nofo ai.

¹⁸O le taeao ua foi atu ai o ia i le aai, ua fia taumafa.

¹⁹Ua silafia e ia le mati e tasi i le auala, ua oo atu i ai, a e leai se mea na maua ai, ua na o lau; ona faapea atu ai lea o ia i ai, Aua ne‘i toe tutupu ni ou fua e oo i le faavavau. Ona mago loa lea o le mati.

²⁰Ua iloa atu e le au soo, ona latou taufaiofo ai lea, ua faapea ane, Ua faapea ona vave mago o le mati nei!

²¹A ua tali atu Iesu, ua faapea atu ia te i latou, E moni, ou te fai atu ia te outou, Afai ua ia te outou le faatuatua, ma outou le masalosalo, ona faia lea e outou e le na o le mea ua faia i le mati, a e afai tou te fai atu i lenei mauga, Ia siitia oe, ma lafoina i le sami, ona faia lava lea.

²²O mea uma foi tou te ole mai ai i le tatalo ua i ai le faatuatua, e maua lava e outou.

²³Ua ulufale atu ia i le malumalu, ua a‘oa‘o, ona o mai ai lea ia te ia o faitaulaga sili, ma toeaina o le nuu, ua faapea mai, O le a ea le pule e te fai ai na mea? o ai foi na na tuuina atu ia te oe lenei pule?

²⁴Ona tali atu lea o Iesu, ua faapea atu ia te i latou, Ou te fesili atu foi a‘u ia te outou se upu e tasi; afai tou te ta‘u mai lea ia te au, ona ou ta‘uina atu lea le pule ou te fai ai nei mea.

²⁵Se papatisoga ea a Ioane maifea? mai le lagi ea, pe mai tagata? Ona latou felafolafoai ai lea, ua faapea ane, Afai tatou te fai atu, Mai le lagi; ona fai mai ai lea o ia ia te i tatou, Se a foi le mea tou te lei talitonu ai ia te ia?

²⁶Afai foi tatou te fai atu, Mai tagata; ua tatou fefefe i le motu o tagata; auā o la latou lea taofi uma ia Ioane, o le perofeta ia.

²⁷Ona latou tali mai ai lea ia Iesu, ua faapea mai, Matou te le iloa. Ona fetalai atu ai lea o ia ia te i latou, Ou te le ta‘u atu foi ia te outou le pule ou te fai ai nei mea.

²⁸Pe ni a fa outou? O le tasi tagata e toalua ona atalii; ua alu atu ia i le ulumatua, ua faapea atu, Sole, ina alu ia i le asō, se‘i e galue i la‘u tovine.

²⁹Ona tali mai ai lea o ia, ua faapea mai, Ou te musu; a e mulimuli ane ua salamo ia, ua alu.

³⁰Ona alu atu ai lea o ia i le tasi, ua faapea foi lana upu ia te ia. Ona tali mai ai lea o ia, ua faapea mai, Le alii e, ou te alu; a ua le alu lava ia.

³¹O ai ea so laua na faia le loto o lo la tama? Ona latou faapea mai ai lea ia te ia, O le ulumatua. Ona faapea atu lea o Iesu ia te i latou, E moni, ou te fai atu ia te outou, E muamua atu telona ma fafine talitane ia te outou i le malo o le Atua.

³²Auā na sau Ioane ia te outou i le ala o le amiotonu, a e tou te lei talitonu ia te ia; a ua talitonu ia te ia telona ma fafine talitane; ua outou iloa foi, a e lei mulimuli ona salamo outou, ina ia talitonu ai ia te ia.

³³Ia outou faalogo mai i le tasi faataoto. O le tasi matai na fai le tovine, ua ia lotoāina i le āi, ua eli ai le soligāvine, ua faia foi le ‘olo, ua tuuina atu e ia i e galulue i vine, ona alu malaga ai lea o ia i le nuu ese.

³⁴Ua latalata ona po e matua ai le fuata, ona aauina atu ai lea e ia o ana auauna i e galulue i vine, ia maua ona fua.

³⁵Ona pupue ai lea o e galulue i vine i ana auauna, ua latou sasa i le tasi, ma fasioti le isi, ma fetogi le tasi i maa.

³⁶Ona toe aauina atu ai lea e ia o isi auauna e sili ona toatele i e na muamua; a ua faapea lava a latou amio ia te i latou.

³⁷A e mulimuli ane ua auina atu ai e ia o lona atalii ia te i latou, ua faapea ane, Latou te ava mai i lo‘u atalii.

³⁸A o ia tagata galulue i vine, ua iloa atu lona atalii, ona latou fetautalatalai ai lea, O le suli lenei; o mai ia, tatou te fasiotia o ia, a e fai mo i tatou lona fanua.

³⁹Ona latou pue ai lea ia te ia, ua lafo ia te ia i tua o le tovine, ona latou fasiotia ai lea.

⁴⁰O lenei, pe a sau le alii e ona le tovine, se a se mea na te faia i na tagata galulue i vine?

⁴¹Ona latou fai mai ai lea ia te ia, E matuā faaumatia e ia na tagata amio leaga; ona tuuina atu ai lea e ia o le tovine i nisi tagata galulue i vine, latou te avatu ia te ia ona fua i ona tausaga.

⁴²Ua fetalai atu Iesu ia te i latou, Tou te lei faitaulia lava ea i Tusi, O le maa na lafoaiina e tufuga fai fale, ua fai lea ma tulimanu aupitoaluga; o le mea lea na faia e le Alii, tatou te ofo ai pe a vaavaai atu i ai?

⁴³O le mea lea ou te fai atu ai ia te outou, E aveesea le malo o le Atua ia te outou, a e tuuina atu i se nuu e au mai ai ona fua.

⁴⁴O sē paū foi i luga o lea maa, e gāugau ai o ia; a o se tasi e paū ifo i ai le maa, e nutipalaina ai o ia.

⁴⁵Ua faalogo faitaulaga sili ma faresaio i ana faataoto, ona latou iloa ai lea, o i latou lava ia na ia fetalai mai ai.

⁴⁶Ona latou fia pue ai lea ia te ia, a ua latou fefefe i le motu o tagata; auā o la latou taofi, o le perofeta o ia.