Read Samoan Old Version Bible – O LE TUSI PAIA MATAIO, 24 Bible Online

MATAIO, 24 - Samoan Old Version Bible – O LE TUSI PAIA bible

MATAIO, 24

¹Ona ulufafo lea o Iesu, ua maliu ese i le malumalu; ona o mai ai lea o ona soo ia te ia e faasino ia te ia i fale o le malumalu.

²A ua fetalai atu Iesu ia te i latou, Ua outou le iloa ea nei mea uma? E moni, ou te fai atu ia te outou, e le toe ai se maa i luga o le tasi maa, a e uma ona sŏloia i lalo.

³Ua nofo o ia i le mauga o Olive, ona o mai ai lea o le au soo ia te ia ua na o i latou, ua faapea mai, Ia e fetalai mai ia te i matou pe oo afea ia mea? pe se a foi le faailoga o lou maliu mai, ma le gataaga o le lalolagi?

⁴Ona tali atu ai lea o Iesu, ua faapea atu ia te i latou, Ia outou, ne‘i faaseseina outou e se tasi.

⁵Auā e toatele e o mai i lo‘u igoa, ua faapea ane, O a‘u nei o le Keriso; latou te faaseseina foi tagata e toatele.

⁶E faalogo outou i taua ma tala o taua; ia outou, ne‘i tou atuatuvale; auā e ao ona taunuu o nei mea uma, a e lei oo i le gataaga.

⁷Auā e sii le taua e le tasi nuu i le tasi nuu, ma le tasi malo i le tasi malo; ona oo mai ai lea o oge, ma faamai, ma mafuie i lea mea ma lea mea.

⁸O na mea uma o le amataga ia o puapuaga.

⁹Ona latou tuuina atu ai lea o outou i le puapuaga, ma latou fasiotia outou, e inosia foi outou e nuu uma ona o lo‘u igoa.

¹⁰O ona po ia e tausuai ai tagata e toatele, e faalata le tasi i le tasi, ma feitagai i latou.

¹¹E tutū mai foi perofeta pepelo e toatele, latou te faasese foi i tagata e toatele.

¹²E maalili foi loto o tagata e toatele, ona ua tupu tele o le amio leaga.

¹³A o lē tumau seia oo i le gataaga, e faaolaina lea.

¹⁴E tala‘iina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.

¹⁵Pe a iloa foi e outou le mea e inosia e faatafunaina a‘i, na fai mai ai e le perofeta o Tanielu, ua tu i le mea paia, (ina mafaufau ia o lē faitau;)

¹⁶o e o i Iutaia i ia ona po, ia latou sosola i mauga;

¹⁷o le ua i luga o le fale, aua ne‘i alu ifo ia e ave se mea ai lona fale;

¹⁸o le ua i le vao foi, aua ne‘i foi atu e ave ona ofu.

¹⁹Oi talofa foi i fafine totō, ma ē failele i ia ona po.

²⁰A ia outou tatalo ina ne‘i outou sosola i le tausaga maalili, po o le sapati.

²¹Auā o ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.

²²A le faapuupuuina foi ia aso, e le faaolaina se tasi; a e faapuupuuina ia aso ona o e ua filifilia.

²³Afai e fai ane se tasi ia te outou i ia ona po, Faauta, o iinei le Keriso, po o iila; aua tou te faalogo i ai.

²⁴Auā e tutū mai Keriso pepelo, ma perofeta pepelo, latou te faia foi faailoga tetele ma vavega, ina ia faasese ai i e ua filifilia lava, pe afai e mafai ai.

²⁵Faauta, ua ou muai ta‘uina atu ai ia te outou.

²⁶O lea, afai latou te fai mai ai ia te outou, Faauta, o i le vao ia; aua tou te o atu i ai; faauta, o i se afeafe ia; aua tou te faalogo i ai.

²⁷Auā e pei ona emo mai o le uila i sasae, ma malamalama atu i sisifo; e faapea foi ona sau o le Atalii o le tagata.

²⁸Auā o le mea ua i ai le tagata oti, e aofaga i ai aeto.

²⁹A mavae atu le puapuaga o ia ona aso, ona faapogisaina loa lea o le la, e le susulu mai foi le masina, e pauu foi fetu mai le lagi, e luluina foi ‘au a le lagi.

³⁰Ona iloa ai lea i le lagi o le faailoga o le Atalii o le tagata; ona taufaitagitu‘i ai lea o itu aiga uma o le lalolagi; latou te iloa atu foi le Atalii o le tagata ua sau i ao o le lagi ma le mana ma le mamalu tele.

³¹E aauina atu foi e ia o ana agelu ma le leo tele o le pu, latou te faapotopoto foi i e ua filifilia e ia mai matāmatagi e fa, e amata i le tasi tulu‘iga o le lagi, e oo i le tasi tulu‘iga.

³²Ia outou mataulia le faataoto i le mati; pe a faatoa tutupu ona tatupu, ma matala mai ona lau, tou te iloa ai ua latalata le tausaga vevela.

³³E faapea foi outou, pe a outou iloa ia mea uma, tou te iloa ai, ua latalata ia, ua i faitotoa lava.

³⁴E moni, ou te fai atu ia te outou, E le mavae atu lava lenei tupulaga, seia oo mai nei mea uma.

³⁵E mavae atu le lagi ma le lalolagi, a o a‘u upu e le mavae atu lava ia.

³⁶A o lea aso ma lea itu aso e le iloa e se tasi, e le iloa lava e agelu i le lagi, ua na o lo‘u Tamā lava.

³⁷A e pei o ona po o Noa, e faapea foi pe a sau le Atalii o le tagata.

³⁸Auā e pei ona faia i ona po a o lei oo le lolo, ua latou aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa,

³⁹na le iloa foi e i latou ina seia oo le lolo, ma aveesea i latou uma; e faapea foi pe a sau le Atalii o le tagata.

⁴⁰O ia ona po e i ai i le vao o tagata e toalua, e avea le tasi, a e tuua le tasi.

⁴¹E olo faatasi fafine e toalua i le mea e olo a‘i saito, e avea le tasi, a e tuua le tasi.

⁴²O lea, ia outou mataala ai; auā tou te le iloa po o le fea itu aso e sau ai lo outou Alii.

⁴³Ia outou iloa lenei mea, ana iloa e le matai o le aiga po o le fea itu po e sau ai le gaoi, po ua na leoleoina, a e le tuua e ia lona fale ia elia.

⁴⁴O le mea lea ia outou nofo sauni ai; auā o le itu aso tou te le manatunatu ai e sau ai le Atalii o le tagata.

⁴⁵O ai foi le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ‘ai i ona itu aso?

⁴⁶Amuia lea auauna, pe a sau lona alii e maua o ia o loo faapea ona fai.

⁴⁷E moni, ou te fai atu ia te outou, e tofia o ia e pule i ana mea uma.

⁴⁸A e afai e fai ifo lea auauna leaga i lona loto, E faatuai mai lo‘u alii;

⁴⁹ona fasi ai lea o ia i ona uso a auauna, ua aai foi ma inu faatasi ma e inu ia onā;

⁵⁰e sau lava le alii o lea auauna i le aso e le faatalitali atu ai o ia, o le itu aso foi e le iloa ai e ia, ona matuā faasala lea ia te ia,

⁵¹ma avatu ia te ia lona tofi faatasi ma tagata pepelo; e i ai le taufaitagiaue ma le lilivau o nifo.