Read Samoan Old Version Bible – O LE TUSI PAIA MATAIO, 22 Bible Online

MATAIO, 22 - Samoan Old Version Bible – O LE TUSI PAIA bible

MATAIO, 22

¹Ona toe sauni ai lea e Iesu o faataoto, ua faapea atu ia te i latou,

²E tusa le malo o le lagi ma le tasi tupu ua na faia le tausamaaga o lona atalii;

³ua aauina atu e ia ana auauna e fai atu i e na tala‘iina ia o mai i le tausamaaga; a ua latou le mafafai ina o mai.

⁴Ua toe aauina atu e ia nisi auauna, ua faapea atu, Ia outou fai atu i e na tala‘iina, Faauta, ua ou saunia mea e taumafa, ua fafasi a‘u povi ma a‘u mea pepeti, ua saunia foi mea uma; ina o mai ia i le tausamaaga.

⁵A ua latou faatāla ese mai, ua taitasi ma alu, o le tasi i lona fanua, ma le tasi i lana faatau.

⁶A o isi, ua latou pupue i ana auauna, ua faaleaga ma fasiotia.

⁷Ua faalogo ai le tupu, ona matuā ita ai lea o ia; ua aauina atu e ia ana ‘au, ua faaumatia na tagata fasi tagata, ma susunu la latou aai.

⁸Ona fai atu ai lea o ia i ana auauna, Ua saunia lava le tausamaaga, a ua le aoga e na tala‘iina.

⁹O lenei, ia outou o atu i ala tele, o i latou uma tou te iloa ai, tou te tala‘i i ai le tausamaaga.

¹⁰Ona o atu ai lea o ia auauna i ala, ua latou faapotopoto uma e na latou iloa, o e leaga atoa ma e lelei; ona tumu ai lea o le mea na fai ai le tausamaaga i e na taooto e aai ai.

¹¹Ona ulufale atu ai lea o le tupu e vaavaai atu i e na taooto e aai ua iloa atu ai e ia o le tasi tagata ua le ofu i le ofu o le tausamaaga.

¹²Ona fai atu ai lea o ia ia te ia, Sole, pe faapefea ona e ulufale mai iinei ua le ia te oe le ofu o le tausamaaga? Ona le gagana ai lea o ia.

¹³Ona fai atu ai lea o le tupu i auauna, Ia outou fusifusia ona vae ma ona lima, ma ave o ia, ma lafo i le pouliuli i fafo, e i ai le taufaitagiane ma le lilivau o nifo.

¹⁴Auā e toatele e ua tala‘iina a e toaitiiti e ua filifilia.

¹⁵Ona o ane ai lea o le au faresaio, ma taupulepule pe faapefea ona latou mailei ia te ia i ana upu.

¹⁶Ona latou aauina mai ai lea ia te ia o latou soo faatsi ma le au Herotiano, ua faapea mai, Le a‘oa‘o e, ua matou iloa o oe le faamaoni, ua e a‘oa‘o foi i le ala o le Atua ma le faamaoni, e te le mata‘u foi i se tasi; auā e lei faailogaina e oe se tagata.

¹⁷O lenei, ia e ta‘u mai ia te i matou, pe se a lau taofi? pe sa ea ona avatu o taulaga ia Kaisara pe leai?

¹⁸A ua silafia e Iesu o latou loto leaga, ua faapea atu, O outou tagata pepelo, se a le mea ua outou tofotofo mai ai ia te au?

¹⁹Faaali mai ia ia te au se tupe o le taulaga. Ona latou avane ai lea ia te ia o se tenari.

²⁰Ona fetalai atu lea o ia ia te i latou, O ai ea e ona lenei faatagata ma lenei tusi?

²¹Ua latou fai mai ia te ia, E o Kaisara. Ona fetalai atu ai lea o ia ia te i latou, O lenei, o mea a Kaisara, ia outou avatu ia Kaisara; a o mea a le Atua ia avatu ia i le Atua.

²²Ua latou faalogo ai, ona latou taufaiofo ai lea; ua latou tuua ia, a e o ese.

²³O lea aso ua o mai ai ia te ia satukaio, o e taofi, e leai se toe tu;

²⁴ua latou fesili mai ia te ia, ua faapea mai, Le a‘oa‘o e, ua fai mai Mose, Afai e oti se tasi e leai sana fanau, ia fai lana avā ma avā a lona uso, ia tupu ai se gafa mo lona uso.

²⁵Sa ia te i matou le au uso e toafitu; na fai avā le ulumatua, ua oti foi o ia; e leai foi sana fanau, o lea ua tuuina atu ai lana avā mā lona uso.

²⁶Na faapea foi o lona lua, ma lona toatolu, ua oo lava i le toafitu.

²⁷A e muliai oti foi le fafine.

²⁸O lenei, a oo i le toe tu, o ai so latou o le toafitu e fai māna le avā? auā na fai avā uma ai.

²⁹Ona tali atu ai lea o Iesu, ua faapea atu ia te i latou, Ua outou sese lava, ina ua outou le iloa upu o Tusi, ma le mana o le Atua.

³⁰Auā a oo i le toe tu latou te le fai avā, pe nofo tane, a e latou te pei o agelu a le Atua o i le lagi.

³¹A o le toe tutū mai o e ua oti, tou te lei faitau ai ea le afioga a le Atua ia te outou, ua faapea mai,

³²O a‘u nei o le Atua o Aperaamo, o le Atua foi o Isaako, o le Atua foi o Iakopo? o le Atua e le se Atua ia o e ua oti, a o e ola.

³³Ua faalogo ai le motu o tagata, ona latou taufaiofo ai lea i lana mataupu.

³⁴Ua faalogo le au faresaio ua le mautali ia te ia le au satukaio, ona latou faapotopoto mai ai lea i lea mea,

³⁵ona fesili faatofotofo mai ai lea ia te ia o so latou, o le a‘oa‘o tulafono, ua faapea mai,

³⁶Le a‘oa‘o e, o le fea poloaiga o i le tulafono ua sili.?

³⁷Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa.

³⁸O le poloaiga muamua lena ma le sili.

³⁹E faapena foi lona lua, E te alofa atu i lē lua te tuaoi, ia pei o oe lava ia te oe.

⁴⁰O nā poloaiga e lua ua autu ai le tulafono uma ma le au perofeta.

⁴¹Ua faapotopoto le au faresaio, ona fesili atu ai lea o Iesu ia te i latou,

⁴²ua faapea atu, Se a la outou taofi i le Keriso? se atalii ea ia o ai? Ona latou fai mai ai lea ia te ia, O le alo o Tavita.

⁴³Ona fetalai atu ai lea o ia ia te i latou, O lenei, pe faapefea ona ta‘ua e Tavita e le Agaga, o ia o lona Alii, ua faapea mai,

⁴⁴Ua fetalai ane le Alii i lo‘u Alii, Ia e nofo i lo‘u itu taumatau, seia ou faia e ua fai oe mo latou fili ma mea e tu ai ou vae.

⁴⁵O lenei, afai ua ta‘ua o ia e Tavita, o le Alii, pe faapefea ona fai o ia mona atalii?

⁴⁶A e leai se tasi ua na mafaia ona tali mai se upu ia te ia; talu lea aso e le toe faamalosi ona fesili mai se tasi ia te ia i se mea.