Read Samoan Old Version Bible – O LE TUSI PAIA MATAIO, 25 Bible Online

MATAIO, 25 - Samoan Old Version Bible – O LE TUSI PAIA bible

MATAIO, 25

¹O ia ona po e tusa ai le malo o le lagi ma taupou e toasefulu, o e na ave a latou lamepa, ma latou o atu e faafetaiai i le faatoafaiavā.

²Ua popoto le toalima o i latou, a e vālea le toalima.

³O e vālea ua ave a latou lamepa, a e lei avea ma ni suāuu.

⁴A o e popoto ua ave ni suāuu i a latou fagu faatasi ma a latou lamepa.

⁵Ua tuai mai le faatoafaiavā, ona taufaitulemomoe ai lea o i latou uma, ua momoe lava.

⁶A ua oo i le tulua o po, ona sau ai lea o lē alaga, Faauta, ua sau le faatoafaiavā; ina o ia outou e faafetaiai ia te ia.

⁷Ona tutū ai lea o ia taupou uma lava, ma teuteu a latou lamepa.

⁸Ona fai atu ai lea o e vālea i e popoto, Au mai ni a outou suāuu mā matou; auā o le a mamate a matou lamepa.

⁹A ua tali mai o e popoto, ua faapea mai, Ne‘i le lava ia i matou ma outou; a e lelei ona outou o i e faatau ma faatau mai ai ni a outou.

¹⁰Ua latou o e faatau, ona sau ai lea o le faatoafaiavā; o e ua saunia foi ua latou ulufale atu faatasi ma ia i le tausamaaga, ona pupuni ai lea o le faitotoa.

¹¹E mulimuli ane, ona o mai ai lea o isi taupou, ua faapea mai, Le Alii e, le alii e, ia e tatala atu le puipui mo i matou.

¹²A ua tali atu o ia, ua faapea atu, E moni, ou te fai atu ia te outou, ou te le iloa outou.

¹³O lea, ia outou mataala ai, auā tou te le iloa le aso po o le itu aso e sau ai le Atalii o le tagata.

¹⁴E faapei o le tagata foi na alu malaga, ua valaau i ana auauna, ona tuuina atu ai lea e ia o ana mea ia te i latou.

¹⁵Ua avatu e ia taleni e lima i le tasi, a e lua a le tasi, a e tasi i le tasi; ua faatatau i le mea ua mafai ai e le tagata; ona alu loa lea o ia i lana malaga.

¹⁶Ona alu ai lea o le na i ai taleni e lima na faatau atu ai, ua maua ai foi isi taleni e lima.

¹⁷Ua faapea foi o le na i ai taleni e lua, ua maua ai foi e ia le tasi lua.

¹⁸A o le na i ai le tasi, ua alu ma eli i le eleele, ua nā ai ario a lona alii.

¹⁹Ua mavae po e tele, ona sau ai lea o le alii o ia auauna, ua faamasino i ana mea ua ia te i latou.

²⁰Ona sau ai lea o le ua i ai taleni e lima ua au mai isi taleni e lima, ua faapea mai, Le alii e, na e tuuina mai ia te au taleni e lima; faauta, ua ou maua ai isi taleni e lima.

²¹Ona fai atu ai lea o lona alii ia te ia, Ua lelei ia, le auauna lelei e, ma le faamaoni, ua e faamaoni i nai mea itiiti, ou te tofia oe e pule i mea e tele; ina ulufale mai ia i le fiafia o lou alii.

²²Ua sau foi le ua i ai taleni e lua, ua faapea mai, Le Alii e, na e tuuina mai ia te au taleni e lua; faauta, ua ou maua ai isi taleni e lua.

²³Ona fai atu ai lea o lona alii ia te ia, Ua lelei ia, le auauna lelei e, ma le faamaoni, ua e faamaoni i nai mea itiiti, ou te tofia oe e pule i mea e tele; ina ulufale mai ia i le fiafia o lou alii.

²⁴Ua sau foi le ua i ai le taleni e tasi, ua faapea mai, Le alii e, na ou iloa o oe o le tagata faigata, ua e selesele i le mea e te lei luluina ai saito, ua e faapotopoto foi i le mea e te lei faataapeapeina ai mea;

²⁵ona ou fefe ai lea, ua ou alu ma ou nā lau taleni i le eleele; faauta, o lau mea lea.

²⁶Ona tali atu ai lea o lona alii, ua faapea atu ia te ia, Le auauna leaga e, ma le paie, ua e iloa ou te selesele i le mea na ou le luluina ai saito, ou te faapotopoto foi i le mea na ou le faataapeapeina ai mea;

²⁷o lea, e tatau ai pe ana e tuuina atu la‘u ario i e faatau tupe, po ua ou sau, ona ou maua ai lea o la‘u mea ma lona taui.

²⁸O lenei, ia outou fao le taleni nai ia te ia, ma avatu i le ua i ai taleni e sefulu.

²⁹Auā o se ua i ai ni mea, e foaiina atu ia te ia e atili tele ai ana mea; a o le ua le i ai ni mea, e faoa le mea ua i ai.

³⁰Ia outou tulia foi le auauna le aoga i le pouliuli i fafo, e i ai le taufaitagiaue ma le lilivau o nifo.

³¹Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu;

³²e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ‘oti;

³³ona tuu ai lea e ia o mamoe i lona itu taumatau, a o ‘oti i lona itu tauagavale.

³⁴Ona fai atu ai lea o le Tupu i e o i lona itu taumatau, O mai ia, o outou ua faamanuiaina e lo‘u Tamā, ia fai mo outou tofi le malo ua saunia mo outou a o lei faavaeina le lalolagi;

³⁵auā na ou fia ‘ai, ona outou avane ai lea ni mea ou te ‘ai ai; na ou fia inu, ona outou avane ai lea ni vai ou te inu ai; sa fai a‘u ma tagata ese, ona outou talia lea o a‘u;

³⁶na ou le lavalavā, ona outou faaofuina lea o a‘u; na ou ma‘i, ona outou asiasia mai lea o a‘u; na ou i le fale puipui, ona outou o ane ai lea ia te au.

³⁷Ona tali mai ai lea ia te ia o e amiotonu, e faapea mai, Le Alii e, o anafea na matou iloa ai oe ua fia ‘ai, ma matou fagaina oe? po o fia inu, ma matou avane e te inu ai?

³⁸O anafea foi na matou iloa ai oe o le tagata ese, ma matou talia oe? po o le le lavalavā, ma matou faaofuina oe?

³⁹O anafea foi na matou iloa ai oe ua ma‘i, po o i le fale puipui, ma matou o atu ai ia te oe?

⁴⁰Ona tali atu ai lea o le Tupu, e faapea atu ia te i latou, E moni, ou te fai atu ia te outou, auā na faia e outou i le tasi o e aupito itiiti o o‘u uso nei, o a‘u lea na outou faia i ai.

⁴¹Ona fai atu foi lea o ia i e o i lona itu tauagavale, O outou ua faafanoina, o ese atu ia ia te au i le afi e faavavau, ua saunia mo le tiapolo ma ana agelu.

⁴²Auā na ou fia ‘ai, a e tou te lei avane ni mea ou te ‘ai ai; na ou fia inu, a e tou te lei avane ni vai ou te inu ai;

⁴³sa fai a‘u ma tagata ese, a e lei talia a‘u e outou; na ou le lavalavā, a e tou te lei faaofuina a‘u; na ou ma‘i, na a‘u i le fale puipui foi, a e tou te lei asiasia a‘u.

⁴⁴Ona tali mai ai lea o i latou foi ia te ia, e faapea mai, Le Alii e, o anafea na matou iloa ai oe ua fia ‘ai, pe fia inu, po o se tagata ese, pe le lavalavā, po o ma‘i, po o i le fale puipui, ma matou lei auauna atu ia te oe?

⁴⁵Ona tali atu ai lea o ia ia te i latou, e faapea atu, E moni, ou te fai atu ia te outou, auā na outou le faia i le tasi o e aupito itiiti o i latou nei, o a‘u lea ua outou le faia i ai.

⁴⁶Ona o atu ai lea o i latou nā i le sala e faavavau; a o e amiotonu e o atu i le ola e faavavau.