Read Samoan Old Version Bible – O LE TUSI PAIA MATAIO, 23 Bible Online

MATAIO, 23 - Samoan Old Version Bible – O LE TUSI PAIA bible

MATAIO, 23

¹Ona fetalai atu ai lea o Iesu i le motu o tagata ma ona soo, ua faapea atu,

²Ua tietie le au tusiupu ma le au faresaio i le nofoa o Mose;

³o lea ia outou anaana ai ma ia outou faia mea uma latou te fai atu ai ia te outou e anaana i ai; a e aua tou te faaa‘oa‘o i a latou amio; auā ua latou fai atu, a e latou te le faia.

⁴Auā ua latou saisai avega mamafa ma le avegata, ma latou faaee i ua o tagata; a e latou te le mafafai ina faagaoioi ai i so latou tamatamai lima.

⁵Ua latou fai a latou galuega uma, ina ia iloa ai e tagata; ua latou faalautele i a latou filateri, ma faatele i tuupao o latou ofu.

⁶Ua latou fiafia foi i le mea sili e taoto ai i faigaai, ma nofoa sili i sunako,

⁷ma ia alofaina i latou i malae, ia ta‘ua foi i latou e tagata, Rapi e, rapi e.

⁸A o outou, aua ne‘i ta‘ua outou o rapi; auā e toatasi la outou a‘oa‘o, o le Keriso lea; a o outou uma o le au uso outou.

⁹Aua foi ne‘i tou ta‘ua se tasi i le lalolagi o lo outou tamā; auā e toatasi lo outou Tamā, o i le lagi ia.

¹⁰Aua foi ne‘i ta‘ua outou o a‘oa‘o; auā e toatasi la outou a‘oa‘o, o le Keriso lea.

¹¹A o lē sili ia te outou e fai lea ma a outou auauna.

¹²O sē faamaualuga o ia ia te ia, e faamaulaloina lea; a o sē faamaulalo o ia ia te ia, e faamaualugaina lea.

¹³Oi talofa ia te outou tusiupu ma faresaio, tagata pepelo! auā ua outou pupuni le malo o le lagi i tagata; auā tou te le ulu atu i ai outou, ua outou vavao foi i e a ulu atu i ai.

¹⁴Oi talofa ia te outou tusiupu ma faresaio, tagata pepelo! auā ua outou faauma fale o fafine ua oti a latou tane, ua faaleleva foi a outou tatalo e fai ma ufiufi; o le mea lea e atili ai lava ona faasalaina outou.

¹⁵Oi talofa ia te outou tusiupu ma faresaio, tagata pepelo! auā ua soo le sami ma le laueleele ia te outou ina ia lotu mai o se tasi; pe a maua foi o ia, ona outou faia lea o ia ma tagata o Kēna ua sili ona leaga ia te outou.

¹⁶Oi talofa ia te outou ta‘ita‘i tauaso! o e fai mai, Ai sē tauto i le malumalu, ua leai lea; a o sē tauto i le auro o le malumalu, ua mau lea.

¹⁷Tagata vālea e ma le tauaso; auā o le fea ua sili, o le auro ea, po o le malumalu ua paia ai le auro?

¹⁸I le ma lea, Ai sē tauto i le fata faitaulaga, ua leai lea; a o sē tauto i le taulaga ua i ona luga, ua mau lea.

¹⁹Tagata vālea e ma le tauaso; auā o le fea ua sili, o le taulaga ea, po o le fata faitaulaga ua paia ai le taulaga?

²⁰O lenei, o lē tauto i le fata faitaulaga, ua ia tauto i ai, ma mea uma ua i ona luga;

²¹o lē tauto foi i le malumalu, ua ia tauto i ai, ma loo afio ai.

²²O lē tauto foi i le lagi, ua ia tauto i le nofoālii o le Atua, ma loo tietie ai.

²³Oi talofa ia te outou tusiupu ma faresaio, tagata pepelo! ua outou avatu mea e sefulu a‘i o le mili, ma le aneto, ma le kumina, a ua tuu e outou o mea silisili o i le tulafono, o le amiotonu, ma le alofa, ma le faamaoni; e tatau pe ana faia nei mea, a e aua foi le tuu na mea.

²⁴O outou ta‘ita‘i tauaso, ua outou faapilia le namu, a ua outou folo atoa le kamela.

²⁵Oi talofa ia te outou tusiupu ma faresaio, tagata pepelo! ua outou faamamā i le tua o le ipu ma le tanoa, a o totonu ua tutumu i mea ua faoa ma le amio leaga.

²⁶O oe na le faresaio tauaso, ia e muai faamamā i totonu o le ipu ma le tanoa, ina ia mamā atoa ma le tua.

²⁷Oi talofa ia te outou tusiupu ma faresaio, tagata pepelo! auā e tutusa outou ma tuugamau ua faasinasinaina, o loo matagofie i fafo, a o totonu ua tutumu i ivi o tagata oti, ma mea leaga uma.

²⁸E faapea foi outou, o fafo ua mataamiotonu i luma o tagata, a o totonu, ua tutumu outou i le pepelo ma le amioletonu.

²⁹Oi talofa ia te outou tusiupu ma faresaio, tagata pepelo! auā ua outou ati ae tuugamau o perofeta, ua outou teuteu foi loa o tagata amiotonu,

³⁰ma outou faapea ane, Ana matou i ai i ia ona po o matou tamā, po ua matou le ‘au faatasi ma i latou i le fāsiga o perofeta

³¹O lea, ua molia ai outou e outou, o fanau outou a e na fasiotia perofeta.

³²O outou foi, ia outou faatumuina le fua a o outou tamā.

³³O outou gata, o fanau a gata feai, pe faapefea ona outou sosola i le faasala i Kēna?

³⁴Faauta mai, o le mea lea ou te aauina atu ai ia te outou o perofeta, ma tagata popoto, ma tusiupu; o isi o i latou tou te fāsiotia ma faasatauroina; a o isi, tou te sasaina i o outou sunako, ma tulituliloa ia te i latou i lea aai ma lea aai;

³⁵ina ia oo ia te outou le toto uma o e amiotonu ua faamaligiina i le lalolagi, e afua i le toto o Apelu le tagata amiotonu, e oo i le toto o Sakaria le atalii o Parakaio, na outou fasiotia i le va o le malumalu ma le fata faitaulaga.

³⁶E moni, ou te fai atu ia te outou, e oo mai nei mea uma i luga o lenei tupulaga.

³⁷Ierusalema e, Ierusalema e, o lē fasiotia perofeta, ma fetogi i maa i e ua aauina atu ia te oe; ua tele lava o‘u manao e faapotopoto i lau fanau, e pei o le moa ona ofaofatai i lana toloai i lalo i ona apaau a e lei mafafai outou.

³⁸Faauta, ua tuua lo outou fale, e faatafunaina.

³⁹Auā ou te fai atu ia te outou, tou te le toe iloa mai a‘u, seia outou fai mai, Ia manuia lē maliu mai i le suafa o le Alii.